Read Achang CHUNGH 78 Bible Online

CHUNGH 78 - Achang bible

CHUNGH 78

¹Ngah dius jens eh, ngos jyauh yvlyis gyo geh, ngah nhuot mas dang lyis kamp gyo geh.

²Dangtoeuq yah ngah nhuot haq las gohlhain dah wishomp lyis taiq kyoh das.

³Houka ngamoq dah phauh thyeih moq taiq kyoh zis ngamoq xauhgyo las seq zis nghuot.

⁴Hauh yvlyis ngamoq dah lo jens lyis ma zauh toh: YHENSAIN lhyi chungh gis cho, nyah yom yahge nyang kuot goeus dah mauhphoh muhzoh lyis jweh los das caiq bang lyis taiq kyoh das.

⁵Khasoeh ge lyis yah phauh thyeih moq gas nyamoq lo jens lyis seq nhang bas jungh ge, nyang Yakop mas tyingtoh dang toh, Israel mas lyi toh dyei.

⁶Housoeh jweh los das caiq mas bang hauh yvlyis yoeus las, khoeu los das nyamoq lo jens lyis eq yoh doms taiq kyoh chah.

⁷Housoeh nyamoq Mangso lhyi nghamhloms las Mangso kuot khoq muhzoh lyis ma tohnyhik nyhik, nyah tyingtoh dang lyis chank chah.

⁸Housoeh lyis nyamoq gas nyamoq dah phauh thyeih moq teh ma nghuot das. Nyamoq gas ehnyet than lha gomloeus toq bang, dang ma gyo bang nghuot, Mangso lhyi loms cho mha khanhamp eq ma toenk, lom ma luk bang nghuot.

⁹Ephraim lo jens lyei wuq bang moengzan nyeih lyis tsain tauh los.

¹⁰Mangso dah thanghchvp lyis ma chank, nyah lyi chank das zis tsain ngoek.

¹¹Nyamoq gas nyah muhzoh yahge nyang nyamoq lyis chixoeuq dah mauh loqmuh lyis tohnyhik.

¹²Nyang Egutu mas, Zoan pa mha nyamoq phauh thyeih moq nyoqlvtjvng mas mauhphoh muh kuot khoq.

¹³Nyang hauh thomh lyis kangh las nyamoq lyis lai los nhang. Jeis lyis gas tyoyvm teh toeutsung toh.

¹⁴Nyang nyamoq lyis nyeih lyis jyommauh yah, nyens gonh nyiduk yah shwih los.

¹⁵Nyang mhanhdyvp mas lukmuh lom lyis khwih las nyamoq lyis thomh mas jeis teh magons magoh gvmshuk.

¹⁶Nyang luk-uk masyah jeis thuq nhang lha jeismuh lvng teh jeis tsain yaus nhang.

¹⁷Nghuot laus eq nyamoq yaunos tsain kuot shih las mhanhdyvp mas Nyhang Thank Soeu lhyi gomloeus tsain toq.

¹⁸Nyamoq omes dah zonoms sang zis yah nyamoq nhaiqlom mas Mangso lhyi shiyoeuh.

¹⁹Nyamoq gas Mangso lhyi tyi lha, Mhanhdyvp mas jus yoh khyoq das lah?

²⁰Yoeuh aq, nyang hau luk lyis lyuk lyis jeis buk thuq las jeislvng teh yaus loh. Ohlhyoq eq yoh dyei das lhyeh? Nyah dius jens xiklyis shoh yoh sont dyei das lhyeh, tsain ge.

²¹Hauh dang YHENSAIN xauhgyo yvmvyah nyang nhaiqyo las Yakop mas nyi kat las, Israel lyis eq nhaiqgis yo.

²²Khasoeh ge lyis nyamoq Mangso lhyi ma lomsjingh, nyah khyuot yoeus cho lhyi ma loms.

²³Nghuot laus eq, nyang gas nyhang mha maukhung lyis tying toh las, maukhung khomh lyis tsain phank kat.

²⁴Nyang, dius jens zo das xiklyis Mana wus khyoq dyei las, maukhung mha dah gukzos nyamoq lyis dyei.

²⁵Dius jens gas zauzos zo las nyamoq lyis zonoms jo shoq dyei.

²⁶Nyang maukhung mha buisthuq lyeis muot nhang lha, nyah yomsoq yah mautyi lyeis shwih los.

²⁷Nyang nyamoq lyis shoh gas tsohmop nyhoq, nghoq gas thomh mas sihsho nyhoq wus khyoq dyei.

²⁸Nyang nyamoq lyis nyamoq thoenggus vkhau, nyamoq zvng yvmlhaink yah khyoq dyei.

²⁹Nyang nyamoq lyis nyamoq omes nyhoq dyei yvmvyah nyamoq jo shoq xauh zo.

³⁰Nghuot laus eq nyamoq omes zis ma nghoengh shih, nyamoq nhuot mas zonoms bos shih lyis,

³¹Mangso dah nhaiqyo zis gas nyamoq thoq mas jweh las yombos bang lyis sat. Israel mas wotyamh jens lyis eq jap tyamp.

³²Heinyhoq tsain xauh lyis eq nyamoq yaunos dvkuot shih; nyah mauhphoh muhzoh lyis eq ma lomsjingh.

³³Housoeh yvmvyah nyamoq dah buisnyeis lyis vjyuk ma bos shei loh, zvn lyis eq gyukphoh yvmas thank nhang.

³⁴Mangso nyamoq lyis sat khanghmuh nyet bang gas nyang lyis xo zis yah nyah jyank pheh yom zuk zuk doms lhain los.

³⁵Hauh uhlyis Mangso ka nyamoq dah luk-uk, Nyhang Thank Mangso ka nyamoq dah Khyuot kat Soeu nghuot yvlyis tsain soh.

³⁶Nghuot laus eq nyamoq gas YHENSAIN lhyi nhuot yah mhuih chungh las nyamoq dah lhyo yah nyang lyis tsain hwah.

³⁷Nyamoq nhaiqlom gas nyah xikkhonh mas ma wontang, nyah thanghchvp lyis eq ma chank.

³⁸Nghuot laus eq nyang gas nhaiqnyen nyeis las, nyamoq yobos khyuot dyei yvmvyah nyamoq lyis ma mhont tyamp. Nyah nhaiqyo zis nyoshoq lhain khyoq las nyah ehnyet gywes nyhoq nhaiq ma yo.

³⁹Nyamoq gas, muot loh lyeis gas ma tauh los teh, suihshoh nghuot yvlyis nyang soh dyei.

⁴⁰Mhanhdyvp mas nyamoq gas nyang lyis khanyhoq lhain nhaiqyo nhang. Khanyhoq lhaih nyeiskyuk yos mas nhaiq lhoq kuk lah!

⁴¹Nyamoq Mangso lhyi vlhain lhain shiwu las Israel dah Gyingshang Soeu lhyi kyoq toh lhyeh?

⁴²Nyang nyah yomsoq yah nyamoq lyis jeswus masyah khyuot kat buisnyeis lyis nyamoq ma soh.

⁴³Nyang gas Egutu mas nyah vlho, Zoan pa mha nyah mauh loqmuh lyis kuot khoq.

⁴⁴Nyamoq dah jeislvng mas dah jeis ma xauh shuk shoq nyamoq dah jeislvng jens lyis suih bweh nhang.

⁴⁵Nyamoq lyis nyhau dah yvngkhungh, nyamoq dah mau lyis mhont das puh lyis nhang kat.

⁴⁶Nyamoq dah guknyau shihnyau gas tungsangh lyis, nyamoq zwi las yoh dah vyhang ka bau lyis dyei tyamp.

⁴⁷Nyamoq dah zvbiq nwis lyis gyu tomp yah, maiphang saiq lyis nghan yah mhont dyei.

⁴⁸Nyamoq dah noeu lyis gyu tomp yah bat sat; gaunyhauq phung lhyi mau yah guons sat.

⁴⁹Nyang nyamoq lyis gyukphoh nhaiqyo, nhaiqlom dyis zis huot khyoq zis yah, chiqjyen nhang, houka shei ge dah loeuswons bang teh los.

⁵⁰Nyang nhaiqyo zis lyis ma jhen lo, nyamoq lyis ma lhuiq kat, yomh yah sat.

⁵¹Egutu dius dah yukgis loxeih dvnganh yahge Egutu bang dah zvng mas nyamoq dah yommonh lyis nyang tsain sat.

⁵²Nyang nyah dius jens lyis gas yvng lyis teh shwih las, mhanhdyvp mas yvng phung lhyi teh choshe los.

⁵³Nyang nyamoq lyis wontang shwih los las nyamoq ma gyuk. Jeswus lyis gas hau thomh yah nghop tyamp.

⁵⁴Nyang nyamoq lyis nyah gyingshang maukyo yahge nyah loqyos loq yah hauh boms mau mas shwih los.

⁵⁵Nyang gas dius nyau jens lyis nyamoq xikkhonh masyah khat tyamp las, nyamoq dah vso lhyi gvm dyei. Nyamoq dah zvng mas Israel jens lyis nyeis nhang.

⁵⁶Nghuot laus eq nyamoq Nyhang Thank Mangso lhyi shiyoeuh zis yah gomloeus toq. Nyah kanghjyoeng dang lyis ma tsain chank.

⁵⁷Nyamoq gas nyamoq phauh thyeih moq teh phanh las lom ma luk kuot; nyamoq gas mhuih dah nyo teh tauh loh.

⁵⁸Nyhang dah joqyos jens yah nyang lyis nhaiq lhoq yo, thwang dah gungslho yah eq noh nhang.

⁵⁹Mangso haih zis nyvng lyis, nyang nhaiqlom tsoeu lha nyah dius jens lyis ngoek tyamp.

⁶⁰Housoeh las nyang dius jens mas nyeis khoq dah Shilo zvng lyis she tyamp.

⁶¹Nyang nyamoq dah jeswus lyis nyah yomsoq yahge phunk vlho nghuot dah Thanghchvp Kwi jons loh nhang.

⁶²Nyah dius jens lyis nhaiqgis yo las nyamoq lyis nyamoq dah jeswus lyis yah sat nhang.

⁶³Nyamoq dah loloeu jens jes mas gyoh tyamp las nyamoq dah lonyi jens lyis yoeus das bang hank ma bos lo.

⁶⁴Nyamoq dah phudyei bang sham mha tsain gyoh laus eq nyamoq dah chauhmuh jens kuk ngaus das toeuh ma bos.

⁶⁵Thang thank lyis YHENSAIN ka yhet pyo soeu teh soh los; nyang gas zvbiq byan dah yombos soeu teh nghuot.

⁶⁶Nyang gas nyah jeswus jens lyis khat tangh las vcaiq vto somh zis yah xoqphuh nhang.

⁶⁷Nyang Yosep dah diusjangh caiq lyis peq tyamp laus eq, Ephraim vkoq lyis eq ma khyen.

⁶⁸Yuda vkoq yahge nyang jyetdap dah Zion boms lyis dvkhyen yoeus.

⁶⁹Nyang houmha nyah yhenmuh lyis nyah maukhung yhen teh tsuk toh; nyang hauh yvlyis nyeisjvng teh goeng joq nhang, vjangh gau joq.

⁷⁰Nyang nyah jons Dawi lyis khyen toh; nyang lyis katjang masyah shwih yoeus.

⁷¹Nyang yvng yoeuh nyeis yvmvyah Israel jens dah hwankti kuot nhang, Mangso dah dius jens lyis yoeuh gomh nhang.

⁷²Dawi gas koptoq ehnyet bos zis yah dvyhangteh nyamoq lyis lyes zis yah shwih gomh los.