Read Achang CHUNGH 79 Bible Online

CHUNGH 79 - Achang bible

CHUNGH 79

¹Mangso eh, dius nyau jens nah mau mas nyhenh wvng las, nah gyingshang yhenmuh lyis vwot v-oeu kuot. Yerusalem wus lyis thyoq tyamp.

²Nyamoq nah dius jens mvng, mau mas nghoq dah zos duot das xiklyis toh khoq, nah jyeidwis jens dah mvng yewus jens lyis zo nhang.

³Nyamoq nah dius jens dah suih lyis jeis soeh huot; suih gas Yerusalem chank jeis teh yaus loh, mvng tsain nyhop das zis hank ma nyeis lo.

⁴Yvmlhaink nyeis dah dius nyau jens ngamoq lyis laihwangh, yis, jwangh.

⁵YHENSAIN eh, nvng ngamoq lyis dvcaiq yah nhaiqyo nyeis das lah? Nah nhaiqyo cho ka nyi teh tsoq ngeh nyeis das lah?

⁶Nah nhaiqyo cho ka nvng lyis ma seq dah dius nyau jens yahge, nvng lyis shvmanh ma dung bang thoq mas loh bas jungh.

⁷Khasoeh ge lyis nyamoq nah dius jens lyis sat; nah mau lyis thyoq tyamp.

⁸Ngamoq dah phauh thyeih yobos gvng mas ngamoq lyis yobos vdyei. Ngamoq nghamhloms cho ma bos lo las gvshih ngamoq lyis nhaiq jenh nyen aq.

⁹Mangso eh, ngamoq lyis pangh aq, ngamoq lyis khyuot yoeus aq; nah nyoqnho ngelang xiklyis ngamoq lyis lhuiq kat las ngamoq dah yaunos khyuot dyei aq.

¹⁰Namoq dah Mangso khalhye nyeis lah, ge chamus dius nyau jens nyei das lah? Nah jyeidwis jens dah suih huot gvng mas nvng dius nyau jens lyis yobos dyei zis ngamoq nyvng bas jungh.

¹¹Thung gyoh bang dah noskyingh zis lyis gyo dyei aq: nah kuhxing yomsoq yah shei chah bang lyis lhuiq kat dyei aq.

¹²YHENSAIN eh, gohtoeu dah dius nyau jens nvng lyis laihwangh gvng mas nyamoq lyis nyhet huon tauh dyei aq.

¹³Housoeh lyis nah yvng phung mha dah yvng nghuot dah nah dius jens gas nvng lyis vjangh nhaiqshoqlang sang das. Ngamoq dvcaiq thang lyis dvcaiq nvng lyis chungh das.