Read Achang CHUNGH 80 Bible Online

CHUNGH 80 - Achang bible

CHUNGH 80

¹Israel dius nyau ge dah yvng phung lyis yoeuh Soeu eh, gyo dyei aq; Hauh yvng phung dah uhshe soeu eh, gyo yoeus dyei aq. Kherubim jo nah hwankti tank mas tsung toh soeu eh!

²Ephraim, Benyamin yahge Manase vkoq jens lyis thuq xoeuq las nah yom chixoeuq zis yah ngamoq lyis los khyuot yoeus aq.

³Mangso eh, ngamoq lyis doms toeu lha, nah nhaiqnyen cho chixoeuq lyis ngamoq khyuot yoeus zis xauh das.

⁴Yomzains YHENSAIN Mangso eh, nvng khanhamp jweh shoq nah dius jens dung dang lyis nhaiqyo toh das lah?

⁵Nvng nyamoq lyis nyoqdyeis wom tsoh las nyoqdyeis nyoshoq shuk nhang.

⁶Nvng ngamoq yvmlhaink mas dah dius nyau jens lyis ngamoq mau lyis zan nhang lha; ngamoq dah jeswus jens ngamoq lyis laihwangh.

⁷Maukhung Jesphung Mangso eh, ngamoq lyis doms toeu lha, nah nhaiqnyen cho chixoeuq lyis ngamoq khyuot zis xauh das.

⁸Nvng gas Egutu mas dah zvbiq nwis dvkoeuq yoeus los las, dius nyau jens lyis khat tyamp zis yah hauh yvlyis tsungh toh.

⁹Nvng hauh zis yuk das nyhenshang joqyos dvkoeuq shang kat las nyah vnyet chent zis yah dvmau gonh dyos joq.

¹⁰Nyah siyet gas jing lyis, vko ka nyhang thank arit zains lyis nghop toh.

¹¹Nyah vko ka Mediteranean Thomh jweh shoq lywas loh las Uphrat Lvng hweq chent loh.

¹²Nvng chamus khyam lhaink toh zis thyoq tyamp? Gvshih houmha suh lai bang hank eq hauh zvbiq shih yoh khauh zo.

¹³Wuqau jens yah nang nheh, yewus yah zo tyamp.

¹⁴Yomzains Mangso eh, ngamoq jyank pheh tauh los aq! Maukhung masyah ngamoq lyis yoeuh dyei aq. Nah dius jens lyis los khyuot yoeus aq.

¹⁵Hai nvng tsungh toh dah zvbiq nwis lyis los khyuot yoeus aq. Nvng haih zvbiq nwis noeuh lyis kuh yangh los nhang.

¹⁶Ngamoq dah jeswus jens gas hauh yvlyis nyi ngheq zis yah zan tyamp. Nyamoq lyis nhaiqyo zis yah yoeuh aq, mhont aq.

¹⁷Nvng yombos nhang dah dius nyau, nvng khyen toh dah dius jens lyis gos las gomh toh dyei aq.

¹⁸Ngamoq nah jyank masyah khanhamp eq nungs ma phuk loh lo das, ngamoq lyis kang dwis nhang aq, ngamoq nvng lyis chungh das.

¹⁹Yomzains YHENSAIN Mangso eh, ngamoq lyis shwih tauh los aq. Ngamoq khyuot yoeus zis xauh bas jungh nah nhaiqnyen cho jenh chixoeuq aq.