Read Achang CHUNGH 81 Bible Online

CHUNGH 81 - Achang bible

CHUNGH 81

¹Yang lyis khomp dah Mangso lhyi kaiq chungh goh, Yakop Mangso lhyi chunghthwe kat goh.

²Toenk khvlhank yah xi lha jyoeu nhont geh, gyomes toenk khvlhank mas toenk, chont toenk yah bat geh.

³Lohcanh nyeih pwe yahge lhamhmuh lainh nyeih pwe mha lvbuh muot geh.

⁴Haih zis gas Yakop Mangso jyank masyah los dah vmingh, Israel dah lyi nghuot.

⁵Nyang Egutu mau lyis zan yoq lyis Israel dius jens lyis dyei toh. Ngos ma seq ku dah thwe dvkoeuq taiq zis xauhgyo.

⁶Houka, Ngos namoq gvnungh mas dah yvwons lyis yoeus tyamp dyei, namoq jyenhchvp lyis khyoq nhang.

⁷Namoq chiqjyen uhlyis namoq ngos lyis lui las ngos namoq lyis khyuot yoeus. Lyeismuh jyang ngos tamh joqyos masyah ngos namoq lyis toeuh dyei. Meriba mas dah jeisthuq dwang jens mas ngos namoq lyis shiyoeuh. (Selah)

⁸Ngah dius jens eh, ngos taiq kyingh dang gyo geh; Israel jens eh, ngos namoq lyis gyo nhang mes!

⁹Namoq khanhamp eq gohtoeu mangso lhyi ma gis paiq.

¹⁰Ngos gas, namoq lyis Egutu mau masyah shwih los dah YHENSAIN Mangso nghuot. Namoq dah nhuot lvm lvm haq aq, ngos jo shoq tsoh das.

¹¹Nghuot laus eq ngah dius jens ngah dang ma gyo, Israel jens ngah domsyos ma gyo.

¹²Housoeh yvmvyah ngos nyamoq lyis nyamoq kuot mes zis kuot bas jungh nyang ehnyet than cho pheh loh nhang.

¹³Ngos ngah dius jens lyis ngah dang kha iq gyo nhang mes, ngah domsyos kha iq gyo nhang mes!

¹⁴Ngos nyamoq dah jeswus lyis lvnyap khyoq das, nyamoq dah jeswus dvnganh lyis ung das.

¹⁵YHENSAIN lhyi hoeng bang nyah xikkhonh mas gyuk zis yah paiq das, nyamoq lyis joeng cho vcaiq vto joq das.

¹⁶Nghuot laus eq ngos namoq lyis gis thank sunghso tsoh das, mhanhdyvp mas dah dyoyhei yah jo nhang das.