Read Achang CHUNGH 83 Bible Online

CHUNGH 83 - Achang bible

CHUNGH 83

¹Mangso eh, tsingtsam vkuot, samlo vnyeis, tsoeklo vkuot.

²Yoeuh aq! nah jeswus hoeu lha, nvng lyis hoeng bang nghank los.

³Nah dius jens lyis tyi lha khaujei tsain gauh ni, nvng gomh toh bang lyis tyi das zis tsain lhaink.

⁴Nyamoq gas, Los geh, nyamoq vnyau lyis mhont tyamp goh; Israel lyis vcaiq vto tohnyhik tyamp bas jungh, ge.

⁵Nyamoq dah khaujeini yvlyis xamxonh las, nvng lyis tyi lha buisnoms tsain toh.

⁶Nyamoq gas Edom vnyau yahge Ishmael vnyau, Moab vnyau, Hagri vnyau,

⁷Gebal, Amon, Amalek vnyau, Philisti vnyau yahge Taire wus mas bang nghuot.

⁸Asiria dius jens eq nyamoq yah tsain xonh. Yombos das xiklyis Lot vshih jens yah xonh. (Selah)

⁹Nyamoq lyis Midian lyis teh kuot geh, Kishon lvng yvm mas Sisera yahge Yabin lyis teh kuot geh.

¹⁰Nvng nyamoq lyis Endor mas ung lha nyamoq dah gungs gas nyeisjvng mas bop yuq tyamp.

¹¹Nyamoq dah uhshe bang lyis Oreb yahge Zeb lyis teh, nyamoq dah guon bang dvnganh lyis ung lhaZeba yahge Zalmuna lyis teh kuot geh.

¹²Nyamoq gas Mangso yah sen dah mau lyis sain yoeus goh, tsain ge.

¹³Mangso eh, nyamoq lyis lyeis muot tangh dah phvlhau teh, lyeis muot tangh dah phihsan teh sanh tyamp aq.

¹⁴Yoszanh nyi ngeh teh, jing mas dainhjeis nyilhyam teh,

¹⁵Nyamoq lyis nah lyeismuh jyang yah khat las, nah uklyeis yah kyuk aq.

¹⁶YHENSAIN eh, nyamoq lyis xoqphuh nhang aq; nyamoq lhyi nah yomsoq lyis seq nhang aq.

¹⁷Nyamoq vcaiq vto somh las gyuk bas jungh, nyamoq xoqphuh zis yah shei loh bas jungh.

¹⁸Nvng kyingh YHENSAIN nghuot cho, nyeisjvng gonh lyis guon soeu nghuot cho nyamoq seq bas jungh.