Read Achang CHUNGH 84 Bible Online

CHUNGH 84 - Achang bible

CHUNGH 84

¹Maukhung Jesphung YHENSAIN eh, ngos nah yhenmuh lyis kha iq jyet!

²Ngos houmha kha iq jweh mes lah! YHENSAIN dah yhenmuh mas lvnyap nyeis mes. Ngah nhaiqlom yahge gungsshoh dwis nyeis Mangso lhyi gauslaus chunghthwe kat nyeis.

³Ngah hwankti, ngah Mangso, Maukhung Jesphung YHENSAIN eh, nah phon jens nvm mas jos gas nyeis joqyos kuot, pilan gas lo whop das sot sot.

⁴Nah yhenmuh mas nyeis bang kha iq pyo! Nyamoq nvng lyis vjangh chunghthwe kat las chungh nyeis. (Selah)

⁵Nah jyank mas yom yoeus soeu, Zion boms pheh gyung suh loh mes soeu ka kha iq pyo!

⁶Nyamoq kyuk dah Bakha langhkhau lai loh lyis, houmha jeisthuq dwang bweh nhang, mauxeih eq hauh thomhlo lyis bos tyink dyei.

⁷Nyamoq loh nyeis lyis yombos los las Zion boms mas, mangso jens dah Mangso lhyi loh nyvng.

⁸Maukhung Jesphung YHENSAIN Mangso eh, ngos dung dang lyis gyo dyei aq. Yakop Mangso eh, kamp gyo aq. (Selah)

⁹Mangso eh, nvng khyen toh, ngamoq dah hwankti lyis shvmanh dyei aq.

¹⁰Nah yhenmuh mas dvnyeih xauh nyeis zis gas gohyos nyeis dah buisnyeis dvkhyoengh thoq lyis zes gis. Lhung bang dah yhen mas xauh nyeis thoq lyis ngah Mangso yhen khyam khomh mas xauh yap mes.

¹¹YHENSAIN ka yang lyis gos dyei soeu yahge phunk bos hwankti nghuot. Yang lyis jyehjuh yahge nyoqnho ngelang dyei. Jus zis kuot bang lyis gis zis dyei das zis nyang ma ngoek.

¹²Maukhung Jesphung YHENSAIN eh, nvng lyis loms khau bang gas ngelhoq.