Read Achang CHUNGH 86 Bible Online

CHUNGH 86 - Achang bible

CHUNGH 86

¹YHENSAIN eh, ngos dung dang gyo las toeuh dyei aq. Ngos shohjyen lha yomnhuk nyeis.

²Ngos nvng lyis phauh nyang yvmvyah ngos lyis shei cho mhayah khyuot yoeus aq. Ngos gas nah jyeidwis nghuot las nvng lyis loms yvmvyah ngos lyis khyuot yoeus aq.

³Nvng gas ngah Mangso nghuot. Ngos nvng lyis dvnyeih gonh lui nyeis yvmvyah, ngos lyis nhaiqnyen aq.

⁴YHENSAIN eh, ngos shvmanh dung zis gas nah jyank mas jweh goeus yvmvyah nah jyeidwis lyis gaus nhang aq.

⁵YHENSAIN eh, nvng gas ngah xiklyis gis, yobos khyuot dyei, nvng lyis lui bang dvnganh lyis mathank magons jyetdap cho dyei.

⁶YHENSAIN eh, ngos dung dang gyo dyei aq, ngos lyis pangh das zis dung lyis gyo dyei aq.

⁷Nvng ngos dung zis gyo dyei yvmvyah chiqjyen nyeih lyis ngos nvng lyis lui.

⁸YHENSAIN eh, nvng teh doeus dah mangso ma bos. Nvng kuot yvlyis hank ma yoh kuot.

⁹YHENSAIN eh, nvng gvnkhanh toh dius nyau dvnganh gas, nah xikkhonh mas los paiq das: nyamoq nah kuhxing cho lhyi chungh das.

¹⁰Nvng gas kuhxing lha mauhphoh zis kuot. Nvng kyingh Mangso nghuot.

¹¹YHENSAIN eh, nvng ngos lyis cha kuot nhang mes zis jyauh aq, ngos lomluk luk domsyos gyo das; ngos nvng lyis vlhomuh yoh phuqsoe das cho jyauh aq.

¹²YHENSAIN, ngah Mangso eh, ngos nvng lyis nhaiqlom dvnganh yah chungh das. Nah kuhxing cho lhyi vjangh taiq hoeuh das.

¹³Ngah xiklyis nah mathank magons jyetdap cho ka kha iq kuh lah! Khasoeh ge lyis, nvng ngos lyis lop masyah khyuot yoeus.

¹⁴Mangso eh, khwank bang ngos lyis tyi los. Nvng lyis chaxwe ma nhang dah Lhuotzo bang dvjens ngos lyis sat mes.

¹⁵YHENSAIN eh, nvng gas nhaiqnyen las jyetdap dah Mangso dvnghuot. Vjangh yah nhaiqlom xing, nhaiqbos, wontang soeu nghuot.

¹⁶Ngah jyank pheh lhain los las ngos lyis nhaiqnyen aq. Ngos nvng lyis lomluk luk phuqsoe yvmvyah ngos lyis yomdyei las khyuot yoeus aq.

¹⁷YHENSAIN eh, nvng ngos lyis pangh las nhaiqtaink goeus yvmvyah, ngos lyis hoeng bang nyvng las xoq bas jungh, ngos lyis gis cho chixoeuq aq.