Read Achang CHUNGH 88 Bible Online

CHUNGH 88 - Achang bible

CHUNGH 88

¹Ngos lyis khyuot yoeus dah YHENSAIN Mangso eh, ngos dvnyeih gonh kaiq nyeis, nyenh lyis ngos nah xikkhonh mas los.

²Ngos dung dang gyo dyei aq. Jenh pangh dyei aq oen ngos kaiq dang lyis kamp gyo dyei aq.

³Chiqjyen cho nyoshoq ngah thoq mas gyoh los las ngos shei bah ge goeus.

⁴Ngos gas shei bah ge bang teh nghuot las, yom dvnganh thank goeus.[6]

⁵Ngos gas shei bang mas doeuh tyamp toh zis xauh goeus; Nah pangh cho ma bos, nvng tohnyhik tyamp goeus bang sat zis xauh las lop mas joq bang teh nghuot goeus.

⁶Nvng ngos lyis mauchuotdwang noq thank lop dwang mas khyoq toh.

⁷Nah nhaiqyo zis gas ngos lyis nhiq toh, nah jeisphauq ngos lyis nhiq pyeh toh. (Selah)

⁸Nvng gas ngah dyenschangh jens lyis ngos lyis tyamp toh nhang; ngos lyis nyamoq dah choqh phoh zis bweh nhang. Ngos gas lhunk toh zis xauh las ma yoh thuq loh.

⁹Shanghsenh yvmvyah ngah nyoq yomnhuk goeus; YHENSAIN eh, ngos nvng lyis nyeih yau nyeih lui nyeis; ngos nah jyank pheh loq toeu lha shvmanh dung.

¹⁰Nvng shei bang lyis yomsoq muh kuot dyei laus eq, nyamoq nvng lyis ma yoh toq chungh lo. (Selah)

¹¹Nah mathank magons jyetdap cho lhyi lop mas hank ma taiq lo, nah wontang cho lhyi dyoqbis joqyos mas hank ma taiq lo.

¹²Mauchuot joqyos mas nah yomsoq muh, tohnyhik toh goeus bang mau mas nah gis cho lhyi nyamoq ma yoh nyvng lo.

¹³YHENSAIN eh, ngos nvng lyis pangh aq oen lui las, nvp yau nvp ngos nvng lyis shvmanh dung.

¹⁴YHENSAIN eh, nvng ngos lyis chamus phe? Chamus nungs phuk loh lah?

¹⁵Ngos loyvm lyis yah shanghsenh zis xauh las shei bah ge loh. Ngos gas nvng yobos dyei zis xauh las nyungdaus nyeis.

¹⁶Nah nhaiqgis yo zis ngah thoq mas gyoh las, nah gyukphoh zan cho ngos lyis mhont tyamp.

¹⁷Houka ngos lyis dvnyeih gonh jeis soeh lhaink toh; ngos lyis khyam nyang lhaink toh.

¹⁸Nvng kuot las ngah dyenschangh kau yangh ngos lyis doeuh tyamp toh. Mauchuotdwang kyingh ngah dyenschangh bweh joq.