Read Achang CHUNGH 89 Bible Online

CHUNGH 89 - Achang bible

CHUNGH 89

¹ YHENSAIN eh, ngos nah mathank magons jyetdap cho lhyi vjangh chunghthwe kat das. Ngos nah wontang cho lhyi vcaiq caiq taiq hoeuh das.

²Nah jyetdap cho ka vjangh goeng joq das zis ngos seq, nah wontang cho ka maukhung joq teh joq.

³Nvng taiq, Ngos khyen toh soeu yah ngos thanghchvp chvp las, ngah jyeidwis Dawi lyis dangthoengh toh.

⁴Nah vshih gas vjangh hwankti nghuot das; ngos nah hwankti nyau lyis vcaiq caiq gomh toh das, ge. (Selah)

⁵YHENSAIN eh, maukhung ka nvng kuot toh dah mauhphoh cho lhyi chunghthwe kat; gyingshang bang gas nah wontang cho lhyi chunghthwe tsain kat.

⁶Maukhung mha YHENSAIN teh zis hank ma bos; maukhung mha nyeis bang nvng yah hank ma yoh byi.

⁷Gyingshang bang dah huom ka nvng lyis gyukwoms. Nyamoq dvnganhmoq nvng lyis gyukwoms zis yah toq yap.

⁸Maukhung Jesphung YHENSAIN Mangso eh, nvng teh yom hank ma bos. YHENSAIN eh, nvng gas dvnganh yvmas wontang.

⁹Yomsoq bos dah thomh lyis nvng guon nyeis. Hauh jeisphauq toq lyis nyang tam nhang.

¹⁰Nvng dam Rahab lyis thungh thyi lha sat. Nvng nah yomzains yom yah nah jeswus jens lyis ung tyamp.

¹¹Maukhung yahge nyeisjvng gas nah zis nghuot. Nvng mungkvn yahge houmha dah vyhang dvnganh yvlyis kuot toh.

¹²Nvng mautsung, mautyi lhyi gvnkhanh toh. Tabor yahge Hermon boms gas gaus zis yah nvng lyis chunghthwe kat nyeis.

¹³Nvng gas kha iq yomsoq bos lah! Nah yom kha iq kuhxing lah!

¹⁴Nah munghdan gas dan cho yahge lyi jus yvmas vpom kuot toh. Nvng kuot cho dvnganh mas jyetdap cho yahge wontang cho chixoeuq nyeis.

¹⁵Nah nhaiqnyen cho dah bvng yvmas nyeis bang, nvng lyis chunghthwe kat las paiq dah dius jens kha iq pyo lah!

¹⁶Nah gvng mas nyamoq dvnyeih gonh gauslaus nyeis. Nyamoq nah dah gis cho gvng mas nvng lyis chungh nyeis.

¹⁷Nvng nyamoq lyis ung cho zainsmuh dyei. Nah jyetdap yvmas ngamoq lyis ung nhang.

¹⁸YHENSAIN eh, nvng ngamoq lyis gos das soeu khyen dyei. Israel dah gyingshang Mangso, nvng ngamoq lyis hwankti dyei.

¹⁹Gohlhain nvng nah lomluk jyeidwis jens lyis nyoqnyvng masyah taiq zis gas, Ngos nyings hoeuh dah jeslo dvyuk lyis pangh goeus. Dius jens masyah ngos khyen yoeus toh soeu lhyi hwankti tank dyei goeus.

²⁰Ngos ngah jyeidwis Dawi lyis gyingshang coeu juot dyei zis yah hwankti kuot.

²¹Ngah yom gas vjangh nyang yah nghuot das, ngah yomsoq gas nyang lyis yombos nhang das.

²²Nyah jeswus nyang lyis khanhamp eq ma yoh ung das. Lhung bang nyang lyis ma ung das.

²³Ngos nyah jeswus lyis thungh thyi das, nyang lyis hoeng bang dvnganh lyis sat das.

²⁴Ngos nyang lyis jyet das, dang jings das. Ngos nyang lyis vjangh ung nhang das.

²⁵Ngos nyah munghdan lyis Mediteranean Thomh masyah Uphrat Lvng jweh shoq jyeq kat dyei das.

²⁶Dawi gas Mangso lhyi, Nvng ngah uwus, ngah Mangso nghuot; ngos lyis gos dyei soeu yahge ngah khyuot yoeus soeu nghuot, ge.

²⁷Mangso taiq zis gas, Ngos nyang lyis ngah yukgis loxeih kuot das, hwankti jens dvnganh mas kuh thank Soeu kuot das.

²⁸Ngos nyang lyis dyei toh dangthoengh vjangh tyink. Nyang yah chap toh thanghchvp vcaiq vto joq das.

²⁹Nyah hwankti vnyau maukhung joq teh doengs das; nyah diusjangh caiq gas vjangh hwankti nghuot das.

³⁰Nghuot laus eq nyah diusjangh caiq ngah lyi lyis domsyos ma gyo, ngos tying toh khyvlyis kang ma dwis lyis gas,

³¹Ngos shet toh khyvlyis ma kuot, ngah tyingtoh dang lyis ma chank lyis gas,

³²Ngos nyamoq dah yaunos xiklyis joeng das. Nyamoq kuot cho gvng mas shanghsenh nhang das.

³³Nghuot laus eq ngos Dawi lyis jyet cho ma doms, nyang yah toh dah dangthoengh ma katkhyoq das.

³⁴Ngos gas nyang yah toh dah thanghchvp ma thyoq das, ngos nyang yah toh goeus dah dangthoengh dvkoeuq eq ma thyoq das.

³⁵Ngah gyingshang nyings yoeus las dvlhain dangthoengh toh goeus zis gas, ngos Dawi lyis khanhamp eq ma hwah das.

³⁶Nyah diusjangh caiq vjangh joq das, buis tso nyeis dvchank ngos nyah munghdan lyis yoeuh gomh dyei das.

³⁷Houka maukhung mha wontang kanghjyoeng lhamhmuh teh, goeng joq das, ge. (Selah)

³⁸Nghuot laus eq nvng khyen toh hwankti lhyi nhaiqyo. Nvng nyang lyis peq tyamp toh.

³⁹Nvng nah thanghchvp thyoq las, nah jyeidwis dah buismuk lyis phvlhau boms mas khyoq toh.

⁴⁰Nvng nyah wusciank lyis thyoq khyoq las, nyah thoenkgus jesdvp dyoq gyoh joq.

⁴¹Houmha suh lai bang dvnganh nyang yah sen zis khauh loh. Nyah yhenkyoh bang dvnganh nyang lyis yis dyei.

⁴²Nvng nyah jeswus jens lyis ung nhang. Nvng nyamoq dvnganhmoq lyis pyo nhang.

⁴³Nvng nyah kyonhkhyi lhyi yhung pvjus mus nhang lha jeszan yvmas nyang lyis somh nhang.

⁴⁴Nvng nyah zau lhamloq yoeus tyamp dyei las nyah hwankti tank lyis nyhen mha khyoq tyamp dyei.

⁴⁵Nvng nyang lyis shishenh ma jweh shih lyis mang nhang lha nyang lyis xoqphuh nhang. (Selah)

⁴⁶YHENSAIN eh, nvng vcaiq vto tamh joq lo das lah? Nah nhaiqyo cho nyi soeh khanhamp jweh shoq ngeh nyeis das lah?

⁴⁷Ngah kang kha iq lyung zis lyis soh dyei aq: Nvng ngamoq dvnganhmoq lyis seq shei khyvlyis gvnkhanh toh yvlyis soh dyei aq.

⁴⁸Ma shei shei hank yoh nyeis? Dius gas nyang lop mas ma gyoh shoq hank yoh kuot lah? (Selah)

⁴⁹YHENSAIN eh, gohlhain nah jyetdap cho cangxeih kyink cho khalhye loh goeus? Nvng Dawi lyis dangthoengh toh zis khapheh loh goeus?

⁵⁰Ngos nah jyeidwis laihwangh cho khasoeh xauh yvlyis eq, Lvbaus yah ngos lyis nhoengh zis khasoeh xauh kham yvlyis eq vtohnyhik dyei.

⁵¹YHENSAIN eh, nah jeswus jens nvng khyen toh hwankti lhyi laihwangh. Nyang khalhye loh khalhye laihwangh.

⁵²Chungh cho ka YHENSAIN jyank mas vcaiq vto joq bas jungh. Amen, Amen!