Read Achang CHUNGH 9 Bible Online

CHUNGH 9 - Achang bible

CHUNGH 9

¹YHENSAIN eh, ngos ngah ehnyet dvnganh yah nvng lyis chungh das. Ngos nah mauhphoh muhzoh dvnganh yvlyis jyank xoeuq das.

²Nvng mas gauslaus las gausyis nyeis das; Nyhang Thank Soeu eh, ngos nah nyings lyis chungh dah chunghthwe kat das.

³Nvng thuq xoeuq lyis, ngah jeswus jens nungs jik loh, nyamoq nah xikkhonh mas thungh lains las dyoqbis tyamp.

⁴Khasoeh ge lyis nvng ngah shot pheh soetuon dyei goeus; Dan dah soetuon soeu nvng nghuot las nvng hauh soetuon tank mas tsung toh.

⁵Nvng gohnyau bang lyis yaus las, lhung bang lyis mhont tyamp. Nyamoq dah nyings lyis vcaiq vto thyuk tyamp.

⁶Jeswus eh, dyoqbis cho ka vcaiq vto nghuot goeus. Wus jens lyis eq thyoq tyamp las nyah nyoqnyhank yangh dyoq tyamp goeus.

⁷YHENSAIN ka vcaiq vto hwankti nghuot las, soetuon das xiklyis nyah hwankti tank lyis kuot toh.

⁸Nyang gas mungkvn lyis dan zis yah guon las, dius jens lyis lyi jus khyvlyis soetuon.

⁹YHENSAIN ka zaiq zis xauh bang dah khaugus, chiqjyen xauh uhlyis dah gau joqyos nghuot.

¹⁰YHENSAIN eh, nvng lyis seq bang nvng lyis loms das; nvng gas nah jyank mas los bang hank lyis eq toh tyamp zis ma nghuot.

¹¹Zion lhyi guon soeu YHENSAIN lhyi chunghthwe kat geh: Dius nyau khanghmuh lyis nyah muhzoh kyoh geh:

¹²Mangso ka shanghsenh bang lyis soh, kuot shuot bang lyis yobos dyei. Shanghsenh bang dah kaiq dung dang lyis ma tohnyhik dyei.

¹³YHENSAIN eh, ngos lyis nhaiqnyen aq; Nvng gas ngos lyis shei cho masyah she toq yoeus soeu nghuot las YHENSAIN eh, ngos lyis hoeng bang gvng mas ngos chiqjyen xauh nyeis lyis khyuot kat aq.

¹⁴Housoeh ngos Yerusalem dius jens xikkhonh mas yap las nvng lyis chungh cho dvnganh nyamoq lyis yoh taiq kyoh das. Nvng ngos lyis khyuot yoeus yvmvyah ngos gauslaus das.

¹⁵Dius nyau jens, nyamoq doeu dwang mas nyamoq gyoms. Nyamoq khyoq twih mas nyamoq nyih.

¹⁶YHENSAIN ka jus dah nyah soetuon cho yah nyings hoeuh. Lhung soeu ka nyah loq yah kuot toh muhzoh mas nyih joq. (Higaion Selah)

¹⁷Lhung bang yahge Mangso lhyi tohnyhik tyamp dah gohnyau bang dvnganh gas shei das.

¹⁸Nyungs bang lyis vjangh yah tohnyhik toh das zis ma nghuot. Shohjyen bang dah nghamhloms cho ka vjangh dyoq dyuk das zis ma nghuot.

¹⁹YHENSAIN eh, toq aq, dius lyis v ung nhang: Gohnyau bang nah nyoqlvtjvng mas soetuon zis xauh bas jungh.

²⁰YHENSAIN eh, gohnyau bang lyis, nyamoq gas dius dvtsain nghuot cho nyamoq seq bas jungh nyamoq lyis gyuk nhang aq. (Selah)