Read Achang CHUNGH 90 Bible Online

CHUNGH 90 - Achang bible

CHUNGH 90

¹YHENSAIN eh, nvng gas vcaiq caiq ngamoq dah nyeis joqyos nghuot.

²Nvng boms ma kuot thuq shih, mungkvn lyis ma kuot thuq kat shih lyis yah nvng gas vcaiq vto Mangso nghuot, tsoq las eq vcaiq vto Mangso nghuot nyeis shih das.

³Nvng Cangsoeu lyis nyang cha nghuot khoq yvmas tauh loh nhang. Nvng nyamoq lyis tsoh pheh doms thaiq kat.

⁴Nah xikkhonh mas dvkhyoengh zvn gas dvnyeih teh dvnghuot. Hauh zis gas lai loh dah nyinaq teh nghuot. nyenh lyis dah shishenh dvdvm teh nghuot.

⁵Nvng ngamoq lyis nyhoeuh kat, ngamoq gas yhetmoq moq nyhank dvnyeis; ngamoq gas nvpsangh lyis yuk joq dah mhanh nyaus teh nghuot.

⁶Nvp lyis hauh zis cingh cingh buh joq, nyenhthang lhyi ka shei lha nyhauh loh.

⁷Nvng nhaiqyo zis yah ngamoq monh loh. Nvng nhaiqgis yo zis yah gyuk nvn nyeis.

⁸Nvng ngamoq dah yaunos lyis nah xikkhonh mas toh; gauh kuot dah yaunos lyis nvng nyvng yvmas toh.

⁹Nvng nhaiqyo gvng mas ngamoq dah kang lyung loh: hauh zis gas soqmuh nyhank teh dye tyamp.

¹⁰Ngamoq dah nyenhkyi nyhetci zvn nghuot; yombos lyis gas xetci zvn yoh nyeis. Nghuot laus eq yau cho yahge kuk cho kyingh dvshe los. Houka lvnyap lai loh las ngamoq gas dyuk loh.

¹¹Nah dah gyukphoh nhaiqyo dah yomsoq lyis hank yoh seq lah? Nvng nhaiqyo cho ka kha iq gyuk chank bos zis hank yoh seq lah?

¹²Ngamoq dah kang kha iq lyung yvlyis jyauh aq, housoeh lyis ngamoq joeui bos los mvbeh.

¹³Nvng khanyhank jweh shoq nhaiqyo nyeis shih das lah? YHENSAIN eh, nah jyeidwis lyis nhaiq jenh nyen aq.

¹⁴Ngamoq lyis dvnvp dvnvp nah mathank magons jyetdap zis yah tyink dyei aq. Housoeh lyis ngamoq dvcaiq gonh gauslaus las chunghthwe kat das.

¹⁵Nvng ngamoq lyis shanghsenh nhang zvn gyo lyis nhaiqkuk nyhoq gvshih ngamoq lyis pyo nhang aq.

¹⁶Ngamoq nah jyeidwis jens nah yomzains muhzoh lyis nyvng nhang aq; ngamoq dah diusjangh caiq lyis nah phunk bos yomzains lyis nyvng nhang aq.

¹⁷YHENSAIN, ngamoq dah Mangso eh, nah shvmanh jyehjuh gas ngamoq mas joq bas jungh, ngamoq kuot loh cho dvnganh mas ung nhang aq.