Read Achang SODANG 1 Bible Online

SODANG 1 - Achang bible

SODANG 1

¹Heika Dawi lo, Israel hwankti Solomon dah Sodang tsain nghuot.

²Joeui yahge taiqshet cho lhyi soh zis yah, vjyuk noq dah sangkhyangh jens lyis seqgyo das nyhenshang pangh jus dah sodang tsain nghuot.

³Hauh zis gas nvng lyis yik khyvlyis kang khasoeh dwis das cho, jus cho khasoeh kuot das cho, lyi jus cho, yih yih khasoeh kuot das cho yah jyauh.

⁴Ma seq soeu lyes los das zis yahge loyvm jens seq zaih das cho jyauh.

⁵Haih sodang jens gas joeui bos bang lyis seq cho zes bos los nhang. Nyhang nyhang xuq goeus bang lyis zes lyes los shoq xo coeu nhang. Hai joeui mhayah joeui dyei cho yoh das.

⁶Housoeh nyamoq sodang dah shung toh vjyuk lyis seq gyo las, gohtoeu joeui bos bang dah wishomp lyis seqgyo das.

⁷Seq cho bos das xiklyis YHENSAIN lhyi cangxeih gyukwoms aq. Koh bang gas joeui yahge taiq shet cho lhyi chaxwe ma nhang.

⁸Ngah lo eh, nah uwus taiq shet cho lhyi vlhomuh gyo aq: nah ungwes jyauh dang lyis eq vpeq tyamp.

⁹Khasoeh ge lyis bankhwank yungh, nghuot ya uhshot gas nvng lyis yungh los nhang teh nyamoq dah jyauh cho ka nah wotwu lyis zes gis los nhang.

¹⁰Ngah lo eh, yaunos kuot bang nvng lyis shiwu lyis nvng xam vbos xonh.

¹¹Dangtoeuq, nyamoq gas, Los aq, dvyuk yuk lyis sat das zis loh lhom goh, yobos ma bos soeu lhyi mvgon loh zan goh.

¹²Yang nyamoq lyis xo uhlyis nyamoq kang dwis zis yah pyo nyeis mvbeh. Nghuot laus eq nyamoq lyis loh kuot goeus ya nyamoq shei goeus.

¹³Yang phauhdap vyhang vja ja xo nyvng das. Yang, yah yhen lyis lvnyhvp yah tyink goh.

¹⁴Nvng ngamoq yah dvgeh los bos aq, yang loh thyoq los zis lyis dvgeh gvmzo goh, ge.

¹⁵Nghuot laus eq ngah lo eh, nyamoq yah vbos loh, nyamoq yah we we nyeis aq.

¹⁶Khasoeh ge lyis nyamoq gas ma gis zis kuot das zis lvnyap wuih loh, dius sat das ge vjangh cicont kuot nyeis.

¹⁷Nvng nyhik mes dah nghoq yoeuh nyeis yvmas twih khyoq zis gas chah vkyuh ma bos.

¹⁸Nghoq gas nyvng nyeis laus eq vkoh vbang dius jens dah twih mas nyih. Houyah dvyhangteh dius jens gas nyamoq nyang shei das cho dvlhom. Hauh twih mas nyamoq nyang nyih shei das.

¹⁹Lhuotzo cho ka vjangh yah khyanktau kang lhyi xo. Heisoeh bweh zis gas lhuotzo zis yah kang dwis bang mas bweh cho nghuot.

²⁰Joeui ka vmesbih teh talhoeu mha, kaih jang mas kaiq taiq nyeis.

²¹Nyang dius zain dah wuskhomh mas dang taiq nyeis.

²²Joeui taiq zis gas, Nhaiq ma bos bang eh, namoq khanyhank jweh shoq koh nyeis mes shih lah, seq cho lhyi khanyhank jweh shoq jwangh yvmas pyo nyeis das lah? Khanhamp eq ma xuq das lhyeh?

²³Ngos nvng lyis kyink nyeis yvlyis gyo aq. Housoeh lyis ngos nghamh cho nvng lyis dyei, ngos seq cho nvng lyis gvm.

²⁴Ngos nvng lyis lui goeus, los aq oen yus goeus laus eq nvng ma mes gyo, nvng ngos lyis pvlhyahlyoeus dvkuot.

²⁵Ngos joeui da dyei goeus yvlyis chaxwe ma nhang, ngos nvng lyis kyink goeus cho dvja eq ma mes yoeus.

²⁶Housoeh las ngos nvng yaukyenh yvlyis yis das. Nvng shanghsenh lyis jwangh das.

²⁷Hau shanghsenh cho ka lyeisjyang teh los lyis, yau cho ka lyeis lhain los teh nghuot las nvng gas shanghsenh nyungdaus das.

²⁸Hauh uhlyis namoq ngos lyis lui das laus eq ngos ma toeuh das. Namoq ngos lyis dvkhauyah xo laus eq ma nyvng das.

²⁹Namoq seq cho lhyi hoeng lha YHENSAIN lhyi gyukwoms das zis ngoek tyamp.

³⁰Namoq ngos dyei dah joeui lhyi khanhamp eq ma o. Nghuot ya ngos namoq lyis soq dyei lyis khanhamp eq ma yoeus.

³¹Housoeh yvmvyah namoq yah mon yih zis yoh das, namoq nyang kuot cho namoq lyis nos nhang das.

³²Nhaiq ma bos bang gas ngos lyis peq tyamp yvmvyah shei loh. Koh bang gas nyamoq nyang seq ge nghamh laus eq cha ma seq las dyoqbis loh.

³³Hank laus eq ngah dang gyo soeu ka jesluiq shohluiq xauh nyeis das. Nyang gau cho yoh las, cha lhyi eq ma gyuk noh.