Read Achang SODANG 10 Bible Online

SODANG 10 - Achang bible

SODANG 10

¹Heika Solomon dah sodang tsain nghuot. Joeui bos dah lo gas uwus lyis gaus nhang. Koh dah lo gas nyah ungwes lyis nhaiq dvkuk nhang.

²Ma jus khyvlyis yoh dah zisyos gas vkyuh ma bos, nghuot laus eq dan cho ka shei masyah khyuot yoeus.

³YHENSAIN ka dan bang lyis wom ma yuot nhang. Nghuot laus eq lhung bang lyis gas nyamoq o yvlyis ma yoh nhang.

⁴Lan cho ka nvng lyis shohjyen nhang. Nghuot laus eq yomkat muh zwi cho ka nvng lyis dis los nhang.

⁵Joeui bos dah lo gas jyo nyhink nyos lyis jyo tsainh toh laus eq koh dah lo gas jyo yhomh nyos lyis yhet joq.

⁶Dan soeu ka shvmanh yoh das. Lhung bang dah dang gas nyamoq dah soenghchoenk lhuotzo cho lhyi gos shung toh.

⁷Dan bang lyis shvmanh yoh teh soh nyeis das laus eq, lhung bang lyis gas dvsoq lyis tohnyhik das.

⁸Joeui bos bang gas gis dah joeui dyei yvlyis lhom yoeus. Vkoh vpaq dang taiq bang gas dyoqbis das.

⁹Dang jings bang gas jesluiq las gau joq laus eq dang ma jings bang gas nyah cho thuq los das.

¹⁰Jyoeng dang ma taiq bang gas yau cho lhoq thuq laus eq, debangh kyink soeu ka nyenstap cho kuot dyei.

¹¹Dan soeu dah dang gas kang jeisthuq dwang nghuot laus eq, lhung bang dah dang gas nyamoq dah soengh choenk lhuotzo cho lhyi gos shung toh.

¹²Hoeng zis gas zan goh cho lhoeu thuq kat laus eq jyetdap cho ka yobos dvnganh lyis khyuot dyei.

¹³Seqgyo cho bos las yik soeu ka joeui dang taiq. Nghuot laus eq koh soeu lhyi ka nyang lyis yobos dyei chah.

¹⁴Joeui bos bang gas seq cho xo tsainh toh laus eq, koh bang gas dang taiq zis yah dyoqbis cho dvshe los.

¹⁵Dis bang dah zisyos gas nyamoq lyis goeng dah wus teh gos toh dyei. Shohjyen bang dah nyungs cho ka nyamoq lyis dvdyoqbis nhang.

¹⁶Dan khyvlyis kuot dah phauh shangh zis gas kang nghuot. Lhung bang dah uhkung phauh gas dvmdyei zis dvnghuot.

¹⁷Taiq shet cho lhyi gyo yoeus soeu ka gohyuk lyis kang dwis cho chixoeuq laus eq, soq dyei cho lhyi peq soeu ka gohyuk lyis chowhang shwih whang loh.

¹⁸Hoeng yvlyis nghop shung toh soeu ka hwah soeu nghuot, loeusmus soeu ka koh soeu nghuot.

¹⁹Nvng dang zes taiq zes, yau yoh lwis, nvng joeui bos lyis gas nhuot nyheih toh das.

²⁰Dan soeu dah dang gas ngwis gyingh teh phauhdap. Nghuot laus eq lhung soeu dah nghamh cho ka phauh ma dap.

²¹Dan soeu dah dang gas dius nyoshoq lyis vkyuh dyei. Nghuot laus eq Koh bang gas nyamoq dah koh cho yah shei loh.

²²Nvng lyis dis los nhang zis gas YHENSAIN dah shvmanh nghuot Yomkat zwi khank cho ka nvng lyis ma zes dis los nhang.

²³Koh bang gas ma jus cho kuot yvmas pyo nyeis. Dan bang gas joeui cho mha nhaiq dvtap.

²⁴Dan bang gas nyamoq o zis yoh los das, lhung bang gas nyamoq gyuk thank zis dvyoh das.

²⁵Lyeisjyang los lyis lhung bang dyoq dyuk loh. Nghuot laus eq dan bang gas vjangh jesluiq.

²⁶Nvng dvja ja lyis lan soeu lhyi khanhamp eq vlhung. Nyang gas shihjyen jeis gas zwis gyen teh, nghuot ya nyoqjeih mas nyikhauh teh dvnghuot das.

²⁷YHENSAIN lhyi gyukwoms zis gas kang xing nhang. Nghuot laus eq lhung bang gas nyamoq shishenh ma jweh shih lyis shei.

²⁸Dan bang dah nghamhloms zis gas gauslaus cho pheh shwih loh. Lhung bang dah nghamhloms cho ka vkom dvnghuot.

²⁹YHENSAIN ka dan bang lyis gos toh dyei, laus eq ma gis zis kuot bang lyis gas mhont tyamp.

³⁰Dan bang gas vjangh sam cho bos laus eq lhung bang gas hauh mau mas ma doengs das.

³¹Dan bang gas joeui dang taiq, laus eq ma gis zis taiq dah lhyo ka doms tyamp das.

³²Dan bang gas nhaiqnyen shohgyo dang seq taiq. Lhung bang gas vjangh soeu lhyi nos nhang zis dvtaiq.