Read Achang SODANG 11 Bible Online

SODANG 11 - Achang bible

SODANG 11

¹YHENSAIN xiklyis ma jus dah jvng gas vchoqh vlhauq nghuot. Nyang jus dah jvng lyis nhaiqdoeus.

²Khwank bang lvnyap xoqphuh das. Ehnyet nyhen mha gyoh soeu ka joeui bos.

³Dan bang dah dang jings cho ka nyamoq lyis shwih uhshe dyei. Nghuot laus eq lom ma luk bang dah ehnyet guih cho ka nyamoq lyis dyoqbis nhang.

⁴Soetuon buisnyeis lyis dis cho ka vkyuh ma dyei. Nghuot laus eq dan cho ka shei masyah khyuot yoeus.

⁵Dius gis dah dan cho ka nyang lyis shwih uhshe dyei. Lhung bang gas nyamoq nyang dah lhung cho mha dvlains loh.

⁶Ehnyet zungh bang dah dan cho ka nyamoq lyis khyuot kat. Lom ma luk bang dah nyetnau cho mha nyamoq nyang dvnyih.

⁷Lhung soeu shei lhyi nyah dah nghamhloms cho dyoq tyamp; Nyah yomsoq masyah nghamhloms toh cho dvnganh vkom bweh.

⁸Dan soeu ka yaukyenh cho mhayah khyuot zis xauh las nyah gungsthaiq lhung soeu xauh kham zo das.

⁹Mangso ma bos soeu dah nhuot gas nyah yhenkyoh lyis dyoqbis nhang. Nghuot laus eq dan soeu ka seq cho yah luiq los das.

¹⁰Dan bang nyeisgis yaplhoq lyis wus gonh gauslaus nyeis. Lhung soeu dyoqbis loh lyis houmha kaiq gaus nyeis.

¹¹Ehnyet dan soeu shvmanh yoh gvng mas wus gas chunghtoq zis xauh. Lhung soeu dah nhuot masyah gas hauh yvlyis dvtoeu mhuk tyamp.

¹²Joeui ma bos soeu ka nyah yhenkyoh lyis ma gis zis taiq. Yik soeu ka samlo dvnyeis.

¹³Loeusmus yenh soeu ka zauh toh cho taiq thuq kat. Nghuot laus eq yoh loms soeu ka zauh toh cho lhyi ma taiq thuq.

¹⁴Joeui yoh dyei bang ma bos lyis dius nyau somh loh. Nghuot laus eq joeui da bang nyo lyis jesluiq.

¹⁵Lvbaus xiklyis kham soeu ka hauh nyhenshang shanghsenh top nyang xauh das. Nghuot laus eq housoeh teh kham yvlyis hoeng soeu ka jes ma bos.

¹⁶Nhaiqbos vmesbih gas nyoqnho ngelang yoh, nhaiq ma seq nyen soeu ka dis cho kyingh dvyoh.

¹⁷Nhaiq seq nyen soeu ka nyah gungs lyis vkyuh dyei. Lhoeng soeu ka nyah gungs lyis yau dvdyei los.

¹⁸Lhung soeu ka uhkung phauh cha ma yoh das. Nghuot laus eq dan cho dah jyo khyoq soeu ka goengtoenk joq dah phauh shangh zis xauh yhomh das.

¹⁹Dan jyoeng soeu ka kang yoh. Ma gis cho chank xo soeu ka shei cho pheh dvloh.

²⁰YHENSAIN ka ehnyet guih bang lyis choqh. Yobos huon dais ma bos cho chank bang lyis nyang nhaiqdoeus.

²¹Lhung bang gas yobos ma xauh ma mus das. Nghuot laus eq dan bang dah vnyau vshih gas luiq das.

²²Yungh laus eq wot ma wons dah vmesbih gas wuq nho mas lhangh dah xing khwank teh dvnghuot.

²³Dan bang dah omes cho dah vthang ka gis cho kyingh nghuot. Lhung bang dah nghamhloms cho dah vthang ka nhaiqyo cho[3] dvnghuot.

²⁴Dius dvyuk gas dyei tyamp laus eq zes yoh los; gohtoeu dvyuk gas soeu lhyi ma gvm, xungh nyeis laus eq shohjyen loh.

²⁵Nyoshoq dyei gvm soeu ka dis los das, gohyuk lyis pangh soeu ka nyang eq pangh zis xauh das.

²⁶Jyo lhyi phauh nyo nyo yah ungh das ge zwizains toh soeu ka nhoengh xauh das. Nghuot laus eq chah uhlyis jyo ungh dyei soeu ka shvmanh zis xauh das.

²⁷Gis yvlyis kuot soeu ka nyoqnho yoh das: Ma gis yvlyis kuot soeu ka yaukyenh zis dvxauh das.

²⁸Nyah zisyos lyis loms soeu ka lains das. Nghuot laus eq dan bang gas nyaus dah saiqhuq teh jebais los das.

²⁹Nyah yhenbang lyis lhoeu yau soeu ka vthang chon mha cha eq ma nghuot lo. Koh soeu ka joeui bos soeu dah jyeidwis duot das.

³⁰Dan cho ka kang dyei. Dius dah kang lhyi yoh khyuot yoeus soeu ka joeui bos.

³¹Dan bang nyeisjvng mas phauh shangh zis xauh lyis gas lhung bang yahge yaunos wons bang gas joeng zis jyoengh xauh das.