Read Achang SODANG 12 Bible Online

SODANG 12 - Achang bible

SODANG 12

¹Jyauh cho lhyi jyet soeu hank eq seq cho lhyi jyet. Taiq kyingh yvlyis hoeng soeu ka koh soeu dvnghuot.

²Gis soeu ka YHENSAIN jyank masyah nyoqnho yoh. Lhung dah khaujeini soeu ka dang thang thyet zis dvxauh das.

³Dius gas lhung cho yah ma yoh goeng joq. Nghuot laus eq dan bang gas saiq nyet chent teh ma lop ma loeh.

⁴Wotwons dah yhensain nyhiq gas nyah yhensain phoq dah buismuk teh nghuot. Xoq lhoeu phuh dah yhensain nyhiq gas, yhensain phoq dah shohyau mas bopyuq teh nghuot.

⁵Dan bang dah nghamhtoh cho ka lyi jus. Lhung bang dah khaujeini zis gas mhuih cho dvnghuot.

⁶Lhung bang dah dang gas suih huot das zis lhom nyeis. Nghuot laus eq dan bang dah dang gas dius kang lhyi khyuot yoeus das.

⁷Lhung bang gas dyoqbis las ma nyeis lo, nghuot laus eq dan bang dah yhenbang gas goeng joq das.

⁸Dius gas nyamoq joeui khyvlyis chungh zis xauh das. Ehnyet guih soeu ka dius ngis khyoq zis dvxauh das.

⁹Diuslaiq khyvlyis nyah womdau nyang khoeu chah zis gas, dius zains nyings wons las zonoms ma yoh mus thoq lyis zes gis.

¹⁰Dan soeu ka nyah gaunyhauq lyis jyauhhuh. Lhung soeu ka nyah nhaiqnyen cho yangh lhoeng zis dvnghuot.

¹¹Vsainnyang yos zwizo soeu ka jo shoq xauh zo. Nghuot laus eq ma gis bweh dah nghamhloms cho lhyi chank khat soeu ka seqgyo cho ma bos.

¹²Lhung soeu ka ma gis bang dah lvnyhvp lyis o. Nghuot laus eq dan bang gas nyamoq yoh zis gohyuk lyis dyei mes.

¹³Lhung soeu ka nyah nhuotkuk mas dang lyis lhyweq gvng mas lhyik mas nyih. Dan soeu ka yau cho mhayah luiq los das.

¹⁴Dius gas nyamoq taiq khyvlyis, kuot khyvlyis phauh shangh zis xauh das. Nyamoq yoh vvng zis yah dvyhangteh xauh kham das.

¹⁵Koh soeu ka vjangh nyang kuot cho jus ge nghamh. Nghuot laus eq joeui bos soeu ka joeui dyei zis gyo yoeus.

¹⁶Koh soeu ka nyang nhaiqyo cho lvnyap chixoeuq. Zaih soeu ka nhaiqyo cho ma chixoeuq.

¹⁷Jyoeng zis taiq soeu ka dan cho lhyi chixoeuq, ma ying kanghjyoeng ka mhuih cho lhyi dvchixoeuq.

¹⁸Moengsa yah thauh teh taiq soeu bos laus eq, joeui bos dah lhyo ka yanghzan los nhang.

¹⁹Jyoeng dah nhuotkuk gas vcaiq vto goeng joq das. Hwah dah lhyo ka dvsoq kyingh dvnghuot.

²⁰Ma gis khaujeini bang ehnyet mas mhuih cho bos. Nghuot laus eq nyenstap cho joeui da bang dah ehnyet mas gauslaus cho bos.

²¹Dan soeu ka yaukyenh shanghsenh ma xauh. Lhung soeu mha ka shanghsenh cho kyingh dvdyingh joq das.

²²YHENSAIN ka hwah soeu lhyi choqh. Nghuot laus eq nyang taiq dang lyis chank kuot soeu lhyi nyang nhaiqdoeus.

²³Zaih soeu ka seq cho lhyi samlo toh. Nghuot laus eq koh soeu ka koh cho taiq hoeuh.

²⁴Yomkat dah muhzwi bang gas guon bang duot das. Lan bang gas jons dvduot das.

²⁵Chiqh ehnyet gas dius lyis nhaiqkuk nhang. Nghuot laus eq yomdyei dang gas gausyis nhang.

²⁶Dan soeu ka nyah yhenkyoh lyis choshet. Lhung bang gas nyamoq yhenkyoh lyis cho shwih whang loh.

²⁷Lan soeu ka nyang xo zis khanhamp eq ma yoh das. Nghuot laus eq yomkat soeu ka phauh bos dah zisyos yoh das.

²⁸Dan dah cho ka kang dwis cho pheh shwih loh. Lhung cho ka shei cho pheh dvloh.