Read Achang SODANG 13 Bible Online

SODANG 13 - Achang bible

SODANG 13

¹Joeui bos dah lo gas, nyah uwus jyauh cho lhyi gyo yoeus. Nghuot laus eq jwangh soeu ka nyho yvlyis ma gyo yoeus.

²Dius gis jens gas nyamoq taiq dang phauh shangh zis xauh. Mhuih khwangh bang gas lhuotzo cho lhyi kyingh omes.

³Nyah nhuot lyis tsomh soeu ka nyah kang lhyi gomh nyeis. Nghuot laus eq nyah nhuotkuk lvm lvm haq soeu ka dyoqbis das.

⁴Lan soeu ka omes laus eq cha ma yoh das. Nghuot laus eq yomkat soeu ka nyang omes zis dvnganh yoh das.

⁵Dan soeu ka mhuih cho lhyi hoeng. Lhung soeu ka xoq phoh cho dvkuot.

⁶Dan zis gas jus cho chank soeu lhyi zungh dyei, nghuot laus eq lhung cho ka yaunos yoh bang lyis mhuk tyamp.

⁷Dvyuk yuk dis teh kuot laus eq cha ma yoh. Dvyuk yuk gas shohjyen teh kuot laus eq svsoh dis nyeis.

⁸Dis soeu ka nyang yoh ngwis yah nyah kang khyuot chah mvbeh. Shohjyen soeu ka housoeh teh yau cho ma xauh.

⁹Dan bang dah bvng zis gas bvng bvng nghuot. Nghuot laus eq lhung bang dah nyibung gas shei loh das.

¹⁰Khwank yvmvyah yau cho kyingh bweh los. Nghuot laus eq joeui dyei zis yoeus soeu ka joeui bos.

¹¹Ma jyoeng khyvlyis zisyos yoh soeu ka nyah zisyos lvnyap dyuk loh das. Nghuot laus eq yomkat zwi khank zis yah ngwis dvtsiq dvtsiq yung toh soeu ka hauh yvlyis je los nhang das.

¹²Nghamhloms zis bweh los nanh lyis ehnyet yomgyau. Nghuot laus eq omes cho jweh los lyis gauslaus, houka kang saiqzains mas dah shih zo teh nghuot.

¹³Jyauh dang lyis hoeng soeu ka yau cho xauh das. Nghuot laus eq hauh jyauh dang lyis phauh nyang soeu ka phauh shangh zis xauh das.

¹⁴Joeui bos soeu dah jyauh cho ka kang dyei. Houka dius jens lyis shei dah lhyik masyah yoh khyuot yoeus dah jeisthuq dwang teh nghuot.

¹⁵Seqgyo cho nyo soeu ka nyoqnho ngelang yoh. Lom ma luk soeu ka dyoqbis cho pheh dvloh.

¹⁶Zaih soeu khanghmuh gas nyang ma kuot shih lyis vjangh suon yoeuh. Koh soeu ka nyang koh cho phank xoeuq nyeis.

¹⁷Lhung dah loeuskyoh soeu ka yaukyenh cho she los. Nghuot laus eq wontang dah loeuskyoh soeu ka jus cho she los.

¹⁸Shuot zis soq dyei yvlyis nungsyos toh soeu ka shohjyen lha xoqphuh das. Nghuot laus eq taiq kyingh zis gyo yoeus soeu ka nyoqnho ngelang yoh das.

¹⁹Omes cho nyuk los zis gas kha iq gis! Nghuot laus eq koh bang gas ma gis cho mhayah ma mes tauh los.

²⁰Joeui bos bang yah suh e soeu ka joeui zes bos los. Koh bang dah dyenschangh jens gas dvdyoqbis loh das.

²¹Ma gis zis gas yaunos wons bang lyis chank khat nyeis. Nghuot laus eq dan bang gas vjangh shvmanh yoh.

²²Gis soeu ka nyah nyei nyet jens lyis vso toh dyei. Yaunos wons bang dah zisyos gas dan bang jyank mas jweh das.

²³Hwangh toh dah yos mas zwi lyis nyungs bang xiklyis zonoms nyoshoq yoh das laus eq lyi ma jus bang gas hauh yvlyis hwangh toh las hank lyis eq ma zwi nhang.[4]

²⁴Nyah lo jens lyis ma jyauh mhoq soeu ka nyah lo lyis hoeng. Nghuot laus eq lo lyis jyet soeu ka, ngis yoq lyis yah nyamoq lyis jyauhmhoq.

²⁵Dan soeu ka jo shoq xauh zo. Nghuot laus eq lhung soeu ka vjangh womdau shoh das.