Read Achang SODANG 15 Bible Online

SODANG 15 - Achang bible

SODANG 15

¹Noeuh nhamp zis yah phuk taiq zis gas nhaiqyo bi nhang. Dang zoeu gas nhaiqyo cho dvlhoeu thuq kat.

²Joeui bos soeu dah lhyo ka seq cho lhyi shunk toh. Koh soeu dah nhuot gas koh zis huot khyoq.

³YHENSAIN ka khalhye chamus zis dvnganh nyvng. Nyang gas gis zis yahge ma gis zis aiq ja lyis yah zungh yoeuh nyeis.

⁴Jyetdap sainhnos dang gas kang saiqzains teh kang she los. Mhuih lhyo ka dyos lyis dvnos nhang.

⁵Koh soeu ka uwus dah jyauh cho lhyi chaxwe ma nhang; Nghuot laus eq zaih soeu ka nyang taiq kyingh zis tsomh toh.

⁶Dan bang gas nyamoq nhaiqlom mas zisyos bos. Lhung bang gas yau cho kyingh dvxauh.

⁷Joeui bos dah nhuotkuk gas seq cho lhyi tyo kat. Koh soeu dah ehnyet gas housoeh ma nghuot.

⁸Lhung soeu dah phudyei gas YHENSAIN xiklyis vchoqh vlhauq nghuot. Ehnyet zungh soeu dah shvmanh dung zis gas nyah nhaiqdoeus cho dvnghuot.

⁹Lhung soeu dah cho lhyi YHENSAIN choqh. Nghuot laus eq dan cho chank xo soeu lhyi ka nyang jyet.

¹⁰Ma jus zis kuot soeu ka than than dvmdyei zis xauh das. Nyho lha jyauh zis lyis hoeng soeu ka shei das.

¹¹YHENSAIN ka shei mau mas cha bweh nyeis zis seq. YHENSAIN ka dius dah nghamh cho lhyi kha iq zes seq.

¹²Jwangh soeu ka nyang lyis soq dyei soeu lhyi ma jyet. Housoeh las nyang gas joeui bos soeu jyank masyah joeui ma sang.

¹³Ehnyet pyo lyis nyoqnho dyoeu; nghuot laus eq kukxi lhyi ehnyet yomgyau.

¹⁴Seqgyo cho bos bang gas zes xuq mes; nghuot laus eq koh bang gas koh cho yah ehnyet tap nyeis.

¹⁵Nyungs bang dah kang dwis cho ka malyenlo loeutyonh nyeis. Ehnyet pyo bang gas vjangh pwe kuot nyeis.

¹⁶YHENSAIN lhyi gyukwoms zis yah yoh dah zisyos dvmhauh gas yaukyenh zis yah nyoshoq yoh dah zisyos thoq lyis zes gis.

¹⁷Jyet zis yah anghphoq dvnyo zo das zis gas hoeng zis yah nyhuk toh noeu dvdoeu satzo das thoq lyis zes gis.

¹⁸Nhaiqlom dyis soeu ka zan goh cho lhoeu thuq, nghuot laus eq nhaiqlom xing soeu ka dyoqgoh cho doms nhang.

¹⁹Lan soeu ka dvkhauyah yau cho thungh phuh; nghuot laus eq ehnyet zungh soeu ka yau cho ma bos das.

²⁰Joeui bos dah lo gas uwus lyis gaus nhang; koh soeu ka nyah ungwes lyis ma phauh dvkuot.

²¹Koh soeu ka nyang koh yvmas pyo nyeis. Seqgyo cho bos soeu ka dan khyvlyis dvsuh e.

²²Ma xamgoh lyis nghamh toh cho dyoq loh; nghuot laus eq joeui da bang nyo lyis houka ung los.

²³Dius gas nyah shishenh yah nyang zangh dah phuk taiq dang lyis o. Nyah yoq yah phi yvlyis taiq zis gas kha iq gis!

²⁴Joeui bos bang gas shei yvpheh gyoh loh dah cho chank ma nghuot, kang yoh das cho nyhang cho loh.

²⁵YHENSAIN ka khwank soeu dah yhen lhyi mhont tyamp; nghuot laus eq nyang chauhmuh dah zisyos lyis gos toh dyei.

²⁶YHENSAIN ka lhung soeu dah nghamh cho lhyi choqh; nghuot laus eq nhaiqnyen shohgyo dah dang lyis gas nyang nhaiqdoeus.

²⁷Vmyat lyis nyoqnoq soeu ka nyah yhenbang lyis lhoeu yau. Nghuot laus eq khauwhot lyis hoeng soeu ka kang dwis das.

²⁸Dan bang gas dang ma phuk taiq shih lyis nghamh yoeuh; lhung bang gas ma gis dah dang dvhuot khyoq.

²⁹YHENSAIN ka lhung bang yah we nyeis; nghuot laus eq nyang, dan bang dah shvmanh dung dang lyis gyo yoeus dyei.

³⁰Nyoqnho dyoeu zis gas ehnyet lyis pyo nhang. Loeus gis gas shohyau lyis yanghzan nhang.

³¹Gis das xiklyis nghamh las nyho yvlyis gyo yoeus soeu ka joeui bos.

³²Jyauh cho lhyi ngoek soeu ka nyah dyos lyis dvnos nhang; nghuot laus eq taiq kyingh zis gyo yoeus soeu ka seqgyo cho yoh das.

³³Joeui omes lyis YHENSAIN lhyi gyukwoms chah, nyoqnho ngelang yoh mes lyis ehnyet nyhen mha gyoh chah.