Read Achang SODANG 16 Bible Online

SODANG 16 - Achang bible

SODANG 16

¹Dius jens gas nyamoq nghamh toeuq cho kuot toh laus eq hauh yvlyis YHENSAIN kyingh dvyoh bweh los nhang.

²Dius gas vsainnyang kuot zis dvnganh jus ge nghamh mvbeh. Nghuot laus eq YHENSAIN ka ehnyet lyis laiq yoeuh.

³Nvng cha kuot zis dvnganh YHENSAIN lhyi kyauh aq, housoeh lyis nvng nghamh toh cho ung los das.

⁴YHENSAIN ka dvnganh nyang nghamh toeuq khyvlyis kuot toh. Lhung bang lyis yangh joeng das buisnyeis kuot toh.

⁵Ehnyet mas khwank soeu khanghmuh lyis YHENSAIN choqh. Nyang gas nyamoq lyis yau ma dyei ma toh.

⁶Jyetdap sainhnos las lomluk zis yah yaunos khyuot tyamp dyei. YHENSAIN lhyi gyukwoms zis yah ma gis cho lhyi yoh jhank.

⁷Dius dvyuk nyah cho YHENSAIN lhyi nhaiqdoeus nhang lhyi ka, nyah jeswus lyis yangh nyang yah nyenstap nhang das.

⁸Dan zis yah dvmhauh yoh zis gas lyi ma jus zis yah vmyat nyoshoq yoh thoq lyis zes gis.

⁹Dius dvyuk gas nyah ehnyet mas nyah cho lhyi nghamh toeuq laus eq, YHENSAIN ka nyah beszoh lyis choshet.

¹⁰Hwankti nhuotkuk mas Mangso jyank masyah vmingh bos las nyang nghamh thyet cho lyi jus chah.

¹¹Jyoeng dah jvngshih yahge jvng gas YHENSAIN yah sen. Ihtsung mha bos dah jvngshih dvnganh jus chah.

¹²Dius dvnyau gas dan cho yah doengs nhang toh yvmvyah hwankti jens lhung khyvlyis kuot cu lhyi vchoqh vlhauq nghuot.

¹³Hwankti jens gas jyoeng dang lyis nhaiqdoeus las, nyamoq gas jus zis taiq bang lyis jyet.

¹⁴Hwankti dah nhaiqyo zis gas dvyuk yuk lyis yoh shei nhang. Nghuot laus eq joeui bos soeu ka hwankti nhaiqyo yvlyis yoh bi nhang.

¹⁵Hwankti pyo lhyi dius kang luiq. Nyang nyoqnho dyei cho ka cungh thuq zoh lyis gyoh dah maunhungh teh nghuot.

¹⁶Joeui yoh zis gas xing yoh thoq lyis kha iq zes gis! Ngwis thoq lyis seqgyo cho khyen yoeus das zis zes gis.

¹⁷Ehnyet zungh bang gas ma gis yvlyis jhank. Nyah cho lhyi tsomh soeu ka nyah kang lhyi gomh nyeis.

¹⁸Khwank zis gas dyoqbis cho dah xik pheh, lhoq lhoq teh kuot zis gas lains das cho dah xik pheh loh.

¹⁹Nhiq zaiq zis xauh bang yah dvgeh ehnyet nyhen mha gyoh nyeis zis gas, khwank bang yah dvgeh lvnyhvp gvmgoh thoq lyis zes gis.

²⁰Taiqshet yvlyis kamp gyo soeu ka ung cho yoh das. YHENSAIN lhyi loms soeu ka ngelhoq.

²¹Joeui bos soeu lhyi, Seqgyo soeu ge hoeuh. Dang mvno gyomes mvno taiqshet cho mha zes yoh jyoeuq yoeus.

²²Seqgyo cho bos soeu xiklyis hau seqgyo cho ka kang jeisthuq dwang nghuot. Koh soeu lhyi jyauh mhoq zis gas shishenh dvthank.

²³Joeui bos soeu ka nghamh yoeuh las dang taiq. Housoeh las nyang taiq dang yah zes yoh jyoeuq yoeus las dius jens zes yoh xuq.

²⁴Gyomes dang gas dyowhom mha dah dyoyhei teh nghuot las, dius jens lyis pyo nhang, yanghzan nhang.

²⁵Dius dvyuk xiklyis nyah cho ka jus ge nghamh laus eq, hauh vthang ka shei cho pheh dvloh mvbeh.

²⁶Muh zwi khank soeu dah zomes cho ka nyang lyis yomkat nhang; khasoeh ge lyis nyang yuot cho lhyi jo nhang mes.

²⁷Gywes ma tsungh bang gas gohyuk lyis nos nhang das cho xo nyeis. Nyamoq taiq dang gas nyi ngeh teh nghuot.

²⁸Nhaiqlom guih soeu ka dyoqgoh cho xo nyeis. Loeusmus soeu ka dyenschangh kau jens lyis kangh tyamp.

²⁹Lhuotzo soeu ka nyah yhenkyoh lyis mhuih las nyang lyis ma gis cho pheh shwih loh.

³⁰Nyoq nyik soeu ka guih cho khaujeini las, dang ma taiq ching soeu ka ma gis cho nghamh toeuq nyeis.

³¹Kang xing zis gas dan cho dah phauh shangh zis nghuot. Cam thyoeu zis gas phunk bos buismuk nghuot.

³²Jhen soeu ka yomsoq bos dah seqlyes thoq lyis zes gis, vsainnyang ehnyet lyis seq joeu soeu ka wus yoh zan yoeus soeu thoq lyis zes gis.

³³Doeugoh zis yah YHENSAIN dah ehnyet lyis xuq; hau nghamh thyet cho ka YHENSAIN jyank masyah nghuot.