Read Achang SODANG 17 Bible Online

SODANG 17 - Achang bible

SODANG 17

¹Dyoqgoh zis yah dvyhen gonh dyingh joq dah zonoms pwe zo das thoq lyis nyens nyens lyis yah ohlhyoq kyuk dvnhuot zo das zis gas zes gis.

²Joeui bos dah jyeidwis gas xoqphuh dah lo lyis yoh guon las vmang vnoeuh moq teh vso xauh kham das.

³Ngwis yahge xing lhyi nyi yah khyink. Nghuot laus eq YHENSAIN ka dius dah nhaiqlom lyis shi yoeuh nyeis.

⁴Ma gis zis kuot soeu ka ma jus dah nhuotkuk lyis gyo nyeis. Hwah soeu ka unglhung dah lhyo lhyi kamp gyo.

⁵Shohjyen bang lyis jwangh soeu ka nyamoq lyis gvnkhanh YHENSAIN lhyi goessang nyeis. Dvyuk yuk nyetlos nyettant dyoqbis lyis gaus soeu ka jyoengh joeng zis xauh das.

⁶Nyeilo jens gas lokhoq jens dah buismuk nghuot. Lo jens gas nyhiphoq dah nyoqnho ngelang nghuot.

⁷Dang dat cho ka koh bang yah ma phi, hwah dang gas guon soeu yah zes ma phi.

⁸Khauwhot dyei soeu ka hauh zis yah dvnganh yoh kuot, nyang kuot zis dvnganh yoh ung los, ge nghamh.

⁹Cu yvlyis khyuot dyei soeu ka jyet cho zes je los nhang. Nghuot laus eq hau cu cho lhyi taiq hoeuh soeu ka dyenschangh kau jens lyis kangh tyamp.

¹⁰Koh soeu ka lvxuk dvxo dvm yah xuq thoq lyis, joeui bos soeu ka dvlhain nyho lha jyauh zis zes yoh xuq.

¹¹Ma gis soeu ka gomloeus toq cho kyingh xo nyeis. Housoeh las hauh soeu lhyi nos nos xauh joeng das.

¹²Koh dah muh kuot las koh soeu yah xauhgoh das thoq lyis lo dyuk dah womszains yah xauhgoh das zis gas dvgis shih.

¹³Dius dvyuk gas gis yvlyis ma gis zis yah tauh dyei soeu hank laus eq, ma gis, hau ma gis zis gas nyah yhen mhayah khanhamp eq ma thuq loh.

¹⁴Dyoqgoh cho xi zis gas jeiscaink toh yvmas jeis buiq thuq los teh nghuot las, ma dyoqgoh shih lyis hauh cho no aq.

¹⁵Lhung soeu lhyi khomp soeu yahge, dan soeu lhyi dang thang thyet soeu ge, aiq yuk lyis yah YHENSAIN choqh.

¹⁶Koh soeu ka joeui ma o lha, koh soeu joeui xuq das nyhenshang nvng chamus ngwis dyei lah?

¹⁷Dyenschangh gas vjangh jyet nyeis las, yau dah buisnyeis lyis pangh das xiklyis vmang vnoeuh khoeu los.

¹⁸Seqgyo cho ma bos soeu ka, nyah yhenkyoh lyis loqbat thanghchvp toh las kham dyei.

¹⁹Yaunos lyis ngwis soeu ka dyoqgoh cho lhyi ngwis. Moengs dang taiq soeu ka dyoqbis cho lhyi xo nyeis.

²⁰Nhaiqlom guih soeu ka gis dah vyhang xo nyvng das oen ma yoh loms. Hwah dah lhyo yoh soeu ka yaukyenh cho mha lains das.

²¹Lolhung lhyi yaus kat soeu ka nyah xiklyis kukxi cho she los, koh soeu dah uwus gas gaus cho ma yoh.

²²Pyo dah nhaiqlom gas gis dah mvcheih nghuot. Yomgyau zis gas nah yom lyis nhuk loh nhang.

²³Lhung soeu ka lyi jus lyis lhoeu nhunk das zis khauwhot gauh lhom yoeus.

²⁴Seqgyo cho bos soeu joeui lhyi yoeuh tsuk toh. Nghuot laus eq koh soeu dah nyoqjeih gas dvkhauyah yoeuh nyeis.

²⁵Koh dah lo gas nyah uwus lyis nhaiqkuk cho she los dyei. Nyang lyis khoeu kat ungwes lyis nhaiqkhoh cho she los dyei.

²⁶Dan soeu lhyi yobos ma gis dyei, ehnyet zungh dah zau lyis ma gis zangh.

²⁷Seq cho bos soeu ka dang lyis zaih lha taiq. Seqgyo cho bos soeu ka ehnyet nyens nyens dvnghuot.

²⁸Koh soeu yangh samlo nyeis lyis joeui bos ge, nyang nhuot nyheih toh lyis yik ge, tsain nghamh.