Read Achang SODANG 2 Bible Online

SODANG 2 - Achang bible

SODANG 2

¹Ngah lo eh, ngos nvng lyis jyauh yvlyis xuq aq, ngos tyingtoh dang khanhamp eq vtohnyhik.

²Joeui lhyi kamp gyo las nah nhaiq mas seqgyo shoq kuot aq.

³Nghuot goeus, seq cho bos shoq sang aq. Seqgyo cho bos shoq sang aq.

⁴Hauh zis lyis ngwis xo teh xo lha, shung toh zisyos lyis phehxo teh xo aq.

⁵Housoeh kuot lyis nvng YHENSAIN lhyi gyukwoms cho dah vjyuk seqgyo los das, Mangso cho xuq yvmas ung cho yoh das.

⁶Joeui dyei soeu ka YHENSAIN nghuot. Seq cho yahge seqgyo cho ka nyah jyank masyah los.

⁷Nyang gas ehnyet zungh bang lyis pangh, kop kop toq toq suh e bang lyis gos toh dyei.

⁸Nyang gas lyi jus cho kuot bang lyis gos toh dyei, nyang lyis phauh nyang bang lyis gomh toh dyei.

⁹Housoeh nvng ngah dang gyo lyis nvng jus cho, lyi jus cho yahge yih cho lhyi seq los das. Nvng cha kuot chah yvlyis seq los das.

¹⁰Nvng joeui bos los das las, seq cho mha nvng gauslaus nyeis das.

¹¹Nvng seq cho yahge seq gyo cho ka nvng lyis gos toh dyei das.

¹²Joeui ka nvng ma jus zis kuot cho mhayah khyuot kat das. Hauh zis gas nyamoq dah dang ma yungh zis yah soe lhoeu thuq bang masyah gomh kat das.

¹³Dan dah kang dwis cho lhyi tyamp las yaunos dah mauchuotdwang mas kang dwis bang masyah eq,

¹⁴ma jus zis kuot yvmas pyo soeu, lhung cho mha gauslaus soeu masyah eq,

¹⁵guih cho chank las ma yoh loms bang masyah eq gomh dyei das.

¹⁶Joeui ka, nvng lyis wotwu dyoq dah vmesbih gas mhuih dang yah chuq shwih loh masyah khyuot das.

¹⁷Nyang gas nyah yhensain phoq lyis tyamp khoq, nyah Mangso lhyi toh dah thanghchvp lyis tohnyhik tyamp.

¹⁸Nvng nyah yhen mha loh lyis nvng gas shei das cho pheh suh loh nyeis. Houmha loh zis gas shei mau yah ni loh nyeis.

¹⁹Nyah jyank mas kwang loh bang hank khanhamp eq ma doms los lo. Nyamoq kang dwis cho pheh ma tauh los lo.

²⁰Housoeh las nvng gas dius gis dah yikhyoh chank las dan dah kang dwis cho yah kang dwis chah.

²¹Khasoeh ge lyis dan bang hauh mau mas nyeis das, koptoq bang houmha doengs joq das.

²²Nghuot laus eq Mangso ka lhung bang lyis hauh mau masyah thyuk tyamp das. Saiqzains lyis nyeisjvng masyah nuot tyamp teh yaunos wons bang lyis hauh mau masyah yoeus tyamp das.