Read Achang SODANG 20 Bible Online

SODANG 20 - Achang bible

SODANG 20

¹Yhei shuk lais cho ka nvng lyis kaiq hoeu lha koh nhang nyeis. Yhei yet lains bat yenh zis gas koh cho nghuot.

²Nyings dah khangkhyi nyings teh nhaiqyo dah hwankti lhyi gyuk aq. Nyang lyis nhaiqyo nhang soeu ka nyah gungs lyis sat shei cho nghuot.

³Koh soeu hank laus eq phyengoh cho lhyi seq xi kat. Housoeh ma kuot bang gas nhaiqbos.

⁴Danh phuk nyos lyis khont ma mes zwi dah danh sain ka, jyo yhomh nyos lyis cha eq ma xauh yhomh das.

⁵Dius dah nghamh cho ka nauh dah jeis dwang khau mha dah jeis teh nghuot las, ungkhau mha joeui bos soeu ka hauh yvlyis yoh she thuq yoeus.

⁶Dius yuk khanghmuh gas nyah dang kha iq jings cho yahge wontang cho lhyi tsain taiq kyoh nyeis laus eq jyoengh housoeh teh soeu lhyi hank yoh xo nyvng lah?

⁷Ehnyet dan las jyoeng muh kuot dah uwus dah yikhyoh chank dah lo jens gas ngelhoq.

⁸Soetuon tank mas tsung toh dah hwankti ka ma gis yvlyis nyvng yah dvyih nyang seq.

⁹Dvyuk yuk gas, Ngah sohseq ehnyet gas shang shang nghuot, ngos mas yobos ma bos, ge hank yoh taiq lah?

¹⁰Ma jus dah jvng chi bang lyis YHENSAIN choqh.

¹¹Loshang yangh, nyang kuot muh yah nyang khasoeh teh soeu nghuot yvlyis seq nhang nyeis. Nyang ehnyet zungh soeu, gis soeu nghuot yvlyis nvng yoh yoeuh thuq kat.

¹²Hauh YHENSAIN ka yah xiklyis nyvng das nyoqjeih eq, xauhgyo das no eq tsain dyei toh.

¹³Shishenh lyis yhet zis yah kyingh thank loh nhang lhyi nyungs loh das, muh yomkat zwi aq, hauh uhlyis nvng jo jo xauh zo das.

¹⁴Kaih wis soeu ka, kaih hu changh ge vjangh lop nyeis laus eq, hauh thang lhyi, Kha iq nhamp khyvlyis yoh dyet khyoq, ge moengs nyeis.

¹⁵Nvng cha taiq nyeis cho nvng seq lyis gas, xing yahge pvtvmya thoq lyis zes phauhdap cho lhyi nvng yoh toh.

¹⁶Lvbaus xiklyis jyen bos womh kham dah koh soeu hank laus eq, nyah zisyos lyis tank toh vyhang khyvlyis khoeuq toh chah.

¹⁷Ma dan khyvlyis yoh dah vyhang mha nvng gausyis nyeis zis gas, chau nghamh dah zonoms teh nghuot laus eq, dvsoq lyis hauh zis gas sihsho dvnhuot ngoms toh teh nghuot das.

¹⁸Gis dah joeui dyei dang lyis lhom yoeus aq, nvng ung los das. Jes dah sont cho ma bos zis moeng vloh zan.

¹⁹Loeusmus bang gas nghop toh cho lhyi khanhamp eq ma yoh zauh toh. Dang nyo taiq bang yah vzomh.

²⁰Nah ungwes uwus lyis nhoengh lyis, nah kang ka soeng soeng noq yvmas shei dah nyibung teh thank tyamp das.

²¹Nah zisyos lyis nvng lwis lwis yah mvno xauh yoeus mvno zisyos houka nah xiklyis vkyuh yomh loh.

²²Nvng lyis shuot dah yobos xiklyis nvnyang lvto vphuk. YHENSAIN lhyi loms aq, housoeh lyis nyang hauh cho lhyi jyoeng khyvlyis kuot dyei das.

²³YHENSAIN ka ma jus dah jvng chi bang lyis hoeng.

²⁴Hauh YHENSAIN ka yah cho lhyi toeuq toh dyei goeus. Housoeh lyis dius gas nyah kang dwis cho khapheh xoeu toh yvlyis khasoeh seqgyo das lah?

²⁵Mangso lhyi ma nyhen toh shih lyis zaih zis yah nghamh yoeuh aq, housoeh ma nghuot lyis nvng auhuiq das.

²⁶Joeui bos dah hwankti ka ma shop muh kuot nyeis soeu lyis chank khyang thuq las nyang lyis nhaiq ma nyen lo yobos dyei das.

²⁷YHENSAIN ka namoq lyis seq cho yahge sohseq ehnyet kat dyei toh. Yang gas yvnyang gungs lyis ma yoh gos shung toh.

²⁸Hwankti ka dan cho, yih cho yahge lyi jus cho yah guon nyeis dvchank gas nyah hwankti tank goeng joq das.

²⁹Loyvm jens dah yom lyis yoeuh las gaus, cam thyoeu lha nyenhkyi bos goeus bang lyis phauh nyang.

³⁰Dvlhain lhain yang yaukyenh shanghsenh cho xauh ku khau yah yang kuot nyeis dah wotwu lyis yoh thaiq yoeus.