Read Achang SODANG 21 Bible Online

SODANG 21 - Achang bible

SODANG 21

¹YHENSAIN ka jeislo lvng lyis nyah jeis khyoh mas lwis lwis shoq kat teh hwankti dah nghamh cho lhyi eq lwis lwis yoh joeu dyei.

²Nvng kuot muh dvnganh jus ge nvng nghamh gis laus eq YHENSAIN ka nvng nghamh cho lhyi kyink yoeuh nyeis cho soh aq.

³Jus las yih dah muh lyis kuot aq. Houka phudyei chi e dyei thoq lyis YHENSAIN lhyi nhaiqdoeus nhang.

⁴Lhung bang dah lhoq lhoq teh khwank ehnyet gas nyamoq lyis joeu nyeis. Houka yaunos nghuot.

⁵Muh lyis zaih lha kuot lyis nvng nyoshoq yoh los das. Nyo gyis kuot lyis gas nvng khanhamp eq ma luk zo das.

⁶Nvng ma dan khyvlyis yoh dah zisyos gas ma nyangh lyis dyuk loh das laus eq, hauh zis ma dyuk shih lyis hauh zisyos gas nvng lyis shei das yvpheh shwih loh das.

⁷Lhung bang gas nyamoq dah thyoq zo, bat goh sat goh muh mas shei dyuk das. Nyamoq gas jus cho chank das zis ngoek tyamp.

⁸Yobos bos bang gas guih cho mha suh e lha, yobos ma bos bang gas jus dah muh kuot nyeis.

⁹Lop dah yhensain nyhiq yah dvgeh yhen mha nyeis das thoq lyis, yhenkhung thoq mas loh nyeis zis gas zes gis.

¹⁰Lhung bang gas ma gis yvlyis vjangh yah jeis soeh shet nyeis. Nyamoq gas hank thoq mas eq nhaiqnyen ehnyet ma bos.

¹¹Khwank soeu joeng zis xauh uhlyis joeui ma bos soeu yangh hou mhayah yoh xuq yoeus. Joeui bos soeu ka nyang xuq yvmvyah joeui yoh los.

¹²Dan dah Mangso ka lhung soeu dah yhen mha cha bweh zis seq nyeis las, nyang gas lhung bang lyis mhuk tyamp das.

¹³Shohjyen soeu kaiq sang yvlyis nvng no cauq toh lyis gas nvng lyis pangh das xiklyis dung dang lyis hank eq gyo dyei das zis ma nghuot.

¹⁴Dvyuk yuk nvng yah nhaiqyo goh lyis, loq sop jyungshuk gvng mas nyang lyis nhaiqyo gyoh nhang das.

¹⁵Lyi jus cho chank kuot lyis dius gis jens gaus nyeis laus eq, ma gis bang xiklyis gas ehnyet thank cho bweh los.

¹⁶Seq nghamh ehnyet bos joq yvmvyah whang loh bang hank lyis laus eq shei zau langh nyeis.

¹⁷Zvbiq yahge nghamh dah zonoms mas pyo nyeis cho ka nvng lyis khanhamp eq dis los nhang das zis ma nghuot.

¹⁸Lhung bang yah dius gis jens lyis bweh nhang dah shanghsenh yvmas nyamoq nyang doms xauh kham nyeis.

¹⁹Lop las zoeu dah yhensain nyhiq yah nyeis das thoq lyis sihmuis yos mas nyeis das zis gas zes gis.

²⁰Joeui bos bang gas nyeisgis yaplhoq nyeis laus eq koh bang gas nyamoq yoh xo dah ngwis lyis lvnyap yhung tangh tyamp.

²¹Nhaiqnyen zis yah ehnyet dan nyeis aq, housoeh lyis nvng kang xing shoq xauh nyeis das. Gohyhamh bang eq nvng lyis phauh nyang las lyi bos khyvlyis tsoq goh zomhgoh das.

²²Yik dah jeszau zains gas yombos goeng dah jesdvp khyoq toh wus lyis yoh yoeus las nyamoq khau nges nyeis dah ciank lyis yoh thyoq tyamp.

²³Nvng yaukyenh shanghsenh masyah luiq mes lyis, nvng taiq dang lyis zaih aq.

²⁴Zes nghuot teh soeu dvyuk, ngos lyis chixoeuq aq. Housoeh lyis ngos nvng lyis lhoq lhoq teh khwank zis yah gohyuk xiklyis ma bos daq nghamh dyei soeu lhyi chixoeuq das.

²⁵Muh zwi das zis ngoek dah lan bang gas nyamoq nyang gungs lyis sat bang nghuot.

²⁶Nyamoq kuot cho dvnganh mas nyamoq cha xauh yoeus das zis lyis kyingh nghamh nyeis. Dan soeu ka magons magoh yoh dyei gvm nyeis.

²⁷YHENSAIN ka lhung bang dah phudyei lyis hoeng. Hauh thoq lyis lhung dah ehnyet wotwu yah phudyei lyis zes hoeng.

²⁸Ma ying kanghjyoeng lhyi hank ma jingh laus eq, cho khvt khanghmuh lyis bvng bvng nghamh thuq los soeu dah dang lyis gas yoh lhom yoeus.

²⁹Dan bang gas nyamoq dah gungs lyis yoh loms. Lhung bang gas nyamoq gungs lyis yungh shoq vguons kuot nyeis.

³⁰YHENSAIN nvng lyis soetuon nghuot lyis, nah joeui kha iq yik, kha iq noq laus eq houka chah vkyuh ma bos.

³¹Moengzan das xiklyis jes nyang jens cicont yoh sont toh laus eq, ung cho yoh nhang zis gas YHENSAIN dvnghuot.