Read Achang SODANG 22 Bible Online

SODANG 22 - Achang bible

SODANG 22

¹Nyings gis yahge zisyos yoh cho mha nvng o zis khyen yoeus das lyis nyings gis khyen yoeus aq.

²Dis soeu yahge nyungs soeu lhyi gvnkhanh toh zis gas YHENSAIN dvyuk kyingh nghuot. Houka nyah aiq yuk mas doeusgoh cho nghuot.

³Dolhain bang gas jweh los das yaukyenh cho lhyi uhlhomh nyvng las hauh yvlyis jhank loh. Ma nghamh yoeuh soeu ka hauh yaukyenh yvmas wvng loh thang lhyi auhuiq nyeis.

⁴YHENSAIN dah domsyos gyo nyeis aq, ehnyet nyhen mha gyoh aq, housoeh lyis zisyos nyoqnho ngelang yahge kang xing cho yoh das.

⁵Nvng nah kang lhyi jyet nghuot lyis lhung soeu lhyi nyhik das nyhenshang cho chank yah thung toh dah lhyik masyah we loh aq.

⁶Loshang jens lhyi nyamoq khasoeh chank gis cho mha jyauh aq, housoeh lyis nyamoq gas dvcaiq gonh cho ma whang das.

⁷Shohjyen bang gas dis bang dah jons tsain nghuot. Jyeih yoeus soeu ka jyeih dyei soeu dah jons nghuot.

⁸Nvng lyi ma jus dah jyo nyau khyoq lyis thyoqpi cho yuk thuq los das. Hauh uhlyis gohyhamh lyis nhiq zaiq zo cho thank tyamp das.

⁹Magons magoh dyei gvm aq, nah zonoms shohjyen bang lyis gvm aq. Housoeh lyis hauh gvng mas nvng shvmanh jyehjuh xauh kham yoeus das.

¹⁰Zes nghuot teh kuot soeu lhyi khat tyamp aq. Housoeh lyis houmha phyen-goh, dyoqgoh cho, chaxwe ma nhang nyings yoeus cho ma bos lo das.

¹¹Lhoqshang ehnyet yah noeuh nhamp dang lyis jyet nghuot lyis hwankti nah dyenschangh duot das.

¹²Hwah bang dah dang lyis taiq thuq khyvlyis YHENSAIN ka jyoeng cho lhyi goeng joq nhang.

¹³Lan bang gas yhen mha kyingh nyeis las, nyamoq nghe pheh thuq lyis, khangkhyi dyvm ngat das ge taiq.

¹⁴Nyi shuot lvng shuot muh gas lhyik nghuot. YHENSAIN nhaiqlom tsoeu zis xauh bang hauh lhyik mas nyih joq.

¹⁵Loshang jens gas soenghchoenk nyang masoh mathamh ma zaih dah muh tsain kuot laus eq wuseh yah lyuk las jyauh zis gas nyamoq lyis gis dah wotwu yoh nhang.

¹⁶Nvng zisyos nyo los das nyhenshang nyungs bang lyis zaiq las dis bang lyis jyungshuk dyei lyis gas nvng nyungs loh das.

¹⁷Joeui bos bang taiq toh zis ngos nvng lyis jyauh bah gyo yoeus aq. Nyamoq jyauh toh dang xuq aq.

¹⁸Hauh jyauh dang lyis nvng yoh comh las yoh yhung lhyi yoh gausyis das.

¹⁹Ngos nvng lyis YHENSAIN mha loms toh nhang mes; housoeh las gvshih ngos nvng lyis taiq kyoh das.

²⁰Seq cho yahge gis dah joeui dyei dang somhci ngos nah xiklyis lhaih toh dyei.

²¹Houka jyoeng dang dah cho lhyi top seqgyo shoq nvng lyis jyauh das. Housoeh hauh zis nvng lyis xo nhang lhyi, nvng gas jus cho yoh chi los das.

²²Nvng yoh kuot dah oen lha shohjyen soeu lhyi joeui yah vzaiq; soetuon jang mas yaukyenh shanghsenh xauh nyeis soeu lhyi vzaiq.

²³YHENSAIN ka nyamoq dah soe lyis bos taiq dyei das; nyamoq lyis kyuk tant bang lyis eq nyang kyuk tant das.

²⁴Nhaiqlom gywes las nhaiqlom tsoeu soeu yah dyenschangh vkuot.

²⁵Nvng nyamoq dah wotwu lyis xuq goeus ya, nah wotwu lyis ma yoh soq lo das.

²⁶Dvyuk yuk dah jyen lhyi kham das zis dangthoengh vtoh.

²⁷Nvng hauh jyen ma yoh cap lyis nah yhetyos lyis yangh nyamoq yoeus tyamp dyei das.

²⁸Nah phauh thyeih moq yoh sain toh las cuk toh dah yoskyoh zains vcheh.

²⁹Ngos lyis muh zwi yvmas kank kat soeu chixoeuq aq. Houlhyi hwankti jens dah buisnoms bweh mon zis yahge gohyhamh thoq lyis zes gis soeu ngos nvng lyis chixoeuq das.