Read Achang SODANG 24 Bible Online

SODANG 24 - Achang bible

SODANG 24

¹Ma gis bang lyis vyoeuh noh, nyamoq yah dyenschangh kuot das zis yom vkat.

²Nyamoq nghamh cho dvnganh gas yaukyenh shanghsenh cho bweh nhang. Lhain khanghmuh nyamoq dah nhuot haq lyis dvyuk yuk nos loh das.

³Yhenbang lyis gas joeui yahge seqgyo cho mha vpom xi lha kuot toh.

⁴Seq cho lhyi yhung lha yvp mas phauhdap dah kyahsoe zisyos yah tyink toh.

⁵Joeui bos zis gas yombos cho thoq lyis zes gis; nghuot goeus, seq cho ka yombos thoq lyis zes yhaugyen.

⁶Taiq lyis, nvng moeng ma zan shih lyis jeszan joeui vlhomuh toeuq chah. Nvng gis dah joeui da cho mvno zes xauh yoeus mvno jes ung das cho zes thuq los.

⁷Joeui dang gas koh soeu xiklyis seqgyo bangh das xiklyis sunk noq. Nyang gas yhaugyen muh lyis xamgoh yvmas taiq kyoh das cho cha ma bos.

⁸Nvng vjangh ma gis khyvlyis joeui da lyis, yaukyenh cho kuot thuq kat soeu teh, ma gis cho mha nyings hoeuh das.

⁹Koh soeu nghamh thuq kat dah cvvq cho cha eq yaunos yah sen cho nghuot. Nyang cha ma yoh zis gohyuk lyis seq nyhap soeu lhyi dius jens hoeng.

¹⁰Nvng shanghsenh nyeis uhlyis yomnhuk lyis gas, nvng gas jyoengh yomnhuk soeu nghuot.

¹¹Lyi ma jus khyvlyis sat xauh bah ge soeu lhyi khyuot das xiklyis vsheq nyeis.

¹²Nvng gas, Haih cho nvng yah cha sen lah, ge gis taiq laus eq Mangso ka nah wotwu lyis seq nyeis zis yah soetuon nyeis. Nyang gas nvng lyis yoeuh tsuk toh yvmvyah nyang seq nyeis. Housoeh nyang gas nvng kuot dah muhzoh yah dvyhangteh nvng lyis jyungshuk dyei das.

¹³Lo eh, dyoyhei ka gis yvmvyah shuk aq. Dyotvp masyah yaus gyoh dah dyoyhei ka lhyo mha chau teh,

¹⁴joeui ka dyos xiklyis gis yvlyis nvng seq. Joeui lhyi xo yung toh aq, houlhyi jweh los das nah cho ung los das.

¹⁵Dan soeu lhyi thyoq, nghuot ya nyah yhen lhyi lhuot yoeus das ge cvvq dah lhung soeu teh vkuot.

¹⁶Dan soeu ka khanyhoq lhain lains laus eq nyang vjangh doms yoh toq. Nghuot laus eq shanghsenh cho yah lhung bang lyis mhont das.

¹⁷Nah jeswus shanghsenh loh lyis nvng vyoeuh gaus. Nyang thungh lains lyis vyoeuh pyo.

¹⁸Nvng gas nyah gvng mas gaus nyeis nghuot lyis YHENSAIN ka hauh yvlyis seq dyei las ma yoeuh o. Housoeh lyis Mangso nyang lyis yau ma dyei mvbeh.

¹⁹Ma gis zis kuot bang gvng mas nvng ehnyet vnyo, nyamoq lyis vyoeuh noh.

²⁰Ma gis soeu xiklyis thang pheh nghamhloms cho cha ma bos. Lhung soeu ka muot sat dah nyilhyam teh shei das.

²¹Ngah lo eh, YHENSAIN lhyi gyukwoms nyeis aq. Hwankti lhyi chunghtoq aq, Nyamoq lyis tyixo lha phanhlose kuot bang yah vzomh.

²²Housoeh teh bang gas dvdvm lyis yoh dyoqbis loh. Mangso, nghuot ya hau hwankti ka hau shanghsenh cho yoh bweh nhang yvlyis nvng soh nyeis lah?

²³Joeui bos bang hai cho lhyi eq tsain taiq toh. Soetuon soeu nyoqnho khyen zis gas shuot cho nghuot.

²⁴Nyang gas yobos yoh soeu lhyi yobos ma bos, ge thyet lyis gas yuk khanghmuh nyang lyis nhoengh las tsain hoeng das.

²⁵Yobos bos bang lyis soetuon lha yobos dyei dah soetuon soeu ka nyeisgis yaplhoq las nyings gis hoeuh zis yah yoh gaus das.

²⁶Jus dah dang phuk taiq zis gas Jyoeng dah buisnoms kuot vlho nghuot.

²⁷Nah yos nah danh muh dye cvvq las yoh loms dah kang khoeu muh ma yoh dvchank nah yhenkhung yoskhyangh vkuot.

²⁸Chah zis ma bos shohyos gungs mas dvyuk yuk cho kanghjyoeng vkat. Nyah cho yah sen lha shwih whang loh das dang vtaiq.

²⁹Nyamoq ngos lyis kuot teh ngos nyamoq lyis kuot das; ngos nyamoq lyis lvto phuk das oen vsang.

³⁰Ngos gas koh las lan soeu dah danh yahge zvbiq khyam cho suh lai loh.

³¹Hauh yvmas zoeu yuk gyomh las dvkhauyah nyoq yah nghop toh; hauh yvlyis kyamp lhaink toh dah luk ciank eq dyoq gyoh joq.

³²Ngos hauh zis yoeuh las nghamh suon yoeuh zis yah nyvng cho masyah xauh xuq zis dvja bos.

³³Dvxa yhet aq, vlhomuh dvsoq no las dvxa yhet aq, loqlom las dvxa no yoeus aq.

³⁴Nghuot laus eq nvng yhet pyo nyeis uhlyis shohjyen zis gas kyonhkhyi chi dah khyanktau teh, nah jyank mas dyvm jweh los das.