Read Achang SODANG 25 Bible Online

SODANG 25 - Achang bible

SODANG 25

¹Haih zis gas Yuda hwankti Hezekia dah yhen khyam mha bang yoeuh lhaih toh, Solomon dah gohtoeu sodang tsain nghuot.

²Mangso yah nghop shung toh dyei yvmvyah ngamoq nyang lyis chungh. Hwankti jens taiq phui dyei yvmvyah nyamoq lyis chungh.

³Maukhung ka nyhang lha, nvmukdra jeis gas nauh teh, hwankti dah nghamh cho yahge nghamh yoeuh cho lhyi yang ma yoh thoq seq yvmvyah yang hauh yvlyis khanhamp eq ma yoh seq.

⁴Ngwis mas nyop yoeus tyamp thang lhyi ngwis shonh soeu ka yungh dah vyhang yoh.

⁵Hwankti yahge nyah vtsuya masyah ma gis dah joeui dyei bang lyis yoeus tyamp lyis nyah dah guon cho ka lyi jus nghuot ge hoeuh das.

⁶Nvng hwankti xikkhonh mas yap uhlyis nyang nhaiq wvng shoq yhaugyen soeu guons vkuot.

⁷Nah joqyos lyis zes yhaugyen soeu lhyi dyei das nyhenshang taiq zis xauh thoq lyis, zes nyhang vkant mas doq das xiklyis taiq zis xauh cho ka zes gis.

⁸Nvng dvja ja bweh yvlyis nyvng lyis yungh lvnyap vloh tsung. Thang pheh gohyuk nvng shuot cho kanghjyoeng kat lyis nvng khasoeh kuot das oen lah?

⁹Nvng yahge nah yhenkyoh jo mas ma huq cho bos lyis hauh yvlyis nah aiq yuk jo mas mehoq shih tamp las zauh toh gis cho cha lhyi eq vphank xoeuq.

¹⁰Ma nghuot lyis gas nvng ma yoh zauh toh cho lhyi yuk khanghmuh seq loh das zis yahge nvng xoqphuh yvlyis khanhamp eq yoh tohnyhik lo das zis ma nghuot.

¹¹Gis dah nghamh thuq cho lhyi vlhomuh yoh phui kyoh zis gas ngwis mas xing shauq toh dah vkhyoh yah doeusgoh.

¹²Gyo yoeus mes soeu lhyi thungh phuh ku soeu khyvlyis taiq kyingh zaih nhang zis gas, xing loqkyop yah eq, xing gyingh yah kuot dah phauhdap luk thoq lyis zes phauh.

¹³Gywes nyeis dah jyo yhomh nyos lyis jyamh dah jeis gas yom huiq nhang teh, wontang dah lvgyo gas nyang lyis nhang soeu xiklyis yom huiq nhang nyeis.

¹⁴Dyei das ge dangthoengh toh las khanhamp eq ma dyei bang gas mau ma bos dah jyommauh yahge lyeis teh tsain nghuot.

¹⁵Ehnyet xing xing yah khyoeuq dang taiq zis gas goeng dah thoenkgus jesdvp lyis yoh thyoq zis yahge mungh zau jens lyis yangh yoh loms los nhang.

¹⁶Dyoyhei lyis nvng chah nyhoq masyah jyeq las khanhamp eq vshuk, nyo shuk lyis duk das.

¹⁷Nah yhenkyoh yhen mha dvsoq soq lyis vlamh, nyang nvng lyis yoeuh nghoengh las hoeng das.

¹⁸Ma jyoeng khyvlyis kauq cho ka yoh shei nhang dah sham, mvngkang yahge chuon dah nyo teh nghuot.

¹⁹Yaukyenh uhlyis ma yoh loms soeu lhyi nges zis gas, lvvh dah zwis yah lhyih teh, nghuot ya khyei dyoq soeu suh teh nghuot.

²⁰Yomgyau soeu lhyi lvkhyank kat soeu ka ngamh nyeih lyis dyi khyuot tyamp dyei soeu, dvm mas coh juot dyei soeu teh nghuot.

²¹Nah jeswus yuot lyis tsoh aq, shet lyis jeis gvmshuk aq.

²²Nvng gas nyang lyis nyoq ngeh xoqphuh nhang lha, YHENSAIN nvng lyis phauh shangh das.

²³Mautsung lyeis mas mau bos los teh, loeusmus zis gas nhaiqyo cho bweh los nhang.

²⁴Lop dah yhensain nyhiq yah yhen mha dvgeh nyeis das thoq lyis yhenkhung mha loh nyeis das zis zes gis.

²⁵We mau masyah nyangh shoq langh goeus dah gaus phoh loeus xauhgyo zis gas kyuk zis yahge jeis shet uhlyis jeisjyamh dvkom xauh shuk teh nghuot.

²⁶Dius gis gas ma gis soeu o khyvlyis chank dyei zis nyvng lyis, ma lhoq dah jeisthuq dwang, nghuot ya nyonoq bos dah jeisdwang lyis soh nhang.

²⁷Dyoyhei nyo shuk zis gas nah xiklyis ma gis teh nyo khwank zis gas nah xiklyis ma gis.

²⁸Nvng nhaiqyo mes yvlyis ma yoh joeu lyis, nvng gas jeswus lyis ma yoh kyamp gos toh wusciank ma bos dah wus teh nghuot.