Read Achang SODANG 26 Bible Online

SODANG 26 - Achang bible

SODANG 26

¹Koh soeu lhyi chungh zis gas ma doeus. Houka gywes nyos lyis gyu gyoh las jyo yhomh nyos lyis mau wus teh nghuot.

²Nhoengh dang gas ma zangh mon soeu lyis gas ma zangh. Houka khanhamp eq ma no lo dang yenh dah mau dang nghoq jens teh nghuot.

³Nyang lyis lvxuk yah xuk chah, mauhlyihzoe lyis lungthungh kat chah, houyah dvyhangteh koh soeu lhyi lyuk chah.

⁴Vjyuk ma bos dah nyeidang lyis nvng phuk taiq nghuot lyis nvng eq hau nyei soeu teh vjyuk ma bos soeu duot nyeis.

⁵Vjyuk ma bos dah nyeidang lyis vjyuk ma bos khyvlyis phuk taiq aq. Hauh uhlyis nyei soeu ka nyang nghamh khyvlyis ma nghuot yvlyis nyang seq los das.

⁶Nvng koh soeu lhyi yah dang tying kat zis gas, nah khyei lhyi thyet tyamp zis yah doeusgoh, nvng gas shanghsenh cho dung yoeus zis dvnghuot.

⁷Khyei dyoq soeu cho ma yoh suh teh koh soeu eq sodang ma seq taiq.

⁸Bang soeu dvyuk yuk lyis chungh zis gas panh mas lukgoq twih tap zis yah dvyhangteh nghuot.

⁹Koh soeu joeui bos soeu dah sangkhyangh taiq zis gas, yhei yet soeu nyah loq mas zoeu phe soeu teh nghuot yvlyis soh nhang.

¹⁰Koh soeu yahge yhei pauhzoe lyis mvgon uhkung lhung soeu ka hau muh yah sen bang dvnganh lyis nos nhang nyeis.[6]

¹¹Lvkhuih gas nyang duk toh yvlyis doms zo teh koh soeu ka nyah dah koh muh lyis doms kuot nyeis.

¹²Joeui ma bos nyeis laus eq, joeui bos ge nghamhzo soeu thoq lyis koh thank soeu ka gis shih.

¹³Lan soeu ka yhen mhayah chamus ma thuq yenh? Nyang cha lhyi gyuk nyeis? Khangkhyi lhyi paq!

¹⁴Khomh gas nyah khomhtank mas lhain nyeis teh, lan soeu ka nyah yhetyos mas phanh nyeis.

¹⁵Dius dvyhamh sunk lan las nyamoq dah nhuot khau mha zonoms kat das zis yangh ma mes.

¹⁶Lan soeu ka, nyamoq jus dah nghamh cho lhyi kanghjyoeng yah yoh taiq kyoh bang nyhet yuk thoq lyis joeui zes bos ge nghamhzo das.

¹⁷Vsainnyang muh yah ma sen, dyoqgoh yvmas nhunk soeu ka, cho pheh thuq las lvkhuih no lyis lang dyei zis yah doeusgoh.

¹⁸Dius dvyuk gas gohtoeu dvyuk lyis mhuih zo lho lha zeh zis dvnghuot ge soeu ka, yoh shei nhang dah kyonhkhyi yah lhoeu dah huonh soeu yah doeusgoh.

²⁰Thangh ma bos lyis nyi shei loh, khyangh ma taiq lyis dyoqgoh cho ma bos.

²¹Xweh gas nyijyenh lyis duk los nhang lha, thangh yah nyi duk nyeis nhang teh soe lhoq thuq mes bang gas phyen-goh dang lyis tsoq taiq nhang nyeis.

²²Loeusmus dang gas wheikhuiq bos las, yang hauh zis lyis kha iq gyo mes nyeis lah!

²³Ma gis dah nghamh yvlyis nghop toh dah dang chau ka phauh ma dap dah tsoh auh mas ngwis nyop yah shauq toh zis yah doeusgoh.

²⁴Gis guons kuot dah ehnyet bos soeu ka jyoeuq mhuih dang dah nungsthank mas nyah dah hoeng ehnyet lyis nghop toh.

²⁵Hauh dang gas chau laus eq nyang lyis vjingh: khasoeh ge lyis nyah ehnyet mas hoeng zis yah dyingh muis joq.

²⁶Nyang nyah hoeng ehnyet lyis vguons kuot toh laus eq nyang kuot dah ma gis muh lyis yuk khanghmuh nyvng das.

²⁷Gohyuk xiklyis dwang doeu soeu ka nyang doeu dwang mas nyang gyoms das. Kvkhyot khyot das khyvlyis kuot xi soeu ka nyang hauh yvmas thungh thyi zis xauh das.

²⁸Hwah dang yah dvyuk yuk lyis nos nhang mes lyis, nvng gas nyang lyis hoeng nyeis goeus. Gis guons kuot dah dang gas dyoqbis tyamp masyah lai las gohtoeu cha ma yoh bweh nhang.