Read Achang SODANG 27 Bible Online

SODANG 27 - Achang bible

SODANG 27

¹Dvsoq lyis yangh cha bweh das zis nvng ma seq yvmvyah phvnaq nyeihyo xiklyis khanhamp eq vmoengs.

²Gohyuk nvng lyis chungh bas jungh, nvng nah nhuot yah nvnyang vchungh zo. Gohyuk yah nvng lyis chungh bas jungh; nah nhuotkuk yah nvnyang vphau zo, lvbaus yah nvng lyis chungh bas jungh.

³Luk gas lyei, sihsho eq jvngnyoq nang. Nghuot laus eq koh soeu lhoeu thuq kat dah soe ka hau aiq ja thoq lyis zes lyei.

⁴Nhaiqyo zis gas lhoeng lha yoh thyoqpi laus eq, noh cho dah thyoqpi zis gas ma yoh byi shoq zes xunghxent.

⁵Dvyuk yuk lyis bvng bvng soq dyei zis gas, Haih soeu ngah thoq mas gis dah ehnyet cha ma bos, ge nghamh nhang das thoq lyis zes gis.

⁶Buisnoms gas nvng lyis nos nhang laus eq nah thoq mas gis ehnyet bos. Nghuot laus eq jeswus nah kvtoq loq gaiq lyis hauh yvlyis zaih aq.

⁷Nvng zos jo joq lyis dyoyhei lyis yangh ma mes yoeuh laus eq, yuot los lyis khoh dah zonoms yangh chau joq.

⁸Yhen mhayah we pheh gyung suh loh soeu ka, nyah sot masyah dang thuq loh dah nghoq teh nghuot.

⁹Xangh coeu yahge xangh shom ka nvng lyis ehnyet yoh pyo nhang laus eq, yaukyenh shanghsenh cho ka nah ehnyet nyenstap cho lhyi thyoq tyamp dyei.

¹⁰Nah buisnoms yahge nah uwus dah buisnoms jens lyis vtohnyhik. Nvng yaukyenh zis xauh lyis nvng lyis pangh das xiklyis nah vmang vnoeuh jyank mas vloh sang. Ni nvm mas dah nah yhenkyoh gas we nyeis dah nah vmang vnoeuh thoq lyis zes yoh pangh.

¹¹Lo eh, joeui bos aq; housoeh lyis ngos yoh gaus das. Ngos lyis yobos xo soeu hank lyis laus eq ngos yoh phuk taiq das.

¹²Dolhain bang gas jweh los das yaukyenh cho lhyi uhlhomh seq las jhank loh laus eq. Joeui ma bos soeu ka houmha wvng loh las thang pheh dvauhuiq.

¹³Lvbaus xiklyis jyen kham soeu hank laus eq, nhaiq ma bos las jyen doms yoh cap das nyhenshang nyang yoh vyhang lhyi tank toh nhang gis.

¹⁴Nvpsangh noq yah nah dyenschangh lyis kaiq jeshuh zis yah nhauh toq zis gas nyang lyis nhoengh zis yah dvyhangteh dvnghuot.

¹⁵Lop las zoeu dah yhensain nyhiq gas, mau gis wus nyeih lyis ma dyet lo gyoh dah mau teh nghuot.

¹⁶Nvng, nyang lyis khasoeh yoh sam nhang das lah? Nvng gas lyeis lyis tomp toh ku lah? Nghuot ya coeu lyis tsop toh das zis yomkat ku lah?

¹⁷Thyeq lyis thyeq yah yoh swih teh, dius dah seq cho lhyi nyang changh nyang masyah yoh xuq goh.

¹⁸Maiphang zains dyangh kat aq, housoeh lyis maiphang shih xauh zo das. Nyah yhensain lhyi zungh dah jyeidwis gis gas nyoqnho dyei zis xauh das.

¹⁹Jeis mas nvng nyvng siyet gas nah nyoqnho nghuot; nah ehnyet mas nvng yoh nyvng dah siyet gas nvnyang nghuot.

²⁰Dius dah omes cho ka shei mau teh nghuot las, houmha vjangh yah wvng shih das joqyos nyoshoq bos.

²¹Ngwis yahge xing lhyi nyi yah kyink teh, dius lyis gas chungh dah dang yah kyink yoeuh.

²²Nvng koh soeu lhyi shei das shoq bat laus eq nyah dah koh ehnyet lyis ma yoh bat thuq tyamp dyei.

²³Nah yvng yahge gaunyhauq phung jens dah cho vlhomuh seq toh aq. Nvng hauh yvlyis zaih lha nyhoeu tsoh aq.

²⁴Khasoeh ge lyis zisyos gas vjangh ma yoh joq. Dius nyau jens yangh vcaiq vto ma yoh goeng joq.

²⁵Nvng noeu mhanh dye yet thang lhyi, mhanh vsaiq doms yuk los nyeis lyis langlyamh mas dah mhanh yet yoeus.

²⁶Nvng nah yvng jens masyah yvng mauh yah dyimis yoh kuot yoeus; nah shvbeq dvkhamh ungh dah ngwis yah maunyeis xauh wis yoeus.

²⁷Nyet dah shvbeq masyah nvng yahge nah yhenbang, nah jyeidwis nyhiq jens xiklyis beq nauh dyei das.