Read Achang SODANG 28 Bible Online

SODANG 28 - Achang bible

SODANG 28

¹Lhung bang gas nyamoq lyis khat soeu ma bos laus eq phang. Dan bang gas khangkhyi teh womh.

²Dius nyau jens yaunos kuot lyis zau dvyuk thang lhyi dvyuk guon das. Yik las dolhain dah uhshe soeu guon lyis munghdan gas yombos los las goeng joq.

³Toeuh yhung lha shohjyen bang lyis zaiq soeu ka jyo zains lyis bat sat dah mau muh jyang yah doeusgoh.

⁴Nvng lyi ma chank lyis gas lhung bang shot pheh nyeis. Nghuot laus eq nvng hauh lyi chank lyis gas hauh bang yah tyi goh.

⁵Ma gis bang gas lyi jus cha nghuot yvlyis ma seq. Nghuot laus eq YHENSAIN lhyi paiq bang gas hauh yvlyis vlhomuh seqgyo.

⁶Dan zis yah shohjyen xauh das zis gas, hwah hwah lungs lungs yah dis das thoq lyis zes gis.

⁷Lyi chank dah loyvm phoq gas yik soeu nghuot. Yhung pvjus dah dyenschangh yah zomh bang gas nyamoq uwus moq lyis xoq lhoeu phuh.

⁸Vmyat zo zis yah gohyuk lyis joeui yah zaiq las nah zisyos lyis lhoq nyo soeu nghuot lyis, nah zisyos gas shohjyen bang lyis nhaiqnyen soeu dah loq mas wvng loh das.

⁹Nvng lyi ma chank nghuot lyis, nah shvmanh dung dang gas Mangso dah no mas vchoqh vlhauq nghuot das.

¹⁰Nvng ehnyet zungh soeu lhyi ma gis dah muh kuot das xiklyis mhuih nghuot lyis, nvng gas nvng khyoq twih mas nvng nyih das. Yobos ma bos soeu ka phauh shangh zis xauh das.

¹¹Dis bang gas vjangh yah nyamoq joeui bos ge nghamh zo laus eq, dius dah wotwu lyis seq dah shohjyen soeu ka nyamoq khasoeh teh bang nghuot yvlyis vlhomuh seq.

¹²Dius gis jens hwankti tank mas tsung lyis yuk khanghmuh pwe bos kuot laus eq dius gang jens guon los lyis dius jens tamh joq.

¹³Nvng nah yaunos lyis zauh toh das zis yomkat nghuot lyis nah kang dwis cho mha khanhamp eq yoh ung das zis ma nghuot. Nah yobos rhen lha jhank nghuot lyis Mangso nvng lyis nhaiqnyen ehnyet chixoeuq das.

¹⁴Vjangh YHENSAIN dah domsyos gyo nyeis aq, housoeh lyis nvng ngelhoq das. Nvng nhaiqlom than nyeis lyis gas dyoqbis das.

¹⁵Lhung dah guon soeu xikkhonh mas shohjyen bang gas khau nges gus ma bos. Hauh zau gas nyings dah khangkhyi yahge gauh yenh dah woms teh gyuk chah soeu nghuot.

¹⁶Do ma lhain dah guon soeu ka lhoeng dah zau soeu nghuot. Ma dan cho lhyi hoeng soeu ka nyangh nyangh xauh guon das.

¹⁷Dius sat yobos bos soeu ka nyah lop dwang lyis yoh nyap nyhoq doeu nyeis. Nyang lyis vtomp toh.

¹⁸Ehnyet zungh nyeis aq, housoeh lyis nvng jesluiq das. Nvng ma dan nyeis nghuot lyis nyetlos nyettant lains das.

¹⁹Yos zwi danh zwi yvmas yomkat soeu ka zonoms vbomsdom yoh. Shishenh mvgon thank nhang bang gas vjangh shohjyen das.

²⁰Ehnyet zungh soeu ka ngwis ngon zis yah kang xauh dwis das. Nghuot laus eq nvng lvnyap dis mes lyis gas yobos dyei zis xauh das.

²¹Dius lyis nyoqnho khyen cho ka shuot. Nghuot laus eq soetuon bang dvyhamh gas khau whot dvmhauh xauh yoeus das xiklyis yangh shuot khyvlyis soetuon dyei das.

²²Chenh bang gas lvnyap dis los das xiklyis khat nyeis yvmvyah, shohjyen cho jweh los yvlyis nyamoq ma seq.

²³Dius lyis taiq kyingh aq; thang pheh nyang gas hauh yvlyis, mhuih chungh thoq lyis phauhtap toh das.

²⁴Vsainnyang nyhiphoq dah vyhang khauh zis gas yobos ma nghuot ge nghamh soeu hank laus eq khauh soeu nyang nghuot.

²⁵Nyoqnoq zis gas shanghsenh cho dvbweh nhang. YHENSAIN lhyi loms khau nyeis das zis gas nah xiklyis zes gis.

²⁶Vsainnyang nghamh khyvlyis dvkuot soeu ka koh soeu nghuot. Joeui zes bos soeu dah jyauh dang lyis chank las jesluiq shohluiq nyeis aq.

²⁷Shohjyen bang lyis gvm dyei aq, nvng khanhamp eq ma nyungs das. Shohjyen bang lyis yoeuh lhaiq toh lyis gas dius nyoshoq nvng lyis nhoengh das.

²⁸Lhung bang hwankti tank mas tsung lhyi dius jens tamh joq, nghuot laus eq nyamoq hwankti tank masyah gyo uhlyis dan bang doms guon los das.