Read Achang SODANG 3 Bible Online

SODANG 3 - Achang bible

SODANG 3

¹Ngah lo eh, ngos jyauh cho lhyi vtohnyhik, ngos tyingtoh dang lyis nah nhaiqlom mas vjangh soh nyeis aq.

²Khasoeh ge lyis ngos jyauh cho ka nvng lyis kang xing nhang zis yah nyeisgis yaplhoq nhang das.

³Jyetdap sainhnos cho yahge lomluk cho lhyi nvng yah vgang loh nhang. Hauh zis nah lainzain mas wuot toh aq; nah nhaiqlom mas lhaih comh toh aq.

⁴Housoeh lyis Mangso xikkhonh mas dius xikkhonh mas nvng nyoqnho yoh las nyings hoeuh das.

⁵Nah nhaiqlom gonh YHENSAIN lhyi loms aq; nvnyang dah seqgyo cho mha vnges.

⁶Nvng kuot cho khanghmuh mas YHENSAIN lhyi soh aq. Nyang nvng lyis jus cho tuonhshet das.

⁷Nvng nvnyang joeui bos oen vnghamhzo, YHENSAIN lhyi gyukwoms zis yah ma gis zis jhank aq.

⁸Nvng housoeh kuot lyis hauh zis gas nah gungs xiklyis mvcheih duot las yanghzan zis yah shohyau mas shohkhyang yah dyingh das.

⁹Nvng yoh zisyos yahge nah maunyeis mas thuqh dah jyo, gis thank zis YHENSAIN lhyi dyei zis yah nyang lyis nyoqnho ngelang dyei aq.

¹⁰Nvng housoeh kuot lyis nah jyi mha wom dyingh das, nah zvbiq tyikzwvng gas zvbiq saiq dyingh shon das.

¹¹Ngah lo eh, YHENSAIN jyauh mhoq lyis chaxwe ma nhang vkuot, nvng lyis kyink lyis gyo yoeus aq.

¹²Uwus gas nyang nhaiqdoeus lo lyis jyauh mhoq teh, YHENSAIN nyang jyet soeu lhyi jyauh mhoq.

¹³Joeui xo nyvng soeu, seqgyo cho bos los soeu ka ngelhoq.

¹⁴Joeui mhayah yoh dah vmyat gas ngwis masyah yoh dah vmyat thoq lyis zes gis. Joeui ka xing thoq lyis zes phauh.

¹⁵Joeui ka phauhdap luk thoq lyis zes phauh las nvng omes zis cha yah eq ma yoh byi.

¹⁶Joeui ka nvng lyis kang xing nhang, dis cho yahge nyoqnho ngelang dyei.

¹⁷Nvng joeui bos khyvlyis kang dwis lyis nvng nyenstap cho, ngwis ngon dah kang dwis cho yoh das.

¹⁸Joeui lhyi zwi toh bang gas ngelhoq; hauh zis nyamoq lyis kang dyei nhang.

¹⁹YHENSAIN ka nyeisjvng lyis nyah joeui yah kuot toh. Nyah dah seqgyo cho yah maukhung lhyi joq nhang.

²⁰Nyah seq cho ka jeislvng jens lyis yaus thuqh los nhang. Jyommauh gas nyeisjvng lyis mauwus dyei.

²¹Ngah lo eh, nah joeui yahge seq cho lhyi zwi zains toh aq. Hauh yvlyis khanhamp eq vkat khyoq.

²²Houka nvng lyis kang, ngwis ngon las pyo dah kang dwis cho tsain dyei das.

²³Nvng nah cho jesluiq shohluiq yoh loh las, khyeiuh yangh ma thungh das.

²⁴Nvng yhet loh lyis ma gyuk noh; nyens gonh vlhomuh yoh yhet das.

²⁵Lhung bang jyank mas dyoqbis zainsmuh gas lyeis jyang los teh nyetlos nyettant los lyis nvng hauh yvlyis ma gyuk noh.

²⁶YHENSAIN ka nvng lyis jesluiq shohluiq gomh das. Nyang nvng lyis lhyik mas ma nyih nhang das.

²⁷Chah nyeis bang lyis, khanhamp eq nvng gis zis yoh kuot nyhoq kuot dyei aq.

²⁸Nah yhenkyoh lyis gvshih yoh pangh yvlyis, khanhamp eq vsheq toh, nvpyo los aq ngos dyei das oen vsang.

²⁹Nvng lyis loms las nah vnvm mas nyeis dah nah yhenkyoh nos das khyvlyis ma gis cho cha eq vtoeuq.

³⁰Nvng lyis khanhamp eq cha ma nos nhang ku soeu yah soe ma bos yvmas vtaiq phyen-goh.

³¹Lhuotzo bang lyis vnoh, nyamoq teh kuot das oen eq vnghamh thyet.

³²Khasoeh ge lyis YHENSAIN ka ma gis zis kuot bang lyis choqh laus eq dan bang lyis gas nyang dyenschangh kau kuot.

³³Lhung bang yhen lhyi YHENSAIN nhoengh, dan bang dah yhenbang lyis gas dvshvmanh dyei.

³⁴Nyang gas jwangh bang lyis jwangh laus eq ehnyet nyhen mha gyoh bang lyis nyoqnho yoh nhang.

³⁵Joeui bos bang gas chungh phoh dah nyings hoeuh das, koh bang gas xoqphuh das.