Read Achang SODANG 31 Bible Online

SODANG 31 - Achang bible

SODANG 31

¹Heika hwankti Lemuel dah ungwes, nyah lo lyis taiq dah noq dah tying dang nghuot.

²Nyang taiq zis gas, Nvng gas ngos jyetdap, ngah shvmanh dung dang yah dvyhangteh yoh los dah lo nghuot. Ngos nvng lyis cha yah sen cho taiq das lah?

³Nah yom dvnganh nyetnau cho mha vyhung tyamp, nah ngwis dvnganh vmesbih jens mas vyhung tyamp; nyamoq gas hwankti jens lyis mhont tyamp ku goeus.

⁴Lemuel eh, gyo aq, hwankti jens gas zvbiq shuk cho, nghuot ya yhei shuk cho lhyi jhank chah.

⁵Nyamoq shuk nyeis lyis lyi tohnyhik zis yah vshoh vjyen dius jens mas chah nyeis dah toeuh lyis chaxwe manhang seq mus.

⁶Yhei ka shei loh nyeis bang xiklyis yahge, kham nanh nosthyoh xauh bang dah xiklyis nghuot.

⁷Nyamoq shuk las nyamoq dah shohjyen cho yahge ehnyet ma tap cho lhyi tohnyhik bas jungh.

⁸Vsainnyang dah cho ma yoh taiq bang nyhenshang bos taiq dyei aq. Pangh das soeu ma yoh bang dvnganhmoq dah toeuh lyis bos gos dyei aq.

⁹Nyamoq xiklyis dang taiq dyei las dan dah soetuon soeu kuot dyei aq. Shohjyen bang yahge nyungs bang dah toeuh lyis gos dyei aq.

¹⁰Wotwons dah yhensain nyhiq lyis xo nyvng das zis kha iq yau lah? Nyang gas phauhdap luk thoq lyis zes phauh.

¹¹Nyah yhensain phoq gas nyang mas nghamhnywe las, nyang khanhamp eq ma shohjyen das.

¹²Nyang dwis nyeis dvchank nyah yhensain phoq xiklyis gis dah muh zwi las, vkyuh nain nhang muh khanhamp eq ma kuot.

¹³Nyang gas sauh khying yahge jei khying yah yoqgan yoq yvmas ma ngo ma banh nghuot.

¹⁴Nyang gas soenghi sangpho jens kuot teh, we masyah yhen pheh zonoms chi los.

¹⁵Nyang mau ma buh shih lyis toq las nyah yhenbang xiklyis wom ba las nyah jyeidwis nyih jens kuot das muh shet nyeis.

¹⁶Nyang gas maunyeis lyis yoeuh toeuq las wis. Nyang yoh xo dah ngwis yah zvbiq khyam tsungh.

¹⁷Nyang gas muh zwi dah vmesbih nghuot las yombos, kank kat nyeis.

¹⁸Nyang kuot thuq dah vyhang dvnganh dah phauh lyis nyang seq las nyenh gungs jweh shoq muh zwi nyeis.

¹⁹Nyang jeini las, yoqgan yoq.

²⁰Nyang gas shohjyen bang yahge nyungs bang lyis magons magoh mes gvm dyei nyeis.

²¹Nyah yhenbang gas nywe dah dyimis xauh wuot yvmvyah gyu gyoh uhlyis nyang ma chiqh noh.

²²Nyang gas yhetyos mvlhyoeuq kuot. Nesnoq vwot thuq las yungh dah jyuhmahsen dyimis wuot toh.

²³Nyah yhensain phoq gas wus mas shwih uhshe soeu dvyuk nghuot las nyings hoeuh.

²⁴Nyang gas misseh yahge dyichih tsain yoq las soenghi jens lyis ungh dyei.

²⁵Nyang gas yom yahge nyoqnho ngelang bos las jweh los das shishenh nyhenshang nyang ma chiq.

²⁶Nyang gas noeuh noeuh nhamp nhamp joeui dang taiq nyeis.

²⁷Nyang gas vjangh yah ma ngo ma banh muh zwi zis yah nyah yhen khau mha chah nyeis cho lhyi yoeuh nyeis.

²⁸Nyah lo jens nyang lyis phauhtap toh. Nyah yhensain phoq eq nyang lyis chungh.

²⁹Nyang gas, vmesbih jens nyoshoq gas gis dah yhensain nyhiq jens nghuot laus eq, hauh bang dvnganh thoq lyis nvng gas gis thank soeu nghuot, ge.

³⁰Gungs khyank yungh zis gas seq mhuih, yungh zis gas seq bi loh laus eq, YHENSAIN lhyi gyukwoms dah vmesbih gas chungh mon soeu nghuot.

³¹Nyang kuot dah muh dvnganh phauhdap yvlyis comh dyei aq. Yuk khanghmuh nyang lyis phauh nyang das zis gis.