Read Achang SODANG 4 Bible Online

SODANG 4 - Achang bible

SODANG 4

¹Ngah lo jens eh, namoq dah uwus jyauh yvlyis gyo yoeus aq, kamp gyo aq, seqgyo cho bos los das.

²Housoeh las ngos namoq lyis gis dah jyauh cho dyei. Ngos jyauh cho lhyi vtyamp.

³Ngos gas loshang nghuot uhlyis ngah ungwes xikkhonh mas noeuh las dvyuk kyingh nghuot.

⁴Ngah uwus ngos lyis jyauh las taiq zis gas, Ngah dang nah nhaiqlom mas kat shung toh aq. Ngos tyingtoh dang lyis chank kuot lyis nvng kang dwis das.

⁵Joeui xo aq, seqgyo cho xo yung toh aq. Ngah nhuot mas dang lyis vtohnyhik, nungsyos vtoh.

⁶Joeui lhyi vtyamp, khasoeh ge lyis nyang nvng lyis gomh das. Nyang lyis jyet aq, nyang nvng lyis zungh das.

⁷Joeui ka yhaugyen thank zis nghuot. Housoeh las joeui xo aq. Nvng xo zis dvnganh mas seqgyo cho xo aq.

⁸Nyang lyis chunghtoq aq, nyang nvng lyis toeushap das. Nyang lyis po toh[1] aq, nyang nvng lyis nyoqnho ngelang dyei das.

⁹Nyang gas nah uhloms mas yungh dah bankhwank kih dyei zis yah nvng lyis phunk bos buismuk dyei das, ge.

¹⁰Ngah lo eh, ngah dang gyo yoeus las, ngah sangkhyangh lhom yoeus aq. Housoeh lyis nah kang xing das.

¹¹Ngos nvng lyis joeui cho jyauh las, dan khyvlyis kang dwis nhang, choshe los.

¹²Nvng suh lyis nah beszoh thomtho ma mus das. Wuih lyis khyeiuh ma thungh das.

¹³Jyauh cho lhyi zwizains toh aq, vkat khyoq. Hauh zis gas nah kang nghuot yvmvyah tsomh toh aq.

¹⁴Lhung bang kuot teh vkuot, Nyamoq dah ma gis cho chank vsuh.

¹⁵Hauh cho lhyi jhank aq, vloh; jhank las nah cho nvng loh aq.

¹⁶Nyamoq gas ma gis zis ma yoh kuot lyis ma yoh yhet. Dvyuk yuk lyis ma yoh toeulhain lhyi nyamoq yhet ma yoh muih.

¹⁷Nyamoq gas ohlhyoq zo, zvbiq shuk teh lhung cho yahge lhuot zo cho mha gauslaus.

¹⁸Dan bang dah cho ka buis canh los teh nghuot. Houka bvng doengs shoq zes zes bvng los.

¹⁹Nghuot laus eq lhung bang dah cho ka mauchotdwang teh nghuot. Nyamoq gas nyamoq lyis cha yah thungh lains nhang zis ma tsain seq.

²⁰Ngah lo eh, ngah dang kamp gyo aq. Ngah sangkhyangh lyis nah no vlhomuh gyo aq.

²¹Houka nah nyoqjeih masyah vgang loh nhang. Nah nhaiqlom khau mha comh toh aq.

²²Khasoeh ge lyis hauh zis gas xo nyvng bang xiklyis kang nghuot. Gungs gonh xiklyis yanghzan cho nghuot.

²³Nhaiqlom gas nvng kuot ya kuot yvlyis vkyuh dyei yvmvyah nah nhaiqlom lyis ma lan lo tsomh toh aq.

²⁴Mhuih dah nhuot, hwah dah nhuotkuk lyis nvng masyah we loh nhang aq.

²⁵Nah nyoqjeih lyis dan dan yoeuh nhang aq, nah nyoqkuk nah xikkhonh mas jeih jeih yoeuh nhang aq.

²⁶Nvng loh cho lhyi nghamh suon yoeuh las, nah cho dvnganh doengs nhang aq.

²⁷Loqwi loqyos v i loh; nah khyei ma gis cho mhayah jhank aq.