Read Achang SODANG 5 Bible Online

SODANG 5 - Achang bible

SODANG 5

¹Ngah lo eh, ngah joeui cho lhyi kamp gyo aq. Ngah seq gyo cho lhyi gyo yoeus aq.

²Housoeh lyis nvng zaih zis yah nyeis las nvng taiq dang gas nvng seq cho bos yvlyis chixoeuq das.

³Wotwu dyoq dah vmesbih nhuotkuk gas dyoyhei yaus las, nyah nhuot gas coeu thoq lyis jyuot laus eq,

⁴nyah vthang ka nyonoq teh khoh las, aiq shot zuk moengsa teh thoq.

⁵Nyah khyei ka shei mau mas gyoh loh, nyah beszoh gas lopdungs pheh loh.

⁶Nyang gas kang dwis cho pheh loh dah cho mha ma nyeis, nyah cho ka vtyi vkamh nghuot nyeis laus eq nyang hauh yvlyis ma seq.

⁷Housoeh las gvshih ngah lo jens eh, ngah dang gyo yoeus geh; Ngah nhuot mas dah dang yah vgang loh.

⁸Houteh vmesbih yah we we jhank aq. Nyah yhen khomhdwang mas vni loh.

⁹Housoeh ma nghuot lyis nvng gas nah nyoqnho ngelang gohyuk lyis dyei las, nah kang lhyi lhoeng bang jyank mas kyauh das.

¹⁰Lvbaus gas nah zisyos dvnganh yoeus loh las, nvng yomkat toh zis lvbaus yhen mha jweh das.

¹¹Nah gungs, nah shoh yom loh lyis nvng thang thank lyis kuk das.

¹²Nvng taiq das zis gas, Ngos gas jyauh cho lhyi hoeng goeus nyvng! Taiq kyingh cho lhyi ngah nhaiq mas chaxwe ma nhang kuot goeus nyvng!

¹³Ngah svra jens dah thwe lhyi domsyos ma gyo, ngos lyis jyauh mhoq bang dah dang lyis ma kamp gyo kuot goeus nyvng!

¹⁴Ngos gas huom dah dius phung gungs mas thyoqpi cho vluk thank shoq kuot goeus nyvng, ge.

¹⁵Nvnyang dah jeisbung mas dah jeis, nvnyang dah jeisdwang masyah thuq nyeis dah jeis lyis shuk aq.

¹⁶Nah jeisthuq dwang wus cho mha dyingh shuon loh gis lah? Nah jeislvng moeng mas yaus loh gis lah?

¹⁷Hauh zis lvbaus lyis vdyei, nah xiklyis kyingh nghuot bas jungh.

¹⁸Nah dah jeisthuq dwang gas ngelhoq bas jungh, nah loyvm yoq dah yhensain nyhiq yah pyo aq.

¹⁹Nyang gas jyet phoh cvt yahge yungh dah lvlyo teh, nyah sainhkhonh gas nvng lyis vjangh shvpyo nyeis bas jungh. Nyah jyetdap zis gas nvng lyis vjangh twih toh bas jungh.

²⁰Ngah lo eh, nvng chamus wotwu dyoq dah vmesbih yah neh nyeis lah? Soeu nyi dah sainhkhonh mas po toh lhyeh?

²¹Nvng kuot cho ka YHENSAIN xikkhonh mas nghuot las, nyang gas nvng kuot cho dvnganh lyis nghamh suon yoeuh nyeis.

²²Lhung soeu ka nyah lyi ma chi cho lhyik mas nyih las, nyah yaunos twih mas nyih.

²³Nyang gas nyang gungs nyang ma joeu las shei das. Nyang lyis nyah dah koh cho yah twih toh las chowhang loh das.