Read Achang SODANG 6 Bible Online

SODANG 6 - Achang bible

SODANG 6

¹Ngah lo eh, nvng gas nah yhenkyoh xiklyis jyen cap das oen yvwons yoeus las dangthoengh toh lyis,

²nvng nvnyang nhuot mas dang yah lhyik mas nyih das. Nah dangthoengh yah nvng gas nyhik zis xauh das.

³Nvng nah yhenkyoh loq khau mha jweh goeus ya, o mha gyoh las nah yhenkyoh lyis loh khyoeuq aq. Ngah lo eh, housoeh kuot las nvnyang khyuot yoeus zo aq.

⁴Nah nyoqjeih lyis vyhet nhang, nyoqkuk lyis vchenh nhang.

⁵Shoh khat soeu loq mas dah cvt teh, nghoq twih khyoq soeu loq mas dah nghoq teh nvnyang luiq los aq.

⁶Lan soeu eh, lvyet jyank mas e aq. Nyah cho lhyi nghamh yoeuh las joeui bos aq.

⁷Houka uhjyung ma bos, uhshe soeu ma bos, guon soeu ma bos laus eq,

⁸buis gywes nyos lyis nyah wom yahge jyo yhomh nyos lyis nyah zonoms xo tsainh yung toh.

⁹Lan soeu eh, nvng khanyhank jweh shoq yhet joq das lah? Yhet masyah khanhamp toq das lah?

¹⁰Nvng housoeh taiq lyis dvsoq yhet, dvsoq muih, loqlom las dvsoq lhain no nyeis shih lyis,

¹¹nah shohjyen cho ka khyanktau teh, nyungs cho ka jesgungs chi soeu teh jweh los das.

¹²Phauh ma dap dius, lhung soeu ka hwah lungs nhuot yah suh yenh.

¹³Nyah nyoq nyik, khyei thoenk, loqnyhauh tuonh zis yah nvng lyis mhuih nyeis.

¹⁴Guih ehnyet bos las, ma gis joeui vjangh da dyei zis yah, dius changh lyis dvyos dvsanh bweh nhang.

¹⁵Housoeh yvmvyah nyah xiklyis yaukyenh shanghsenh cho nyetlos nyettant jweh los das. Nyang gas ma yoh yhoh lo shoq nyetlos nyettant dyoqbis tyamp das.

¹⁶YHENSAIN hoeng lha choqh zis nyhet ja nghuot.

¹⁷Khwank dah nyoqnho, hwah dah lhyo, yobos ma bos dah suih huot loq,

¹⁸Lhung cho nghamh toeuq dah nhaiqlom, ma gis yvmas lvnyap wuih dah khyei,

¹⁹Hwah taiq dah ma ying kanghjyoeng, boekyis mas gang lvn cho bweh nhang soeu tsain nghuot.

²⁰Ngah lo eh, nah uwus taiq dang chank kuot aq. Nah ungwes jyauh cho lhyi eq vtyamp.

²¹Nah nhaiqlom mas vjangh twih toh aq; nah lainzain mas wuot toh aq.

²²Nvng suh e lhyi hauh zis nvng lyis choshe das, yhet lyis nvng lyis zungh das, soh los lyis nvng yah jisgoh das.

²³Khasoeh ge lyis hai tyingtoh dang gas nyibung, hai jyauh cho ka bvng zis nghuot. Yobos tuonhshet las jyauh zis gas kang dwis cho nghuot.

²⁴Hai tyingtoh dang yahge jyauh cho ka ma gis dah vmesbih yahge mhuih chungh dah soeu nyi dah lhyo mhayah zungh dyei das.

²⁵Nah nhaiqlom mas nyang yungh zis lyis nyetnau cho vbos. Nyah nyoqkuk yah nvng lyis vnyih nhang.

²⁶Vbusbih gas nghe nyhiq nghoh das xiklyis ohlhyoq dvlhyoq phauh yah yoh nghoh laus eq nyi shuot zis gas nyah phauhdap kang dyuk loh.

²⁷Nvng gas dyimis ma ngeh shoq nah sainhkhonh mas nyi yoh chi los das lah.

²⁸Khyei ma ngeh shoq nyigywe mas yoh nang das lah.

²⁹Yhenkyoh dah yhensain nyhiq yah yhet soeu ka houyah dvyhangteh nghuot. Nyang lyis tanh soeu hank laus eq joeng zis jyoengh xauh das.

³⁰Khauh soeu ka ngvn las nyang nhaiqtap shoq khauh zo lyis dius jens nyang lyis diusngis ma khyoq.

³¹Nghuot laus eq nyang lyis nyvng goeus ya, nyang nyhet huon cap chah. Nyah yhen mha joq vyhang dvnganh dyei tyamp chah.

³²Nyi shuot soeu hank laus eq seqgyo cho ma bos. Housoeh kuot soeu ka nyah dyos lyis mhont nyeis.

³³Dvm yahge nyoqnho ngelang pyaih zis xauh das. Nyang xauh dah xoqphuh cho ma yoh buot tyamp.

³⁴Khasoeh ge lyis noh cho ka yhensain phoq dah nhaiqlom tsoeu lha, lvto phuk nyeih lyis nyang nhaiq ma nyen das.

³⁵Yaukhyauh zis cha eq ma lhom yoeus, nvng jyungshuk nyoshoq dyei laus eq nyang nhaiqyo ma bi das.