Read Achang SODANG 7 Bible Online

SODANG 7 - Achang bible

SODANG 7

¹Ngah lo eh, ngah dang lyis tsomh aq, ngos tyingtoh dang nah vkhau mha yung toh aq.

²Ngos tyingtoh dang chank kuot lyis kang dwis das. Ngos jyauh yvlyis nah nyoqlom lyis teh gomh aq.

³Ngos jyauh dang lyis soh aq, nah nhaiqlom khau mha lhaih toh aq.

⁴Joeui lhyi nhamhmuh lyis teh jyet aq, seqgyo cho lhyi, Nvng ngah buisnoms kau, oen lui aq.

⁵Housoeh lyis nyamoq gas nvng lyis wotwu ma gis vmesbih masyah eq, dang yah mhuih chungh dah lvbaus nyhiq masyah eq zungh dyei das.

⁶Dvnyeih gas ngah yhen khomhbaiq masyah yoeuh kat lyis,

⁷nhaiq ma bos loyvm jens lyis nyvng. Houmha seqgyo cho ma bos dah loyvm dvyuk lyis comh toh.

⁸Hauh soeu ka, vmesbih dvyuk dah yhen cho chank loh las cho thunk vmesbih dvyuk dah yhen pheh loh.

⁹Houka nyenhthang chotshomp, nyenh soeng soeng noq los yoq nghuot.

¹⁰Nghe nyhiq gungs shunk las mhuih jyomh mes ehnyet bos dah vmesbih dvyuk nyang lyis lvnyap los zes.

¹¹Nyang gas ma daq xoq ma daq gyuk. Nyah khyei yhen mha ma doengs.

¹²Nyang gas vjangh wus talhoeu mha, kaih jang mas nyeis, chothunk khanghmuh gauh langh nyeis.

¹³Housoeh nyang gas hau yukgis lyis bvlot nyhik tanh las ma seq xoq dah nyoqnho yah nyang lyis,

¹⁴Khvnyhik ngos nyenstap jyungshuk dyei. Khvnyhik ngos nyhen toh zis gyuot goeus.

¹⁵Housoeh las ngos nvng lyis zes das zis thuq los. Nvng lyis tungh xo lha nyvng goeus.

¹⁶Ngah yhetyos lyis Egutu misyhwiq khohkat mvlhyoeuq yah shunk toh.

¹⁷Ngah yhetyos lyis mura, vjyo, maza xanghshom nhamp toh.

¹⁸Los aq, nvpyo jweh shoq pyo goh, jyet goh goh.

¹⁹Ngah yhensain phoq yhen mha ma nyeis. Nyang gyung xing suh loh goeus.

²⁰Nyang ngwis thung dyingh dyingh chi loh, lhamhmuh lainh lyis dvjweh los das, ge.

²¹Housoeh las nyang lyis dang chau yah, jyoeuq dah nhuotkuk yah mhuih las los nhang goeus.

²²Nyang gas sat das yvmas she loh noeulu teh, twih khyoq yvmas nyhih dah cvt gas nyo nyah jinghloms mas zangh teh dvlhain dvm lyis nyah thang mha chank loh.

²³Nghoq gas shei das zis ma seq lhyik mas lvnyap loh teh, dius eq nyah kang thyet das zis nyang ma seq hauh vmesbih thang mha lvnyap chank loh.

²⁴Housoeh las, ngah lo jens eh, gvshih ngah dang gyo yoeus geh. Ngah nhuot mas dang lyis kamp gyo geh.

²⁵Nah nhaiqlom lyis nyah cho pheh vlhaiq loh nhang. Nyah cho pheh vwhang loh nhang.

²⁶Khasoeh ge lyis nyang gas nyoshoq lyis dvmtap lhain goeus. Nyang sat zis gas moqphung zainsmuh nghuot.

²⁷Nyah yhen cho ka lopdungs pheh loh, houka shei cho pheh dan jweh loh.