Read Achang SODANG 8 Bible Online

SODANG 8 - Achang bible

SODANG 8

¹Gyo aq, joeui ka kaiq nyeis, seqgyo cho ka nyah thwe zvn nhang.

²Nyang gas choyvm jing nyhang thoq mas, chotsom choyvm mas yap joq.

³Dius jens wus vkhau mha wvng loh dah wus khomh yvm mas eq, nyang kaiq las,

⁴Dius jens eh, ngos namoq lyis lui nyeis; ngah thwe ka cangsoeu dius jens lyis khyoeuq nyeis.

⁵Joeui ma bos bang eh, zaih cho lhyi seq geh, koh bang eh, seqgyo ehnyet bos geh.

⁶Gyo geh, khasoeh ge lyis ngos gis thank zis taiq bah, ngah nhuotkuk haq las jus cho taiq das.

⁷Ngah nhuot gas jyoeng dang taiq, ngah nhuotkuk gas lhung cho lhyi choqh.

⁸Ngah nhuot mas dang dvnganh gas lyi jus. Houmha guih cho, vphanh vphuk ma bos.

⁹Seq cho bos das xiklyis houka jus, seqgyo soeu xiklyis houka bvng bvng nghuot.

¹⁰Ngwis thoq lyis ngos taiq shet cho, gis thank xing thoq lyis seq cho lhyi lhom yoeus aq.

¹¹Khasoeh ge lyis ngos Joeui ka pvtvmya thoq lyis phauhdap. Ngos lyis nvng o ja cha yah eq ma yoh byi, ge.

¹²Nyang doms taiq: Ngos, Joeui ka jyoeng zaih cho yah dvgeh nyeis las, seq cho yahge seq nghamh suon yoeuh cho yoh.

¹³YHENSAIN lhyi gyukwoms cho ka ma gis cho lhyi hoeng. Khwank, lhoq lhoq teh, ma gis cho yahge hwah lungs nhuot lyis ngos hoeng.

¹⁴Ngos joeui da las hauh zis kuot thuq kat. Ngos mas seqgyo cho bos. Ngos mas yomsoq bos.

¹⁵Ngos pangh zis yah hwankti jens guon nyeis. Ngos pangh zis yah guon bang gas jus dah lyi tsain toh.

¹⁶Ngos pangh zis yah zaulo jens, xamchangh jens, jyoeng dah soetuon bang dvnganh yoh guon.

¹⁷Ngos lyis jyet bang lyis ngos jyet. Ngos lyis tungh xo bang ngos lyis nyvng.

¹⁸Dis cho yahge nyoqnho ngelang, goeng dah zisyos yahge nyeisgis yaplhoq cho ngos mas bos.

¹⁹Ngah jyungshuk gas xing, xing gyingh thoq lyis, ngah jyank masyah yoh zis gas, ngwis gyingh thoq lyis gis.

²⁰Ngos gas dan cho chank suh, lyi jus cho chank suh.

²¹Ngos lyis jyet bang lyis dis dah vso vlho dyei las nyamoq dah ziskwi lhyi dyingh nhang, ge.

²²Joeui taiq zis gas, YHENSAIN ka gohlhain dah nyah muh ma kuot shih lyis, nyang cha eq ma kuot shih lyis ngos gas nyang yah dvgeh nghuot.

²³Nyeisjvng ma joq shih lyis, cangxeih yoq, vcaiq vto masyah ngos lyis toeuq toh.

²⁴Noq thank thomh jens ma joq shih, nghuot ya jeis yah dyingh dah jeisthuq dwang jens ma joq shih lyis ngos khoeu los goeus.

²⁵Boms jens jing jens ma joq shih lyis ngos khoeu los goeus.

²⁶YHENSAIN ka nyeisjvng, pazoe ma kuot shih, cangxeih dah tsohmop yangh ma kuot shih lyis ngos khoeu los.

²⁷Nyang maukhung lhyi toh uhlyis ngos houmha bos. Nyang noq thank thomh mas maunyaus zoh toh uhlyis,

²⁸Nyang maukhung mha jyommauh toh, noq thank mas dah jeisthuq dwang lyis goeng nhang uhlyis,

²⁹Thomh kyo ma lai das cho jeisphauq lyis taiq toh uhlyis, nyeisjvng vpom xi kuot uhlyis ngos houmha bos.

³⁰Ngos gas loqmuh dap svra teh nyah vyvm mas nyeis goeus, nyang gas ngah gvng mas nyeih khanghmuh gaus goeus. Ngos eq nyah xikkhonh mas vjangh pyo nyeis.

³¹Ngos nyang kuot toh mungkvn mas pyo lha cangsoeu lo jens yah nhaiqdoeus nyeis, ge.

³²Housoeh las gvshih ngah lo jens eh, gvshih ngah dang gyo geh. Ngah cho chank bang gas ngelhoq.

³³Ngos jyauh cho lhyi gyo yoeus las joeui bos geh. Hauh yvlyis vtyamp.

³⁴Nyeih khanghmuh ngah yhen khomhbungs mas langh las, khyam khomh mas zungh zis yah ngah dang gyo yoeus soeu ka ngelhoq.

³⁵Ngos lyis xo nyvng soeu hank laus eq kang lhyi xo nyvng. YHENSAIN dah nyoqzons doeus zis xauh.

³⁶Ngos lyis ma xo nyvng soeu hank laus eq nyang nyang dvnos loh. Ngos lyis hoeng bang dvnganh gas shei zis lyis ngwis, ge.