Read Achang JOEUI 12 Bible Online

JOEUI 12 - Achang bible

JOEUI 12

¹Housoeh las namoq gas gyuk dvn phoh dah buisnyeis yahge zvn tsain jweh lyis, ngos haih kang dwis yoq ma gaus lo ge das. Hauh shishenh ma jweh shih, nah wotyamh bon lyis nvng lyis gvnkhanh Soeu lhyi soh aq.

²Namoq nyenhkyi bos los lyis nah xiklyis buis, lhamhmuh yahge kyi dah bvng zis gas shen loh das, jyommauh eq khanhamp eq ma ywi loh das.

³Housoeh nvng lyis gos goeus dah loqyom gas nvn das. Gvshih yangh dah nah khyei ka yomnhuk das. Nah zonoms lhyih das zis zwis eq svsoh nain das. Nah nyoqjeih eq nghon lha bvng bvng ma nyvng.

⁴Namoq dah no jet las talhoeu mha dah thwe ma xauhgyo das. Wom mhoq thwe nghuot ya khvlhank thwe yungh lyis sam sam dvxauhgyo. Nghuot laus eq nghoq nyings thwe ka namoq lyis yhet soh nhang das.

⁵Nvng nyhang joqyos lyis tsain gyuk das, suh das zis gyukphoh nghuot das. Nah cam thyoeu das. Namoq gas namoq nyang gungs lyis tungh she yenh chah das. O mes cho dvnganh dyuk loh das.Yang gas yah dah thang thank vdaus noyos pheh loh nyeis. Hauh thang lhyi talhoeu mha kuk ngaus cho bos das.

⁶Ngwis jvngchoh teh dah kang dyet das, xing nyitoengh eq gyoh las gwi das. Jeis dwang mas jeis twih dyet das, jeis yam eq gwi das.

⁷Yah gungsdom gas nyeisjvng mas dah tsohmop mas tauh e das, soqshe dah kang ka yang lyis soq kat dyei toh dah Mangso jyank mas tauh loh das.

⁸Vkom, vkom, dvnganh gas vkom dvnghuot ge, joeui nghamh soeu taiq.

⁹Nghuot laus eq joeui nghamh soeu ka joeui bos yvmvyah, nyang seq toh zis dius jens lyis tsoq jyauh loh nyeis. Nyang sodang lyis nghamh suon yoeuh las hauh jyoeng cho lhyi vlhomuh tsain kyink toh.

¹⁰Joeui nghamh soeu ka nhaiqtaink dang tungh tsain xo laus eq nyang lhaih toh zis gas dang jings nghuot.

¹¹Joeui bos soeu dah sangkhyangh gas yvng yoeuh bang yvng jens lyis choshe lhyi yhung dah tyanghchon teh nghuot. Xo tsainh toh sodang gas goeng goeng battsuk toh tyinghzoe teh joq. Hauh dang gas nyamoq lyis yvng tsain nghuot dah yang dvnganh lyis yoeuh soeu, dvyuk kyingh dah yvng yoeuh soeu Mangso yah dyei toh.

¹²Ngah lo eh, nvng zungh yoeuh das zis dvkoeuq bos. Sauh buk lhaih cho ka thank ge zis ma bos. Nyo xuq suon yoeuh zis eq nvng lyis daus nhang das.

¹³Hai dvnganh dah thang lhyi taiq das zis dvja dvbos lo. Mangso lhyi phauh nyang gyukwoms zis yah nyang tyingtoh dang chank kuot aq. Khasoeh ge lyis Mangso yang lyis gvnkhanh toh zis gas haih zis kuot das xiklyis nghuot.

¹⁴Mangso ka gis zis laus, ma gis zis laus eq, yang kuot zis dvnganh lyis soetuon das, tsoek yah kuot zis yangh bos.