Read Achang JOEUI 3 Bible Online

JOEUI 3 - Achang bible

JOEUI 3

¹Haih mungkvn mas bweh zis dvnganh gas Mangso khyen toeuq toh dah shishenh lyis bweh los.

²Nyang gas khoeu los shishenh, shei loh shishenh; Vzains tsungh shishenh, khuot tyamp shishenh toh toh.

³Sat shishenh, yhoh shishenh; Thyoq khyoq shishenh, tsuk shishenh toh.

⁴Nyang gas kukxi shishenh yahge gauslaus shishenh; kukngaus shishenh yahge goh shishenh toh.

⁵Lukgoq tsainh toh dah shishenh yahge hauh yvlyis doeuh tyamp das shishenh; xauhgoh shishenh yahge gang goh shishenh;

⁶Nyang gas xo nyvng shishenh yahge dyuk loh shishenh; yung toh shishenh yahge doeuh tyamp shishenh toh.

⁷Langchuiq shishenh, pho shishenh; samlo nyeis shishenh yahge dang taiq shishenh toh.

⁸Jyet shishenh yahge hoeng shishenh; Jeszan shishenh yahge nyenstap shishenh toh.

⁹Yang yah muhzoh dvnganh masyah cha vmyat bos lah?

¹⁰Mangso yang lyis lyei dah yvwons wons nhang toh goeus yvlyis ngos seq.

¹¹Nyang gas ja khanghmuh xiklyis doeus dah shishenh toh goeus. Nyang gas yang lyis thang pheh dah cho lhyi seq mes ehnyet dyei toh laus eq, nyang kuot dah muh lyis nhaiqtap shoq dvnganh seqgyo das toeuh khanhamp eq ma dyei.

¹²Housoeh las yang yoh kuot zis gas pyo pyo nyeis las yang kang dwis nyeis shih lyis yoh kuot nyhoq gis thank zis kuot das cho nghuot zis ngos sohseq.

¹³Yang dvnganh gas yang zwi khank toh zis zo shuk las gauslaus chah. Houka Mangso dah jyehjuh jyungshuk nghuot.

¹⁴Mangso kuot cho dvnganh vcaiq vto joq das yvlyis ngos seq. Nvng houmha cha ma yoh lhungh, cha ma yoh yoeus tyamp. Mangso kuot dah cho dvkoeuq gas, yang nyang lyis gyukwoms nyeis das nyhenshang nghuot.

¹⁵Gvshih bweh zis nghuot ya yoh bweh zis gas, xikpheh bweh ku goeus. Mangso ka hau dvyhangteh zis doms bweh, doms bweh nhang.

¹⁶Hauh thoq lyis, nvng haih mungkvn mas lyi jus cho yahge jus cho bos chah joqyos mas lhung cho xo nyvng yvlyis eq ngos soh yoeuh.

¹⁷Ngos ngvnyang taiq zo zis gas, Mangso ka dan bang yahge ma gis bang lyis dvyhangteh soetuon das: khasoeh ge lyis vyhang dvnganh yahge zwi loh zis dvnganh gas nyah xiklyis toeuq toh shishenh lyis bweh los das.

¹⁸Yang gas gaunyhauq thoq lyis ma zes cho chixoeuq das xiklyis Mangso ka yang lyis shi yoeuh chah, oen ngos nghamh thyet.

¹⁹Dvyhangteh dah uhpui loqkyoq gas cangsoeu yahge gaunyhauq lyis dvyih langh nyeis. Dvja gas gohtoeu dvja yah dvyhangteh shei. Nyamoq gas aiq ja yah dvyhangteh gvnkhanh toh zis xauh bang nghuot. Kang ka hank xiklyis eq vjyuk ma bos yvmvyah cangsoeu ka gaunyhauq thoq lyis ma zes.

²⁰Hau aiq ja yah dvyhangteh joqyos, tsoh pheh dvloh. Hau aiq ja yah tsoh masyah los las tsoh pheh doms tauh e.

²¹Cangsoeu dah dyos gas nyhang pheh doq las gaunyhauq dah dyos gas nyeisjvng pheh gyoh wvng loh lah zis vlhomuh hank khasoeh yoh seq?

²²Housoeh yvmvyah gis thank cho yang yoh kuot zis gas, yang vsainnyang zwi las yoh yvmas gauslaus nyeis das cho nghuot oen ngos sohseq. Yang hauh thoq lyis gohtoeu cha ma yoh kuot lo. Yang shei thang lhyi cha bweh loh das ge yvlyis yang seq das cho ma bos.