Read Achang JOEUI 4 Bible Online

JOEUI 4 - Achang bible

JOEUI 4

¹Hauh thang lhyi ngos haih mungkvn mas loh nyeis dah lyi ma jus cho dvnganh lyis doms yoeuh kat. Zaiq zis xauh bang ngaus nyeis, hank eq nyamoq lyis ma yoh pangh. Nyamoq lyis zaiq bang shot pheh yomsoq bos yvmvyah hank eq nyamoq lyis ma yoh pangh.

²Ngos gas shei loh goeus bang lyis noh. Nyamoq gas dwis nyeis shih bang thoq lyis zes gis.

³Nghuot laus eq khanhamp eq ma khoeu los bang yahge haih mungkvn mas loh nyeis dah lyi ma jus cho lhyi khanhamp eq ma nyvng bang zes gis.

⁴Ung cho yoh shoq dius jens chamus hou iq khank? Houka nyamoq yhenkyoh yoh dah vyhang lhyi noh las nghuot yvlyis eq ngos xauh xuq. Nghuot laus eq houka vkom dvnghuot. Houka lyeis lyis chank khat teh dvnghuot.

⁵Nyamoq taiq, Yang yuot shei shoq yah loq tsain lom toh zis gas koh das, ge.

⁶Hauh dang jus lyis jus das laus eq, zisyos nainlo yoh las nyenstap ehnyet yah xauh nyeis zis gas aiq loq yah vjangh muh nyo las lyeis lyis tungh chank khat thoq lyis zes gis.

⁷Ngos gas kang dwis yvmas vkom dvnghuot dah cho gohtoeu dvkoeuq lyis soh nyvng.

⁸Heimha dvyuk nyang kyingh nyeis soeu dvyuk bos. Nyang mas lo ma bos, vmang vnoeuh eq ma bos, nghuot laus eq nyang vjangh muh zwi nyeis, nyang yoh dah dis cho mha khanhamp eq nhaiq ma tap. Nyang nyah gungs lyis pyo cho ma chank lo shoq hou iq hank xiklyis zwi khank nyeis lah? Hei eq vkom dvnghuot, nhaiq ngis phoh kang dwis cho dvnghuot.

⁹Aiq yuk nghuot zis gas dvyuk kyingh thoq lyis zes gis. Khasoeh ge lyis nyamoq dvgeh muh lyis vlhomuh zes yoh kuot.

¹⁰Dvyuk lains lyis gohtoeu dvyuk nyang lyis yoh toeutoq. Dvyuk kyingh dvnyeis soeu lains lyis gas, nyang lyis pangh das soeu ma bos yvmvyah yau goeus.

¹¹Ngamh lyis dius aiq yuk dvgeh yhet lyis nywe joq. Nvng dvyuk kyingh gas khasoeh yoh nywe das?

¹²Los thyoq yvmas dvyuk nyang kyingh lyis gas, somh loh das teh nghuot laus eq aiq yuk nghuot lyis gas yoh thoenk zan. Somh khvt pungh dah twih gas lvnyap ma dyet.

¹³Joeui dyei zis ma yoeus, koh las mang goeus dah hwankti thoq lyis, nyungs las joeui bos dah wotyamh gas gis shih.

¹⁴Nyang gas hauh munghdan mas nyungs zis yah khoeu los laus eq hwankti bweh los zis ngos nyvng. Hwankti ma bweh los shih lyis thung eq lungh ku.

¹⁵Ngos zungh yoeuh nyeis lyis, haih mungkvn mas nyeis bang dvyhamh nyang lyis nyamoq dah hwankti toqh.

¹⁶Cangxeih lyis dius nyoshoq nyah thang mha chank laus eq, thang caiq lyis gas nyang lyis peq tyamp. Housoeh las nyings hoeuh cho yahge yomsoq eq vkom dvnghuot yvlyis chixoeuq. Hauh zis lyeis lyis chank khat teh dvnghuot.