Read Achang JOEUI 5 Bible Online

JOEUI 5 - Achang bible

JOEUI 5

¹Nvng Yhenmuh mas loh cho lhyi zaih aq. Houmha loh xuq zis gas gis gang ma seq gvn dah koh bang phudyei thoq lyis zes gis.

²Ma taiq shih lyis nghamh aq, Mangso lhyi dangthoengh vdyvm toh. Nyang gas maukhung mha nghuot las nvng gas nyeisjvng mas dvnghuot, housoeh las nvng taiq chah thoq lyis zes las vtaiq.

³Nvng zes chiqh lyis zes houteh ma gis yhetmoq moq, dang zes taiq lyis zes koh dang yhangteh zangh taiq.

⁴Housoeh las nvng Mangso lhyi dangthoengh toh goeus ya, yoh nyap nyhoq lvnyap kuot dyei aq. Koh zis gas nyah xiklyis vkyuh ma bos. Nvng kuot das ge dangthoengh toh zis kuot dyei aq.

⁵Dangthoengh toh lho lha ma kuot das thoq lyis gas, dangthoengh ma toh zis zes gis

⁶Nvnyang dang yah nvng lyis yaunos mas vshwih loh nhang. Housoeh nvng Mangso dah phudyei soeu lhyi nvng housoeh kuot das zis ma nghamh oen taiq chah das. Mangso nvng lyis nhaiqyo shoq chamus kuot? Nvng zwi khank toh zis nyang lyis chamus mhont nhang das.

⁷Yhetmoq khanyhoq moq laus eq, vkyuh ma bos muh khanyhoq zwi laus eq, nvng khanyhoq taiq laus eq, nvng gas Mangso lhyi gyukwoms nyeis chah.

⁸Nvng vtsuyaq gas nyungs bang lyis zaiq las lyi jus cho yahge nyamoq dah toeuh lyis ngoek zis nyvng lyis vmauh. Zau khanghmuh lyis nyah thoq lyis zes kuh soeu yah gos toh dyei. Nyah aiq yuk lyis eq nyamoq thoq lyis zes kuh zau jens yah gos toh dyei.

⁹Hwankti yangh jyo yhomh cho mha nges toh.[1]

¹⁰Nvng ngwis lyis jyet lyis, nhaiq khanhamp eq ma yoh tap. Nvng dis mes lyis nvng o zis dvnganh khanhamp eq ma yoh das. Hei eq vkom dvnghuot.

¹¹Nvng zes dis los lyis nvng tsoh das dius zes nyo los. Nvng yoh vkyuh gas nvng dis ge dah seq cho dvnghuot.

¹²Muh zwi soeu ka tham zo laus, ma tham zo laus nain thank nyenh lyis gis gis yoh yhet. Nghuot laus eq dis soeu ka nyah dis cho lhyi chiqh las gying nyeis.

¹³Ngos hai mungkvn mas gyukphoh cho dvkoeuq lyis nyvng. Dis soeu ka nyah vkyuh dyoq das xiklyis zisyos tsain yung toh.

¹⁴Hauh thang lhyi hauh zis gas ma gis cho mha dvnganh dyuk loh. Nyamoq dah lo jens lyis dyei das zis cha ma nyet lo shoq thank tyamp.

¹⁵Yang haih mungkvn mas wvng los lyis cha ma bos los zis yah dvyhangteh yang cha ma bos tauh loh chah. Yang kha iq zwi khank laus eq yang cha ma yoh yoeus loh.

¹⁶Heika ma jus! Yang gas los vgus loh. Yang lyeis lyis nyhik das zis yomkat tungh zwi khank las chah vkyuh yoh?

¹⁷Yang gas nhaiqkuk, chiqjyen, nhaiqyo, nosthyoh dah mauchuotdwang mas kang dwis chah.[2]

¹⁸Heika ngos xo nyvng goeus cho nghuot. Yang yoh kuot dah gis thank cho ka Mangso yang lyis dyei toh, lyung dah kang dwis yoq lyis yang zwi khank yvmas yoh zis zo shuk, gausyis nyeis das cho nghuot. Heika yah uhpui loqkyoq nghuot.

¹⁹Mangso yang lyis yoh khuiq cho yahge kyahsoe dyei las yang lyis houmha gausyis nhang lhyi yang zwi khank las yoh zis lyis nhaiqshoqlang oen zis yah gausyis nyeis chah. Houka Mangso jyank mas dah jyehjuh jyungshuk nghuot.

²⁰Mangso ka yang lyis gausyis nhang goeus las yang yah kang kha iq lyung cho lhyi ma tungh chiqh noh.