Read Achang JOEUI 6 Bible Online

JOEUI 6 - Achang bible

JOEUI 6

¹Ngos haih mungkvn mas svsoh ma gis dah lyi ma jus cho bweh goeus yvlyis soh nyvng kat.

²Mangso ka yang lyis yoh khuiq cho, nyoqnho ngelang yahge kyahsoe, nghuot goeus yang o zis dvnganh dyei das laus eq, thang lhyi hauh yvlyis xauh gausyis das toeuh ma dyei. Hauh gungsthaiq hauh yvlyis ma seq soeu dvyuk yuk dvgaus loh. Hou eq vkom dvnghuot las hauh zis ma jus.

³Yang gas kang xing lha lo dvxo yuk bos mvbeh, nghuot laus eq yang khanyhank nyeis laus eq yah dah gausyis gvmboms ma yoh, doeus khyvlyis nyhop zis ma xauh soeu thoq lyis shei zis khoeu los dah lonoeuh gas zes gis oen ngos taiq.

⁴Hauh lonoeuh khoeu los zis vkyuh ma bos, houka mauchuot dwang mas dyuk loh las houmha nyang lyis tohnyhik goeus.

⁵Nyang nyeih lyis dah bvng zis khanhamp eq ma nyvng, kang dwis cho cha yah doeus zis eq ma seq. Nghuot laus eq nyang nain thank noyos xo nyvng goeus.

⁶Aiq khyoengh zvn kang dwis laus eq gauslaus cho khanhamp eq ma bos soeu xiklyis gas hau lo shuot gas nyenstap cho yoh goeus. Thang thank lyis hau aiq yuk yah dvjoqyos mas dvloh.

⁷Yang zwi khank zis dvnganh gas zo zis yoh das xiklyis kuot. Nghuot laus eq khanhamp eq ma tham.

⁸Joeui bos soeu ka koh bang thoq lyis khasoeh zes? Nyungs bang gas kang dwis cho lhyi khasoeh jas das zis seq las chah vkyuh xauh kham?

⁹Hei eq vkom dvnghuot; houka lyeis lyis chank khat teh dvnghuot. Nvng yoh zis lyis nhaiqtap zis gas vjangh dvja ja lyis o nyeis thoq lyis zes gis.

¹⁰Bweh ya bweh los zis gas gohlhain yah nghamh thyet toh goeus. Nvng yom zes bos dah Mangso yah ma yoh taiq phyen-goh yvlyis yang dvnganhmoq seq.

¹¹Zes taiq phyen-goh zes hauh zis vkom dvnghuot. Nvng taiq phyen-goh las chah vkyuh ma bos.

¹²Hai lyung las siyet teh lai loh, vkom dvnghuot dah yah kang dwis yoq lyis yah nyhenshang gis thank zis cha nghuot yvlyis dvyuk yuk khasoeh yoh seq? Yang shei thang lhyi mungkvn mas cha bweh das zis yang khasoeh yoh seq das?