Read Achang JOEUI 8 Bible Online

JOEUI 8 - Achang bible

JOEUI 8

¹Vyhang dah vjyuk jyoeng lhyi joeui bos soeu kyingh dvseq. Joeui ka nyamoq dah nyoqnho lhyi diu nhang lha nyoqnho huon yvlyis dyuk loh nhang.

²Nvng hwankti taiq zis kuot aq, Mangso lhyi dangthoengh lvnyap vtoh.

³Hwankti ka nyang kuot mes zis yoh kuot, housoeh las nyah xikkhonh masyah thuq loh aq; housoeh teh gyukphoh joqyos mas vnyeis.

⁴Hwankti ka toeuh bos zis yah kuot las hank eq nyang cha kuot ge loqyom ma yoh tyonh.

⁵Nvng nyah vmingh chank kuot nyeis dvchank jesluiq. Joeui bos soeu ka hauh zis khanhamp khasoeh kuot das zis seq.

⁶Kuot das zis dvnganh yvmas doeus dah shishenh yahge doeus dah cho bos. Nghuot laus eq yang seq zis svsoh nain.

⁷Cha bweh los das zis yang hank eq ma seq. Yang lyis taiq kyoh das zis eq hank ma bos.

⁸Shei cho lhyi hank ma yoh zwi toh, nghuot ya shei buisnyeis lyis hank ma yoh tomp toh. Houka yang ma yoh phang luiq dah jeszan cho nghuot; mhuih las eq ma yoh luiq.

⁹Dius dvyhamh gas yomsoq bos las gohtoeu dvyhamh gas nyamoq yah zaiq zis xauh kham nyeis dah haih mungkvn mas bweh dah cho lhyi ngos nghamh yoeuh uhlyis ngos haih cho dvnganh nyvng.

¹⁰Dius jens gas lhung bang lyis nyamoq dah lop mas nyhop thang lhyi lopkhyam masyah doms los uhlyis hauh bang ma gis zis kuot khoq dah wus mas nyang nyamoq lyis chungh yvlyis ngos nyvng. Haih cho ka vkom dvnghuot.

¹¹Dius jens gas dius sat muh lyis chamus hou iq lwis lwis kuot? Houka dius sat muh lyis lvnyap ma joeng yvmvyah nghuot.

¹²Yaunos kuot soeu ka ma gis zis dvxo lhain kuot mvbeh zis dwis nyeis shih. Nghuot goeus, Mangso dah domsyos gyo lyis, dvnganh yah gis das ge, nyamoq taiq zis ngos seq.

¹³Nghuot laus eq lhung bang xiklyis ma gis das. Nyamoq kang ka siyet teh nghuot las ngis shih lyis shei das: khasoeh ge lyis nyamoq Mangso dah domsyos ma gyo.

¹⁴Nghuot laus eq hauh zis chah ma nghuot. Mungkvn mas cha bweh yvlyis yoeuh aq. Dvlhain lhain dan bang gas lhung bang xauh das joeng cho xauh nyeis. Lhung bang eq dan bang yoh vvng dah phauh shangh cho yoh. Ngos hou eq vkom dvnghuot, oen sang.

¹⁵Housoeh las ngos gas yang yvnyang pyo pyo nyeis chah oen seqgyo: khasoeh ge lyis haih kang dwis yvmas yang pyo das cho ka, zo, shuk las yvnyang gauslaus nyeis chah cho nghuot. Haih mungkvn mas Mangso yang lyis dyei dah kang dwis yoq lyis zwi khank yvmas nain thank heisoeh yoh pyo.

¹⁶Ngos joeui bos los das zis yomkat las, haih mungkvn mas cha bweh nyeis yvlyis xuq khanghmuh sohseq los zis gas, nvng nyeih nyenh ma yhet lo khank laus eq,

¹⁷Mangso cha kuot nyeis yvlyis khanhamp eq ma seqgyo. Nvng kha iq yomkat laus eq hauh zis ma yoh xo nyvng. Joeui bos bang gas nyamoq seq ge taiq mvbeh, nghuot laus eq nyamoq ma seq.