Read Achang JOEUI 9 Bible Online

JOEUI 9 - Achang bible

JOEUI 9

¹Ngos hai dvnganh dah cho lhyi nyangh shoq nghamh las seqgyo das zis yomkat. Mangso ka joeui bos bang yahge dan bang dah kuot cho, nyamoq dah jyet cho yahge hoeng cho lhyi yangh joeu nyeis zis ngos nyvng. Xik mas cha joq cho lhyi hank eq ma seq.

²Seq las eq cha ma shaih. Dan bang, lhung bang; gis bang ma gis bang[3] lomsnoq cho bos bang, ma bos bang yahge lomhxangh dyei bang, ma dyei bang jyank mas dvyhangteh uhpui loqkyoq los. Dius gis gas yaunos dap soeu thoq lyis ma zes; kyamptang soeu eq ma tang soeu thoq lyis ma zes.

³Dvnganhmoq mas dvyhangteh uhpui loqkyoq los las haih zis gas haih mungkvn mas bweh cho teh ma jus cho nghuot. Dius gas kang dwis nyeis dvchank nyamoq dah ehnyet mas ma gis zis yahge huonh cho yah dyingh joq. Hauh thang lhyi nyamoq nyetlos nyettant shei loh.

⁴Nghuot laus eq kang bos bang dah mungkvn mas dwis nyeis soeu ka nghamhloms cho dvtsiq bos. Dwis nyeis dah lvkhuih gas khangkhyi shei thoq lyis zes gis.

⁵Nghuot goeus dwis nyeis bang gas nyamoq shei loh das zis seq, nghuot laus eq shei goeus bang gas cha eq ma seq lo. Nyamoq phauh shangh zis eq ma xauh. Nyamoq lyis shoqlang tohnyhik tyamp goeus.

⁶Nyamoq dah jyet cho, hoeng cho, noh cho dvnganh eq nyamoq yah dvgeh shei loh goeus. Nyamoq gas haih mungkvn mas bweh cho cha mha eq, khanhamp eq ma doms yoh bos lo das.

⁷Tsoq las nah wom zo las pyo nyeis aq: nah zvbiq shuk las diu diu nyeis aq. Hauh zis Mangso nhaiqdoeus.

⁸Dyi gis mis gis wuot las, coeu eq juot zis yah shop shop nyeis aq.

⁹Haih mungkvn mas Mangso nvng lyis dyei toh, vkom dvnghuot dah kang dwis yvmas kang dwis nyeis dvchank, nvng jyet soeu yah gauslaus nyeis aq. Vkom dvnghuot dah buisnyeis khanghmuh, gauslaus nyeis aq: khasoeh ge lyis houka nah yau cho dvnganh xiklyis nvng xauh das zis nghuot.

¹⁰Nvng cha kuot kuot, yomkat las kuot aq: khasoeh ge lyis nvng loh nyeis dah shei mau mas kuot loh cho, nghamh cho, seq cho, joeui ma joq das.

¹¹Ngos gohtoeu dvja sohseq zis gas, haih mungkvn mas wuih nyap bang khyank goh yvmas vjangh ma ung, womh bang jeszan yvmas vjangh ma ung. Joeui bos bang vjangh womdau ma yoh khoeu, yik bang vjangh ma dis los, duot bang vjangh vkhom nyhang nyhang ma doq mus. Yuk khanghmuh mas kamh ma gis cho bweh los.

¹²Nvng nah shishenh khanhamp jweh los das zis khanhamp eq ma seq, lhyik mas nyetlos nyettant nyih dah nghoq teh, nyho mha nyih dah oeng teh, yang gas ma gis dah shishenh lyis lhyik mas masoh mathamh nyih.

¹³Ngos haih mungkvn mas joeui lhyi khasoeh nghamh cho dah yikhyoh gis dvkoeuq nyvng.

¹⁴Dius nyoshoq ma nyeis dah wuslo dvkoeuq bos. Yomsoq bos dah hwankti dvyuk hauh yvlyis los zan. Nyang hauh wus lyis lhaink las wusciank thyoq wvng das zis sont.

¹⁵Hauh wus mas nyungs soeu dvyuk nyeis. Nyang gas yik las hauh wus lyis yoh khyuot kat, nghuot laus eq nyah cho hank eq ma nghamh.[4]

¹⁶Joeui ka yom thoq lyis zes gis oen ngos vjangh taiq goeus. Nghuot laus eq nyungs bang joeui bos ge hank ma nghamh, nghuot ya nyamoq taiq yvlyis ma kamp gyo.

¹⁷Koh bang dah huom mha guon soeu kaiq zis gyo thoq lyis joeui bos soeu samlo taiq dang zes gyo gis.

¹⁸Joeui ka jes kyonhkhyi thoq lyis gis zis zes kuot; nghuot laus eq yaunos kuot soeu dvyuk gas gis zis nyoshoq yoh mhont.