Read Achang SOLOMON 1 Bible Online

SOLOMON 1 - Achang bible

SOLOMON 1

¹Solomon dah gyomes thank lvkhyank jens.

²Nah nhuotkuk yah ngos lyis bvlot nyoshoq lhain tanh; nah dah jyet cho ka zvbiq thoq lyis zes gis.

³Nah xangh coeu ka xangh shom nvm las, nah nyings gas hau xangh shom lhyi doms soh nhang. Khah vmesbih eq nvng lyis ma ngwis ma yoh nyeis.

⁴Nvng ngos lyis shwih loh aq, yang phang goh. Nvng ngah hwankti duot las ngos lyis nah yvp mas shwih loh aq. Nah jyetdap zis gas zvbiq shuk thoq lyis zes gis. Vmesbih khanghmuh nvng lyis jyet zis mauh chank ma bos.

⁵Yerusalem vmesbih jens eh, ngos gas Keda mas sihyos zvng teh noq laus eq, Solomon dah hwankti yhen mha khomh gos teh yungh.

⁶Buis lhap yvmvyah ngah vwot gvng mas ngos lyis dius ngis vkhyoq goh. Ngah vmang moq ngos lyis nhaiqyo las zvbiq khyam mha muh zwi nhang lha ngos ngvnyang gungs lyis loqzamh zwi das shishenh ma bos.

⁷Ngos jyet soeu eh, nvng nah yvng phung lhyi khamha shwih kat tsoh las, nyeihgungs lyis khamha no das zis taiq kyoh aq. Ngos chamus gohtoeu yvng yoeuh bang dah yvng phung jens mas nvng lyis xo chah das lah?[1]

⁸Vmesbih jens mas yungh thank soeu eh, nvng hauh joqyos ma seq lhyeh? Yvng phung thang mha chank loh aq; yvng yoeuh bang dah zvng nvm mas nah shvbeq jens xiklyis katjang xo aq.

⁹Ngah hwank nyhiq eh, nyang zains gas Pharao jeslhyingh mas dah nyanglus jens lyis sainh hwangh nhang teh nvng gas ngos lyis sainh hwangh nhang.

¹⁰Nah nodangh gas nah bvlot thoq mas yungh las nah lainzain chank phauhdap luk teh gyoh loh.

¹¹Nghuot laus eq ngamoq nah xiklyis ngwis yah dungh dah xing jvngchoh kuot dyei das.

¹²Ngah hwankti ka nyah jung mas lhain toh, hauh uhlyis ngah xangh coeu ka lyeis mas xangh nhoenk loh.

¹³Ngah hwank phoq gas nyang ngah sainhkhonh mas lhain toh uhlyis ngos nyah jyank masyah mura shom yoh.

¹⁴Ngah hwank phoq gas Engedi zvbiq khyam mha buh dah mhanhdyvp ban teh nghuot.

¹⁵Ngah hwank nyhiq eh, nvng kha iq yungh! Nah nyoqjeih jyet vwot yah bvng joq.

¹⁶Ngos jyet thank soeu eh, nvng kha iq yombos yungh! Nvng ngos lyis pyo nhang! Mhanh nyaus gas yah yhetyos duot das,

¹⁷Arit gas yah yhen bausjang, xoeuh zains gas yah yhenkhung teh duot das.