Read Achang SOLOMON 2 Bible Online

SOLOMON 2 - Achang bible

SOLOMON 2

¹Ngos gas Sharon pa mha mhanhdyvp ban, langhkhau mha dah anghchau ban dvnghuot.

²Vmesbih jens mas ngah hwank nyhiq gas zoeugyomh mas dah anghchau ban teh nghuot.

³Ngah hwank phoq gas gohyuk yah byi lyis saiqkhyam mha dah lvhomp zains teh nghuot. Ngos nyah buisshen mha tsung toh mes, nyah vshih gas ngah xiklyis nghamh whitau nghuot.

⁴Nyang ngos lyis nyah pwe yvpmuh mas shwih loh las nyah dah jyet ge dah khyiq ngah thoq mas mau toh dyei.

⁵Ngos gas jyet ehnyet yah yomnhuk nyeis. Nyang ngos lyis zvbiq shih kyuk yah huiq los nhang, lvhomp shih yah byan los nhang!

⁶Nyah loqwi loq yah ngos lyis uhkhoeuq khoeuq dyei las loqyos loq yah ngos lyis po toh.

⁷Yerusalem vmesbih jens eh, ngos lyis dangthoengh toh geh. Namoq ngamoq dah jyet cho mha ma nhauh das oen, yvng dah cvt jens lvlyo jens lyis lui las maukhi geh.

⁸Ngos ngah hwank phoq thwe xauhgyo. Nyang boms lyis jing lyis wuih lhyweq las ngah jyank mas los.

⁹Ngah hwank gas lvlyo, cvt kyoh teh nghuot. Nyang ciank yvm mas yap joq. Nyang khomhbaiq chank yoeuh kat. Khomhbaiq tyet chank tyoeuq kat.

¹⁰Ngah hwank phoq ngos lyis taiq. Ngah hwank nyhiq eh, los aq, dyei yungh eh, ngos yah loh goh.

¹¹Cungh lai goeus, mau eq thank goeus.

¹²Boms mau mas ban tsain buh joq. Haih zis gas lvkhyank kat yoq nghuot, hauh mau mas khotjyauh lvkhyank xauhgyo.

¹³Maiphang shih nyhink los goeus; lyeis gas zvbiq buh shom xangh nhoenk toh. Ngah hwank nyhiq eh, los aq. Dyei yungh eh, ngos yah loh goh.

¹⁴Nvng gas luk-uk lukjyvp mas tamh joq dah khotjyauh teh nghuot. Nah nyoqnho yungh lyis yoeuh nhang aq, nah gyomes thwe lhyi gyo nhang aq.

¹⁵Vbuh buh joq, ngamoq zvbiq khyamh lhyi ma lhoeu thyoq shih lyis hau womkhuih, womkhuih lo jens lyis jyop geh.

¹⁶Ngah hwank phoq gas ngah zis, ngos eq nyah zis nghuot. Nyang nyah yvng phung lhyi anghchau ban yos mas kat tsoh.

¹⁷Nvpsangh lyeis jyamh muot las chuot zis dyuk loh shoq nghuot. Ngos jyet soeu eh, lvlyo teh, vtsank tsank joq dah boms thoq mas dah cvt teh tauh los aq.