Read Achang SOLOMON 4 Bible Online

SOLOMON 4 - Achang bible

SOLOMON 4

¹Ngah hwank nyhiq eh, nvng kha iq yungh! Nah nyoqjeih gas nah nyoqnghop nungsthank mas jyet zis yah tsain bvng joq. Nah cam ka Gilead jing jens masyah goh gyoh los dah shvbeq phung teh dwis nyeis.

²Nah zwis eq mauh dye gom las gungs cheih toh dah yvng teh thyoeu. Dvchvp eq ma dyuk, dvnganh gas dyinghjet shoq yungh joq.

³Nah nhuotkuk gas zoek zoek nes dah pheh twih teh nghuot. Nvng dang taiq lyis houka kha iq yungh! Nah bvlot eq nah nyoqnghop nungs pheh tsain bvng joq.

⁴Nah lainzain gas Dawi dah khoek khoek tyoeuqzvm teh nghuot. Hauh yvmas gos dvkhyoengh lhangh toh, dvnganh gas jes thoeuqzoe jens dah gos tsain nghuot.

⁵Nah dyei nauh gas lvlyo jens teh, anghchau ban yos mas zo nyeis dah cvt lozoms teh tsain nghuot.

⁶Ngos gas chuot zis dyuk loh las nvpsangh lyeis jyamh muot los shoq mura jing, loban jing mas nyeis das.

⁷Ngah hwank nyhiq, nvng kha iq yungh; nvng dyinghjet shoq yungh.

⁸Ngah lonyi saiq eh, Lebanon boms masyah ngos yah dvgeh chank los aq. Lebanon masyah ngos yah dvgeh chank los aq. Khangkhyi jens, lutyoeuh jens nyeis Amana boms thyoh, Senir yahge Hermon boms thyoh masyah gyoh los aq.

⁹Ngos jyet soeu, ngah lonyi saiq, Nah nyoq dv dyoeus, nvng wuot toh dah uhshot yah nvng ngah nhaiqlom lyis khauh yoeus loh goeus.

¹⁰Ngos jyet soeu, ngah lonyi saiq eh, nvng jyet cho ka ngos lyis pyo nhang. Nvng jyet zis gas zvbiq thoq lyis zes gis. Nah xangh coeu ka xangh dvnganh thoq lyis zes xangh.

¹¹Ngos jyet soeu eh, nah nhuotkuk masyah dyoyhei teh chau zis thuq. Nah lhyo ka ngah xiklyis nauh yahge dyoyhei teh nghuot. Nah dyimis eq Lebanon xangh shom bos.

¹²Ngos jyet soeu, ngah lonyi saiq gas shung toh khyam, dangh toh khyam, dvyuk xiklyis jeisthuq dwang nghuot.

¹³Houmha vzains lho lho tsain nghuot. Houka tvleh shih khyam mha dah vzains jens teh yuk las gis thank dah vshih tsain shih.

¹⁴Houmha Nadu yahge mheh zains, xangh coeu zains vja ja, Kalamu, shihdyis zains tsain bos. Mura yahge shah saungh eq hau zes xangh thank dah xangh coeu zains jens dvnganh yah dvgeh yuk joq.

¹⁵Khyam ka jeisthuq dwang, yaus lyih jeis, Lebanon boms masyah yaus lyih dah jeislo lvng masyah jeis yoh.

¹⁶Mautsung lyeis eh, soh los aq. Mautyi lyeis eh, ngah khyam mha muot los aq. Lyeis mas xangh shom yah tyink aq. Ngah hwank phoq nyah khyam mha los las nghamh thank shih zo bas jungh.