Read Achang SOLOMON 6 Bible Online

SOLOMON 6 - Achang bible

SOLOMON 6

¹Vmesbih jens mas yungh thank soeu eh, nah hwank phoq khapheh loh goeus? Nah hwank phoq khacho loh zis ngamoq lyis taiq kyoh aq, housoeh nyang lyis xo das zis ngamoq nvng lyis yoh pangh.

²Ngah hwank phoq gas xangh coeu zains tsain yuk dah nyah khyam pheh loh goeus. Nyang gas hauh khyam khau mha nyah yvng phung lhyi kat tsoh nyeis, lho lha anghchau ban tsain caiq nyeis.

³Ngah hwank phoq gas ngah zis, ngos eq nyah zis nghuot. Nyang nyah yvng phung lhyi anghchau ban yos mas kat tsoh.

⁴Ngah hwank nyhiq eh, nvng gas Yerusalem teh yungh, Tiza wus teh yoeuh ngwis phoh nghuot las hai wusmuh aiq wus gonh yah teh, dvn shoq yungh.[4]

⁵Nah nyoqjeih lyis ngah jyank pheh vyoeuh nhang, houka ngos lyis nyhik she loh. Nah cam ka Gilead jing jens mas wuih gyoh los dah shvbeq phung teh goh nyeis.

⁶Nah zwis gas gungs dye cheih dah yvng phung teh thyoeu. Dvchvp eq ma dyuk, dvnganh gas dyinghjet shoq yungh joq.

⁷Nah bvlot gas nah nyoqnghop nungsthank mas bvng joq.

⁸Hwankti mha hwankti nyhiq khyukci, nyinhungh xetci, lonyi jens ma thoq suon lo shoq bos bas jungh.

⁹Nghuot laus eq ngos dvyuk lyis kyingh dvjyet, nyang gas khotjyauh teh yoeuh ngwis phoh nghuot. Nyang gas nyah ungwes dah lonyi loteh nghuot las nyah ungwes jyet thank lo nghuot. Vmesbih jens dvnganh nyang lyis yoeuh las chungh. Hwankti nyhiq jens yahge nyinhungh jens nyang lyis chungh lvkhyank kat.

¹⁰Hai maubuh los teh yoeuh kat soeu ka hank nghuot? Nyang gas yungh las buis soeh tso, nghuot ya lhamhmuh teh bvng.

¹¹Langhkhau mha shihlo zains lyis yoeuh das, zvbiq nwis vhuq thuot zis yoeuh das, Tvleh shih zains vbuh buh zis yoeuh das xiklyis ngos almon zains jens chank yah gyoh los goeus.

¹²Ngos gas nvn nyeis; nvng gas ngos lyis jeszan das xiklyis loh dah jeslhyingh komp soeu teh nvng yah jyet goh das xiklyis omes ehnyet bos nhang goeus. [5]

¹³Shulam lonyi eh, tauh los aq, tauh los aq. Ngamoq nvng goh yvlyis yoeuh bah. Vjens jens yoeuh nyeis bang jo mas nvng ngos goh yvlyis chamus zungh yoeuh mes?