Read Achang SOLOMON 8 Bible Online

SOLOMON 8 - Achang bible

SOLOMON 8

¹Nvng gas ngah ungwes yah dyei nauh dvlom lwi dah vmang teh nghuot nhang mes. Housoeh ngos nvng lyis talhoeu mha xauhgoh lyis bvlot yoh tanh, hauh yvlyis hank eq cha ma nghamh.

²Ngos nvng lyis ngah ungwes yhen mha shwih loh las nvng ngos lyis jyet goh cho yoh jyauh das. Ngos nvng lyis xangh lhoeuq zvbiq, tvleh shih jeis gvmshuk das.

³Nah loqwi loq gas ngos lyis loq uhkhoeuq khoeuq dyei las nah loqyos loq yah ngos lyis po toh.

⁴Yerusalem vmesbih jens eh, namoq ngamoq dah jyet cho mha ma nhauh das oen ngos lyis dangthoengh toh geh.

⁵Hai nyah hwank phoq yah kvtoq loq gaiq las sihyos masyah los nyeis soeu ka hank nghuot? Nvng khoeu los dah joqyos lvhomp zains khyei mha ngos nvng lyis nhauh.

⁶Ngos mas lai las gohyuk hank lyis eq vjyet, ngos mas lai las gohyuk hank lyis eq vpo. Jyet cho ka shei cho teh yomsoq bos. Sainh twih zis eq shei cho teh yombos. Houka nyilhyam thuq las nyi soeh ngeh.

⁷Jyet cho nyi lyis jeis yah ma yoh sat. Jeisnhauq las eq ma yoh nghop. Nghuot laus eq dvyuk yuk nyang yohkhuiq zis yah hauh jyet cho tungh wis mes lyis, houka jwangh nyhap zis dvxauh das.

⁸Ngamoq mas nauh ma buh shih dah nhamhmuh mhauhlo dvyuk bos. Nyang lyis los yoeuh dah loyvm bos los lyis ngamoq nyah xiklyis khasoeh kuot das au?

⁹Nyang ciank nghuot ya ngamoq nyah thoq mas ngwis tyoeuqzvm tsuk das. Nyang khyam khomh nghuot lyis gas arit thyeh yah gos toh das.

¹⁰Ngos gas ciank nghuot, ngah dyei nauh gas nyah tyoeuqzvm tsain nghuot. Ngos gas nyang yah nghuot lyis nhaiq tap zis yah nyenstap das zis ngah hwank phoq seq.

¹¹Solomon gas Bala Hamon ge joqyos mas zvbiq dvkhyam yoh. Houmha nyah jyank masyah khyam nghoh zwi bang bos. Nyamoq gas ngwis kyvp dvyuk dvkhyoengh dyei.

¹²Solomon ngwis kyvp dvkhyoengh xauh yoeus, khyam zwi bang eq dvyuk aiq xo xo gvmboms xauh. Ngos gas ngvnyang dah zvbiq khyamh yoh toh.

¹³Ngah hwank nyhiq eh, ngos gas ngvnyang zvbiq khyam nghuot. Hau khyam mhayah ngos nah thwe gyo mes. Ngah lochangh jens nvng taiq das zis langh gyo nyeis.

¹⁴Ngah hwank phoq eh, xangh tsain yuk dah boms jens mas dah lvlyo teh, cvt kyoh teh, ngah jyank mas los aq.