Read Achang ESAIA 1 Bible Online

ESAIA 1 - Achang bible

ESAIA 1

¹Yuda hwankti jens Uzia, Yotham, Ahaz, Hezekia moq dah zaih lyis Yuda mau yahge Yerusalem yah sen lha, Mangso Amoz lo Esaia lyis nyoqnyvng dyei.

²YHENSAIN taiq, Maukhung nyeisjvng eh, ngos taiq nyeis zis gyo aq! Ngos nyhoeu bes kat dah lo jens gas ngos lyis gomloeus toq.

³Noeu jens gas yhensain lhyi seq, mauhlyihzoe jens eq nyamoq lyis tsoh dah lang lyis seq. Nghuot laus eq ngah dius jens Israel gas ma seq. Nyamoq ma seqgyo.

⁴Yaunos kuot vnyau eh dyoqbis las, ma gis bang eh, namoq soetuon zis xauh goeus! Namoq dah yaunos gas namoq lyis lang khyoq goeus. Namoq gas Israel dah gyingshang YHENSAIN Mangso lhyi peq tyamp las nyang lyis nungs phuk khoq goeus.

⁵Namoq yobos dyei zis zes zes xauh shoq chamus gomloeus tsoq toq nyeis goh? Israel jens eh, namoq uhloms gas dvm yah dyingh joq; namoq nhaiqlom yahge nghamh cho ka nos nyeis.

⁶Nah gungs mas uhloms mas zis khyei jweh shoq yanghzan vchuq ma bos, thungh cwe, dvm, dvm kuh yah dyingh joq. Hauh dvm lyis ma cheih ma shang, ma lyet, mvcheih ma kat.

⁷Namoq mau lyis shont, namoq wus jens eq nyi ngheq tyamp. Namoq xikkhonh mas lvbaus gas namoq maunyeis lyis yoeus las thyoqpi tyamp.

⁸Zvbiq khyam zungh soeu dah zvng teh, tunghuh yos mas dah gyamh teh, khomp toh cho ma bos lhaink toh zis xauh dah Yerusalem wus nyang kyingh dvnyet joq lo.

⁹Maukhung Jesphung YHENSAIN yang lyis dius dvyhamh ma nyet joq nhang lo lyis gas, Yerusalem wus gas Sodom yahge Gomora wus teh monh tyamp das.

¹⁰Yerusalem eh, nah guon bang yahge nah dius jens gas Sodom yahge Gomora dius jens teh nghuot. YHENSAIN nvng lyis cha taiq zis gyo aq. Yah Mangso nvng lyis jyauh yvlyis kamp gyo geh.

¹¹YHENSAIN taiq zis gas, Ngos namoq tsoq phudyei nyeis dah lomhxangh dvnganh lyis o oen nghamh goh lhyeh? Ngheq phudyei dah yvng, nyhuk toh gaunyhauq coeu yah ngos jo goeus. Noeuchoq, yvnglus, shvbeq jens dah suih lyis ngos nghoengh goeus.

¹²Namoq ngos lyis paiq los uhlyis haih zis tsain yoeus los aq ge hank dung? Ngah Yhenmuh mas los nang yenh das zis namoq lyis hank sang?

¹³Namoq chi los dah jyungshuk gas vnyet dvnghuot. Ngos namoq ngheq dyei dah xangh shom lhyi choqh. Lhamhmuh canh nyeih pwe, no nyeih, lomsnoq cho dah moq huom lhyi tsain choqh. Hau dvnganh lyis namoq dah yaunos yah lhoeu thyoq tyamp goeus.

¹⁴Ngos namoq dah lhamhmuh canh nyeih pwe yahge gyingshang nyeih lyis tsain hoeng: houka ngos jhen nghoengh dah yvwons nghuot.

¹⁵Namoq loq toeu las shvmanh dung lyis ngos namoq lyis ma yoeuh. Namoq khanyhoq dung laus eq ngos ma gyo dyei das. Khasoeh ge lyis namoq loq gas suih yah dyingh joq.

¹⁶Namoq nyang gungs lyis shank shoq cheihshang geh. Ngah xikkhonh mas namoq kuot dah ma gis cho dvnganh masyah no geh. Nghuot goeus, ma gis zis vkuot lo goh.

¹⁷Jus zis kuot xuq geh, lyi jus cho lhyi kuot geh, zaiq zis xauh soeu lhyi pangh geh, chauhlo jens lyis nyamoq dah toeuh dyei geh, chauhmuh jens lyis gos toh dyei geh, ge.

¹⁸YHENSAIN taiq zis gas, Los geh, taiq goh goh: Namoq gas yaunos yah zoek zoek nes shoq lhoeuh laus eq gyu teh thyoeu shoq cheih dyei das. Nes noq teh nghuot laus eq namoq yvng mauh teh thyoeu los das.

¹⁹Nvng ngah domsyos gyo lyis gas, maunyeis masyah thuq los, gis dah vyhang xauh zo das.

²⁰Nghuot laus eq nvng ngos lyis gomloeus toq lyis gas, shei cho soetuon zis xauh das. Ngos YHENSAIN nyang taiq goeus.

²¹Xikpheh dvlhain lomluk khoq dah wus gas nghe nyhiq teh kuot nyeis! Dan bang yah dyingh khoq laus eq gvshih gas dius sat bang dvnyet joq lo.

²²Yerusalem eh, nvng gas xikpheh dvlhain ngwis teh nghuot khoq laus eq gvshih gas chah phauh ma dap lo. Nvng zvbiq gis teh nghuot khoq laus eq gvshih gas jeis dvnghuot lo.

²³Nah uhshe bang gas gomloeus toq bang, khauh bang dah loeuzomh jens nghuot goeus. Nyamoq gas vjangh khauwhot, jyungshuk lyis ngwis. Nyamoq gas chauhlo jens nghuot ya, chauhmuh jens dah soe mha ma gos dyei.

²⁴Housoeh las gvshih Maukhung Jesphung YHENSAIN, Israel dah Yomsoq bos Mangso taiq nyeis yvlyis gyo geh. Ngah jeswus jens eh, ngos namoq lyis lvto phuk bah, housoeh namoq ngos lyis yau ma yoh dyei lo.

²⁵Ngos nvng lyis tyixo zis yah kuot das. Ngos nvng lyis ngwis khyink teh cheihshang das. Ngos nah ma lhoq ma shang zis lyis dvnganh shang tyamp das.

²⁶Gohnhamp yoh dah guon bang, xamchangh jens teh zis ngos nvng lyis dyei das. Hauh thang lhyi Yerusalem wus lyis, Dan dah wus, wontang dah wus, ge lui das.

²⁷YHENSAIN ka dan soeu nghuot yvmvyah nyang Yerusalem yahge houmha dah nhaiqlom thaiq bang yuk khanghmuh lyis khyuot yoeus das.

²⁸Nghuot laus eq nyang lyis tyixo lha gomloeus toq bang yahge yaunos kuot bang khanghmuh lyis thungh thyi das. Nyang lyis tyamp bang khanghmuh lyis sat das.

²⁹Namoq paiq ku dah saiqzains jens yahge tsungh dah gyingshang khyam lyis auhuiq das.

³⁰Namoq gas nyhauh dah wons zains, jeis hank ma sanh dah khyam teh mus das.

³¹Nyijyenh yah huhyau ngeh teh, loyangh jens gas nyamoq nyang kuot dah ma gis muhzoh yah mhont zis xauh das. Hauh monh loh cho lhyi hank ma yoh no nhang, ge.