Read Achang ESAIA 10 Bible Online

ESAIA 10 - Achang bible

ESAIA 10

¹Namoq gas ngah dius jens lyis zaiq dah ma jus lyi tsain toh las dyoqbis goeus.

²Houka nyamoq nyungs bang dah toeuh khasoeh yoeus tyamp dyei cho yahge nyamoq dah lyi jus cho lhyi khasoeh yoeus tyamp dyei cho nghuot. Chauhmuh chauhlo jens yah sen dah zisyos khasoeh yoeus tyamp dyei cho tsain nghuot.

³Mangso namoq lyis yobos dyei lyis namoq khasoeh kuot das lah? Nyang we mau masyah thyoqpi cho she los lyis khasoeh kuot das lah? Pangh cho yoh shoq khalhye phang das lah? Namoq zisyos lyis khalhye tsomh toh das lah?

⁴Namoq jeszan yvmas shei das nghuot ya lang she lha jonsdoeus loh das. Heinyhoq bweh goeus laus eq YHENSAIN dah nhaiqyo ma bi, nyah loq dvlvm toh shih.

⁵YHENSAIN taiq, Ngos nhaiq yo bang lyis Asiria lyis lhamloq teh yhung lha joeng.

⁶Ngos lyis nhaiqyo nhang dah gywes ma tsungh vnyau lyis Asiria lyis yah loh zan nhang, ngos nyamoq lyis yah hauh bang lyis thyoq nhang, khauh nhang, dius jens lyis cho mha thomhbop lyis teh nang nheh nhang.

⁷Nghuot laus eq Asiria guon soeu nyang nghamh toeuq zis gas, dius nyau nyoshoq lyis mhont das ge nghamh thyet toh.

⁸Ngah jeszau jens yuk khanghmuh gas hwankti nghuot, ge moengs.

⁹Khalno yahge Kakhemi dah wus jens, Hamat yahge Arpad dah wus jens lyis zan ung. Samari wus yahge Damasku wus lyis zan ung.

¹⁰Ngos phvra lhyi paiq dah munghdan jens lyis loh joeng das zis duons shoq loh das. Hauh phvra jens gas Yerusalem yahge Samari mau mas dah phvra thoq lyis zes nyo joq.

¹¹Ngos Samari yahge houmha dah phvra jens lyis mhont tyamp goeus, Yerusalem yahge houmha tsain paiq nyeis dah gungslho lhyi eq hou yah dvyhangteh kuot das, ge.

¹²Nghuot laus eq YHENSAIN taiq zis gas, Zion boms yahge Yerusalem mas ngos kuot nyeis zis dye lyis, ngos Asiria Zau guon lyis nyang moengs cho yahge khwank cho gvng mas yobos dyei das.

¹³Asiria Zau guon moengs zis gas, Hau dvnganh ngvnyang kuot goeus. Ngos yombos, joeui bos, yik eq yik. Dius nyau jens dah maukyo lhyi thyoq tyamp las nyamoq yung toh dah zisyos lyis yoh lhuot yoeus. Noeu lu teh ngos houmha nyeis bang lyis yoh nang nheh tyamp.

¹⁴Mungkvn dius nyau jens gas nghoq sot teh nghuot las ngos nyamoq dah zisyos lyis nghoq uq yoeus teh lwis lwis yoh khyom. Nyamoq ngos lyis kyuk das ge dungs phap zis ma bos, nghoq zwis haq las nyhap zis eq cha ma bos, ge.

¹⁵Nghuot laus eq YHENSAIN taiq, Wuzung gas buk soeu lhyi nyang zes kuh ge yoh sang das lah? Kywizoe gas kywi soeu lhyi nyang zes yhaugyen ge yoh sang das lah? Lhamloq gas dius lyis ma toeu, dius yah lhamloq lyis dvtoeu toh, ge.

¹⁶Maukhung Jesphung YHENSAIN ka, gvshih vlhomuh nyhuk toh bang lyis joeng das xiklyis noslom nhang kat das. Nyamoq dah gungs mas nyi ngeh teh ngeh das.

¹⁷Israel dah bvng zis Mangso ka nyi bweh los. Israel dah gyingshang Mangso ka nyilhyam duot das. Hauh zis dvnyeih dvm lyis dvnganh ngeh tyamp das, zoeu yahge mhanh gyomh yangh ngeh jom tyamp das.

¹⁸Hau phauh bos saiq khyam jens yahge yos dvnganh dyoqbis das, houyah dvyhangteh shei nhang dah nos gas dius lyis dyoqbis nhang das.

¹⁹Saiq khyam mha nyet shih dah saiqzains jens gas svsoh nain las, loshang yangh yoh suon das.

²⁰Nyamoq lyis vluk thank shoq mhont tyamp dah dius nyau lyis doeng los dah Israel jens ma nges lo das dah buisnyeis jweh los das. Nyamoq gas jyoengh Israel dah gyingshang YHENSAIN Mangso lhyi loms das.

²¹Israel dius jens nainlo nyamoq dah Yomzains Mangso jyank mas tauh los das.

²²Israel eh, nah dius gas thomh mas sihsho nyhoq nyo laus eq, nainlo dvtauh los lo das. Nghamh thyet toh goeus dah dyoqbis cho yah shenh loh zis gas dan cho nghuot.

²³Maukhung Jesphung YHENSAIN Mangso nghamh thyet goeus zis yah dvyhangteh, mau gonh mas dyoqbis cho she los das.

²⁴Zion mha nyeis bang lyis Yomzains YHENSAIN Mangso taiq zis gas, Egutu bang kuot khoq teh namoq lyis zaiq dah Asiria jens lyis vgyuk goh.

²⁵Ma nyangh lyis ngos namoq lyis joeng cho dye das; hauh thang lhyi ngos Asiria jens lyis joeng das.

²⁶Ngos Maukhung Jesphung YHENSAIN ka Midian jens lyis Oreb Luk-uk mas joeng teh nyamoq lyis xuk das. Ngos Egutu bang lyis joeng teh Asiria jens lyis joeng das.

²⁷Hauh buisnyeis jweh lyis ngos nvng lyis Asiria yomsoq masyah luiq nhang lha nyamoq nvng lyis huon dah yvwons lyis nah kvtoq mas ma bos lo das.

²⁸Jeswus dah jesphung ka Ai wus lyis zan yoeus! Nyamoq Migron wus cho lai loh. Nyamoq dah zokho Mikmash wus mas toh khoq.

²⁹Nyamoq langhwuq lai las Geba wus mas nyenh ku khoq. Rama wus mas bang svsoh gyuk nyeis. Hwankti Saulo yhen joq dah Gibea wus mas bang gas phang loh goeus.

³⁰Galim wus mas bang eh kaiq geh; Laisha wus mas bang eh gyo geh! Anathot wus mas bang eh, phuk taiq geh.

³¹Madmena wus mas bang yahge Gebim mas bang gas nyamoq kang luiq shoq phang goeus.

³²Jeswus jens Khvnyhik Nob wus mas nyeis, houmha nyamoq Zion boms ge Yerusalem jing lyis toeuq las nyamoq loqtsop nvn nyeis.

³³Maukhung Jesphung YHENSAIN ka Saiqzains mas vko choeu teh thungh thyi das cho she los das. Nyamoq dah khwank cho yahge nyhang cho lhyi choeu khyoq las nyhen nhang das.

³⁴YHENSAIN ka nyamoq lyis saiq khyam mha saiq lyis wuzung yah thoeuq teh thoeuq las Lebanon mas dah yungh thank saiqzains lains teh tsain lains das.