Read Achang ESAIA 13 Bible Online

ESAIA 13 - Achang bible

ESAIA 13

¹Heika Amoz lo Esaia Babilon yah sen lha Mangso jyank masyah xauh yoeus dah loeus nghuot.

²Lhyang dah jing nyhang thyoh mas jeszan khyiq lhangh geh! Jeslo jens lyis khwank dah wus khomh jens lyis zan das xiklyis vsoh dyei khyvlyis loq toeu lha kaiq geh.

³YHENSAIN ka gyingshang dah moeng zan las nyang nhaiqyo bang lyis joeng das xiklyis nyang nghamhnywe las khwank nyeis dah jeslo jens lyis khi thuq kat.

⁴Boms thoq mas moqjens teh dah thwe lhyi gyo geh, dius nyau jens yahge munghdan jens huom dah thwe nghuot. YHENSAIN dah jesphung ka jeszan das xiklyis sont nyeis.

⁵Nyamoq gas nyeisjvng vthang Mau we mhayah los. YHENSAIN ka nhaiqyo zis yah mau gonh lyis mhont tyamp das nyhenshang los.

⁶YHENSAIN dah buisnyeis ni los, Maukhung Jesphung dyoqbis cho she los yvmvyah nos las kaiq ngaus geh.

⁷Yuk khanghmuh dah loq gas nhuk gyoh das; Yuk khanghmuh dah womh ehnyet ma bos lo.

⁸Nyamoq dvnganh gas gyuk dvn das, vmesbih lokhoeu nos nos teh chiqjyen das. Nyamoq gyuk zis yah nyang changh nyang yoeuh tsuk goh toh das, nyamoq dah nyoqnho ka xoqphuh cho yah ngeh das.

⁹YHENSAIN dah buisnyeis jweh los - houka gyukphoh nhaiqyo zis yahge nhaiqlom tsoeu cho ge lhoeng buisnyeis ni los; nyeisjvng gas jyamhjyuklhyuk kuot las, yaunos wons bang khanghmuh dyoqbis das.

¹⁰Maukhung kyi jens yahge hauh vwot eq ma bvng lo das. Buisthuq los lyis eq soeng soeng noq das, lhamhmuh eq ma tso lo das.

¹¹YHENSAIN taiq, Ngos mungkvn mas dyoqbis cho she los las lhung bang dah yaunos xiklyis joeng das. Khwank bang yuk khanghmuh lyis nyhen mha khyoq das. Lhoq lhoq teh kuot bang yahge lhoeng bang yuk khanghmuh lyis joeng das.

¹²Doeng nyeis bang xing thoq lyis xo nanh nhang das.

¹³Ngos Maukhung Jesphung YHENSAIN dah nhaiqyo cho chixoeuq nyeih lyis, ngos maukhung lhyi tsain nvn nhang das. Nyeisjvng nonh las nyah joqyos masyah ywi loh nhang das.

¹⁴Babilon mas nyeis dah gohmau bang gas nyamoq nyang nyeis mau pheh, shoh khat bang loq masyah phang dyos loh dah cvt teh, yvng yoeuh soeu ma bos dah yvng teh phang dyos sanh loh das.

¹⁵Xauh nyhik soeu hank laus eq jap sat zis xauh das.

¹⁶Nyamoq vshoh vjyen bweh uhlyis nyamoq dah lonoeuh jens lyis thungh thyi das. Nyamoq dah yhen lhyi thyoq das, nyamoq yhensain nyhiq jens lyis lhuot yoeus loh das.

¹⁷YHENSAIN taiq, Babilon lyis zan das zis Mede jens lyis jausjyonh das. Nyamoq gas ngwis lyis chaxwe ma nhang, xing lyis eq ma o bang nghuot.

¹⁸Nyamoq dah lyei yah nyo yah loyvm jens lyis sat das, nyamoq gas lonoeuh jens lyis nhaiqnyen cho ma chixoeuq das, loshang jens lyis nhaiq ma nyen das.

¹⁹Babilon gas munghdan dvnganh thoq lyis yungh thank las nyah dius jens dah nyoqnho ngelang eq nghuot. Nghuot laus eq ngos YHENSAIN ka Sodom yahge Gomora lyis mhont tyamp teh Babilon lyis toeu-mhuk tyamp das.

²⁰Houmha hank khanhamp eq ma doms nyeis lo das. Kwang yenh dah Arab dius jens houmha zvng ma kuot, yvng yoeuh soeu eq nyah yvng phung lhyi houmha ma kat tsoh lo das.

²¹Mhanhdyvp gaunyhauq nyeis dah joqyos yahge khunghbop sot sot joqyos duot das. Houmha gola-u nghoq nyeis das, beq lamh jens hau dyoqgyoh joq yvmas pant nyeis das.

²²Tyoeuqzvm jens yahge hwankti yhen jens gas Pauzoe jens yahge womkhuih jens gyap thwe yah dvgeh hoeu das. Babilon dah shishenh jweh goeus! Nyah shishenh vluk thank goeus.